बियोन्सेया प्रस्तुति इहिपाया

भारतया धनाढ्य मुकेश अम्बानीया म्ह्याय् ईशा आम्बानीया इहिपाया निंतिं थ्व इलय् उदयपुरय् थीथीकथंया ज्याझ्वःया प्रस्तुति जुयाच्वंगु दु । ईशा अम्बानीया इहिपा आनन्द पिरामलनाप जुइत्यंगु दुसा इहिपा स्वयां न्ह्यःया ज्याझ्वः ‘प्रि–वेडिंग’ उदयपुरय् तसकं तामझामपूर्वक जुयाच्वंगु दु ।

छुं दिं न्ह्यःनिसें न्ह्यानाच्वंगु ज्याझ्वःया झ्वलय् वंगु शनिवाः बलिउडया चर्चित कलाकारपिंसं थःगु प्रस्तुति बिउगु खः । थ्व हे झ्वलय् ईशाया इहिपाया ज्याझ्वलय् थःगु प्रस्तुति बीत अन्तर्राष्ट्रिय रुपं हे नांजाःम्ह म्येँ हालामि बियोन्से नं उदयपुर थ्यंकः वःगु दु । सांगीतिक ख्यलय् तःजिगु ग्रामी अवार्ड त्याकेधुंकूम्ह बियोन्सें वइगु आइतवाः ईशाया इहिपाया लसताय् जुइगु ज्याझ्वलय् थःगु प्रस्तुति बी ।

ईशा–आनन्द इहिपाया ज्याझ्वलय् प्रस्तुति बीत वःम्ह बियोन्सें महाराण प्रताप विमानस्थलं पिहां वःगु इलय् तुयुगु प्रिन्टेड वसतय् खने दुगु खः । आइतवाः बियोन्सें प्रस्तुति बीगु इलय् अमेरिकी पूर्व फस्ट लेडी हिलारी क्लिन्टन, नकतिनि जक इहिपा याःम्ह भारतीय सेलिब्रिटी प्रियंका चोपडा व वया अमेरिकी गायक भाःत निक जोन्स सहभागि जुइगु जूगु दु ।