सिंहदरबार लुखा न्ह्यःने बाइक दिकाः प्रदर्शन

येँ (नेपालभाषा टाइम्स) – थीथी सञ्चार माध्यमया ज्याकुथिइ सवारी साधन पार्किङ यानाः पंगः थंगु विरोधय् नेकपा एमाले समर्थित विद्यार्थी संगठन अनेरास्ववियुं म्हिगः सिंहदरबारया दक्षिण ध्वाखाय् मोटरसाइकल पार्किङ यानाः विरोध प्वंकूगु दु । विद्यार्थी संगठनया कार्यकर्तातय्सं सिंहदरबार ध्वाखा न्ह्यःने मोटरसाइकल दिकाः विरोध प्वंकेवं थ्व लँपु पूवंक ट्राफिकम जाम जूगु खः । प्रर्दशनकारीतय्सं थीथी नारा च्वयातःगु प्लेकार्ड नं प्रर्दशन याःगु खः ।

राज्य आतंक अप्वःगु धासें विरोध प्रदर्शन याःपिं न्हय्म्ह विद्यार्थीतय्त प्रहरीं ज्वंगु दु । अनेरास्ववियुया अध्यक्ष दिपक धामी, निर्वाचन समितिया अध्यक्ष जितप्रसाद सिटौला, सचिवालय दुजः विशाल खड्का, उपत्यका विशेष प्रदेश संयोजक रवि मगर, केन्द्रीय दुजः विष्णु उपरकोटी, कानुन राष्ट्रिय कमिटीया सचिव सुदिप थापा व सिरस बुढाथोकीयात प्रहरीं ज्वंगु खः ।

विद्यार्थी नेतातय्त ज्वंगु खँयात कयाः झिंछगू विद्यार्थी संगठनं मंकाः विरोध प्वंकूगु दु । थीथी दलया विद्यार्थी संगठनतय्सं म्हिगः मंकाः विज्ञप्ति जारी यानाः आलोचना याइपिंत सरकार थम्हं हे आतंकित यानाच्वंगु इतिहासया हे घृणित व लज्जास्पद ज्या जूगु खँ धयातःगु दु । मंकाः विज्ञप्तिइ धयातःगु दु, ‘राज्यं ब्वलंकूगु आतंकया सांकेतिक विरोध यायेगु झ्वलय् विद्यार्थीतय्त दमन व धरपकड यायेगु ज्या जूगु दु । जिमिसं थ्व राज्य आतंकया घोर भण्डाफोर यासें ज्वंपिं सकल विद्यार्थीतय्त त्वःतेत माग यानाच्वना ।’