बंगलादेशय् विपक्षीयात भोट बिल धकाः सामुहिक बलात्कार

बंगलादेशया छगू अदालतं सामुहिक बलात्कार याःगु द्वपनय् सत्ताधारी अवामी लिग पार्टीया छम्ह स्थानीय नेतालिसें न्हय्म्हेसित ज्वनेत आदेश बिउगु दु । पीडित मिसां वंगु वालय् जक क्वचाःगु आम चुनावय् थःम्हं विपक्षी नेशनलिस्ट पार्टीयात भोट बिल धकाः सामुहिक बलात्कार याःगु द्वपं बिउगु दु ।

प्यम्ह मचाया मां उम्ह मिसायात चुनाव जूकुन्हु हे आक्रमण यानाः बलात्कार याःगु खँ धाःगु दु । थ्व घटना पिहां वयेवं बंगलादेशय् आमजनता तम्वया सतकय् पिहां वःगु दुसा थाय्थासय् थ्व घटनायात कयाः प्रदर्शन नं जूगु दु । पीडित मिसाया भाःतं वंगु वालय् जक बलात्कार विरुद्ध जाहेरी बिउगु खः ।

जाहेरीइ धयातःकथं चुनावया बाचा कुन्हु छुं मनूत नोआखली जिल्लाय् च्वंगु थःगु छेँय् दुहां वयाः थःत व प्यम्हं मस्तय्त खिपतं चिनाः कलाःयात बलात्कार याःगु खः । बलात्कारीत वनेधुंकाः जःलाखःलाया ग्वाहालि कयाः उम्ह मिसायात अस्पताल भर्ना याःगु खः ।

उकुन्हु जूगु मतदानया इलय् भोट कुर्कः वंम्ह उम्ह मिसायात मतदान केन्द्रय् च्वनाच्वंपिं मिजंतय्सं विपक्षी उम्मेदवारयात भोट मबीत ख्याच्वः बिउगु खः ।मेखे अभियुक्ततय्सं थःपिंत बियातःगु द्वपंयात अस्वीकार याःगु दु । तर बलात्कारया द्वपं लानाच्वंम्ह उम्ह नेतायात धाःसा अवामी लिगं निष्काशन यायेधुंकूगु दु ।

वंगु आइतवाः जूगु चुनावय् अगामी लिगं अत्यधिक बहुमत हयाः चुनाव त्याकूगु खः । तर थ्व चुनावय् सत्तारुढ दलय् हिंसा न्यंकाः पूवंक धाँधली याःगु द्वपं विपक्षीतय्सं बिया वयाच्वंगु दु ।मेखे चुनाव लिपा नं सत्तारुढ पार्टीं विपक्षी पार्टीया कार्यकर्तातय् विरुद्ध हिंसा यानाच्वंगु खँ संयुक्त राष्ट्र संघं चिन्ता प्वंकूगु दु ।

सम्बन्धित बुखँ

LEAVE YOUR COMMENTS