युरोपय् कोरोना नियम विरुद्ध प्रदर्शन

एजेन्सी- युरोपया थीथी देसय् कोरोनाया संक्रमण अप्वया वनाच्वंगुलिं तःगु कोरोना नियमया विरुद्ध प्रदर्शन जूगु दु । अस्ट्रिया, क्रोएसिया, नेदरल्याण्ड्स व इटालीइ द्वलंद्वः मनूत सतकय् वयाः प्रदर्शन याःगु खः ।

नेदरल्याण्ड्सय् जूगु लकडाउनया न्हूगु नियमयात कयाः नं विरोध प्रदर्शन जूगु दु । नेदरल्याण्ड्सया हेगय् प्रहरी व प्रदर्शनकारी दथुइ झडपलिपा आपतकालया आदेश जारी याःगु दुसा ७ म्हेसित ज्वंगु दु । हेगय् प्रदर्शनकारीतय्सं साइकलय् मि तःगु खःसा प्रहरीयात मि च्याकाः कयेकूगु खः । झडपय् न्याम्ह प्रहरी घाःपाः जूगु धाःगु दु । नेदरल्याण्ड्सया रोटरडामय् प्रदर्शन हिंसात्मक जुइवं प्रहरीं हवाइफायर याःगु खः । समाचार संस्था रोयटर्सं बिउगु जानकारीकथं प्रहरीं ताके यानाः गोलीं कयेकूगु व गोलीं लानाः स्वम्ह घाःपाः जूगु दु ।

अस्ट्रियाया राजधानी भियनाय् नं लकडाउनया विरोधय् प्रदर्शन जूगु दु । सोमवाः निसें २० न्हुया निंतिं लकडाउन व कोरोना विरुद्धया खोप काये हे माःगु नियमया विरुद्ध द्वलद्वः मनूतय्सं राजधानीया सतकय् वयाः प्रदर्शन याःगु खः । कोरोनाविरुद्ध खोप अनिवार्य याःगु अस्ट्रिया युरोपया न्हापांगु देय् खः ।

अथे हे क्रोएसियाय् नं सार्वजनिक क्षेत्रय् ज्या याइपिं कर्मचारीतय्सं खोप काये हे माःगु नियम विरुद्ध राजधानी जाग्रेबय् द्वलंद्वः मनूतय्सं प्रदर्शन याःगु दुसा इटालीइ ज्याकुथि, सार्वजनिक सवारी व थीथी थासय् प्रवेशया निंतिं ग्रिन पास माःगु नियमया विरुद्ध प्रदर्शन जूगु खः ।

विश्व स्वास्थ्य संगठनं युरोपय् अप्वयाच्वंगु कोरोनायात कयाः चिन्ता क्यसें नियम कडा मयात धाःसा लाबलाया दुने हे न्यागू लाख मनू सीफुगु धाःगु दु । संगठनया निर्देशक डा. हान्स क्लुगें बीबीसीयात थुकिया जानकारी बिउगु खः । डा क्लुगें खोप कायेमाःगु, मास्क तयेमाःगु व कोरोना पास लागु यायेमाःगु नं धाःगु दु । युरोपियन देय् जर्मनी, आयरल्याण्ड, बेलायत, अस्ट्रिया, इटाली, नेदरल्याण्ड्स, क्रोएसिया आदि देसय् कोरोना संक्रमण अप्वयाच्वंगु दु । ८७ प्रतिशत मनूतय्सं खोप कायेधुंकूगु पोर्चुगलय् नं छुं इलंनिसें कोरोना संक्रमण अप्वयावयाच्वंगु दु ।