ने. सं. ११४४ चौलाथ्व दशमी -

एन्फा निर्वाचनय् ध्यबा नकूगु द्वपं

येँ – अखिल नेपाल फुटबल संघया निर्वाचनया इलय् अनियमितता जूगु द्वपं लाःगु दु । एन्फाया निर्वाचन क्वचाःगु हे दछि दयेधुंकाः प्यंगू जिल्ला फुटबल संघतय्सं आर्थिक अनियमितता जूगु द्वपं बिउगु खः । येँय् छगू पत्रकार सम्मेलन यासें ख्वप, येँ, यल व धादिङ्ग जिल्ला फुटबल संघं एन्फा निर्वाचनय् अनियमितता जूगु व आर्थिक लेनदेन जूगु अडियो टेप हे सार्वजनिक याःगु खः ।

उगु अडियो टेपय् एन्फाया मानार्थ अध्यक्ष टासी घले लगायतया पदाधिकारीतय्सं चुनावया लिच्वः थःगु पक्षय् हयेगु निंतिं खँल्हाबल्हा यानाच्वंगु सः दु । पत्रकार सम्मेलनय् येँया अध्यक्ष विराटजंग शाही, ख्वपया गौतम सुखजु, यलया पुरुषोत्तम थापा व धादिंगया दीपक खतिवडां अनियमितता बारेया अडियो टेप थःपिंके सुरक्षित दुगु व उगु अडियो फिफा व एसियाली फुटबल महासंघयात लःल्हायेगु खँ धाःगु खः ।

एन्फाया न्हूगु कार्यसमितिया निर्वाचन वंगु वैशाखय् जूगु खः । उगु निर्वाचनय् कर्मा छिरिङ्ग शेर्पा अध्यक्ष ल्यःगु खः । उगु निर्वाचनय् व्यापक आर्थिक अनियमितता जूगु दावी यासें एन्फाया पुलांम्ह वरिष्ठ उपाध्यक्ष मणि कुँवरं नं न्हापा हे पत्रकार सम्मेलन यायेधुंकूगु दु ।
थ्वहे दथुइ एन्फाया प्रवक्ता किरण राइं प्यंगू जिल्लाया फुटबल संघं बिउगु द्वपनय् छुं सत्यता मदुगु खँ धाःगु दु ।

‘थःगु नेतृत्वयात गुगु द्वपं बियादिल, व गम्भीर दु व उकिया भत्र्सना याना’ प्रवक्तां धाःगु दु । मतदातातय्त ध्यबा इन धकाः द्वपं बियाः मतदातातय् हे घोर अपमान याःगु धासें वय्कलं थ्व द्वपंयात प्रमाणित याना क्यनेत चुनौती नं बियादीगु दु । वय्कलं धयादीगु दु, ‘द्वपं बियां जक मजिउ, प्रमाणित यानाः क्यनेमाः, द्वपं प्रमाणित यायेमफुत धाःसा वय्कःपिंत कारवाही यायेगु जुइ ।’