ने. सं. ११४६ दिल्लाथ्व दुतिया - जगन्नाथ रथयात्रा

सुस्ताय् सादा वसतय् सेनाया गस्ती

प्रहरीया गस्ती नं अप्वयेकल, भारतीय सीमा सुरक्षा बलपाखें न्यनकने

येँ (नेपालभाषा टाइम्स) – पश्चिम नवलपरासीया सुस्ताय् छुं न्हिं न्ह्यवंनिसें सरकारं सुरक्षा उपस्थित अप्वयेकूगु दु । भारत लिसे सीमा स्वाःगु सुस्ता थीथी इलय् विवादया कारणं चर्चा वयेगु याः । थ्व स्वयां न्ह्यः सुस्ताय् नेपाल प्रहरी व सशस्त्र प्रहरी जक खटे जुयाच्वंगु खःसा छुं न्हिं न्ह्यवंनिसें नेपाली सेना नं खटे जूगु खँ स्थानीय वासिन्दां जानकारी बिउगु दु । सशस्त्र प्रहरी निरीक्षकया नेतृत्वय् २५ म्ह सीमा सुरक्षाया निंतिं खटे जुयाच्वंगु खःसा आः वयाः उकियात नं अप्वयेकूगु दु ।

स्थानीय बासिन्दाया कथं वंगु असार २२ गते नेपाली सेनाया सीमा सुरक्षा निर्देशनालय प्रमुख जर्नेल यमबहादुर अधिकारी नेतृत्वया पुचः सुस्ताय् खटे जूगु खः । सादा पोसाकय् उगु पुचः सीमा क्षेत्रय् थ्यनेवं भारतीय सीमा सुरक्षा बल (एसएसबीं) न्यनेकने याःगु खः । औपचारिक जानकारी मबिउसें नेपाली सेनाया पुचः सादा पोसाकय् सीमाय् खटे जुइवं भारतीय एसएसबीया अधिकारीतय्सं किपाः कायेगु ज्या याःगु खःसा नेपाली सेनाया पुचलं किपा कायेके मबिउगु खँ स्थानीय बासिन्दां जानकारी बिउगु दु ।

सुस्ताय् स्थानीयया नागरिकता, लालपुर्जा व सिमाना विवाद ताः इलंनिसें थाति लानाच्वंगु दु । लिपांगु इलय् प्रधानमन्त्री बालेन साहं संसदय् न्ववायेगु झ्वलय् ‘भारतं नेपाःया भूमि जक मखु नेपालं नं भारतीय भूमि त्यलातःगु’ धकाः बिउगु अभिव्यक्ति लिपा सुस्ताया सीमा विवाद हाकनं तच्वयावंगु खः । प्रधानमन्त्रीया उगु अभिव्यक्ति लिपा सुस्ताबासी येँ वयाः प्रधानमन्त्रीया अभिव्यक्तियात कयाः विरोध याःगु खःसा मेखे भारतीय एसएसबी पुचलं नेपाःया भूमिइ वयाः स्थानीय बासिन्दातय्त ख्यायेगु ज्या यानाहःगु खः ।

सुस्ताया बस्ती नारायणी खुसिया खुसिबालं कटान यायेगु पाखें बचे यायेत नेपाल सरकारं तटबन्ध दयेकाच्वंगुयात एसएसबी पुचलं वंगु जेठया निगूगु वालय् पनाबिउगु खः । वयां लिपा जेठया लिपांगु वालय् एसएसबीया पुचः हातहतियार सहित नेपाःया भूमिइ वयेवं स्थानीयतय्सं प्रतिकार यानाः लिना–छ्वःगु खः । थ्व घटना लिपा स्थानीय बासिन्दा असार निगूगु वालय् येँय् वयाः सीमा समस्या लिसें मेमेगु माग सम्बोधन यायेत सरकारयात दबाब बिउगु खः । दबाब लिपा गृह मन्त्रालयं असार १९ गते जिल्ला प्रशासन कार्यालययात पौ च्वयाः स्थानीयया समस्या ज्यंकेत निर्देशन बिउगु खः ।

गृह मन्त्रालयया शाखा अधिकृत आनन्दवंश न्यौपानें हस्ताक्षर यानातःगु पतिइ सुरक्षा दृष्टिं संवेदनशील सुस्ता क्षेत्रय् थप सुरक्षाकर्मी परिचालन यायेत निर्देशन नं बियातःगु खः । थःगु समस्या ज्वनाः येँ वःपिं सुस्ताया स्थानीय बासिन्दां फिब्वख्यलय् धर्ना बिउगु खःसा असार १७ गते गृहमन्त्री सुधन गुरुङयात नापलाःगु खः । उगु इलय् स्थानीय बासिन्दां भारतीय सुरक्षाकर्मीपाखें नेपाःमितय्त जुयाच्वंगु ज्यादतीया घटना बारे जानकारी बिसें सेनाया कमाण्डय् सुरक्षा पोस्ट तयेत माग याःगु खः ।

गृह मन्त्रालयं छ्वःगु पतिइ नागरिकता पाखें बञ्चित स्थानीयतय्त ऐन–नियम कथं प्रक्रिया पूवंका नागरिकता बीत व ऐन–नियम कथं नागरिकता बी मफइगु खःसा उकिया कारण व आधार खुले यानाः नीतिगत पहलया निंतिं मन्त्रालयय् च्वयाः छ्वयाहयेत नं निर्देशन बिउगु खः । मन्त्रालयया उगु पौया आधारय् सुस्ताया बासिन्दातय्त नागरिकता बीत स्थानीय वडां ज्या न्ह्याकेधुंकूगु खँ नं स्थानीय बासिन्दां जानकारी बिउगु दु ।