‘अपग्रेट’ जुइत नेपाः अनिच्छुक

येँ – ‘अति कम विकसित राष्ट्र’ तय्गु धलखं च्वय् थकयाः ‘कम विकसित राष्ट्र’ तय्गु धलखय् च्वं वनेगु अवसर वःसां नेपालं धाःसा आःयात थःपिं च्वय्या धलखय् वनेत अनिच्छा प्रकट याःगु दु ।

राष्ट्रिय योजना आयोगं संयुक्त राष्ट्र संघ समक्ष आःयात थःपिं ‘अति कम विकसित राष्ट्र’ या धलखय् हे च्वनेगु जुइ धकाः लिखित जानकारी याःगु खँ सीदुगु दु ।
नेपालं स्वास्थ्य, शिक्षा, यातायात, सञ्चार आदि ख्यलय् याःगु विकासयात आधार दयेकाः संयुक्त राष्ट्र संघं नेपाःयात ‘अति कम विकसित राष्ट्र’ या धखलं च्वय् थकयाः ‘कम विकसित राष्ट्र’ या धलखय् तयेगु प्रस्ताव तःगु खः । तर राष्ट्र संघया उगु प्रस्तावयात लिसः बिसें नेपालं थःपिं च्वय् थहां मवनेगु इच्छा प्रकट याःगु खः ।

नेपालं स्वास्थ्य, शिक्षा आदिया ख्यलय् प्रगति याःगु खःसां प्रतिव्यक्ति आय धाःसा खास हे थहां मवंगु कारणं ‘अपग्रेट’ मजुइगु इच्छा प्रकट याःगु खः । राष्ट्रिय योजना आयोगं नेपाःया प्रतिव्यक्ति आय १२०० डलर थ्यंकाः जक ‘अपग्रेट’ जुयाः कम विकसित राष्ट्रया धलखय् च्वं वनेगु बिचाः नं तयेधुंकूगु दु ।

थौंकन्हय् नेपाःया प्रति व्यक्ति आय ८०० डलरया जःखः जक थ्यनाच्वंगु दु । प्रतिव्यक्ति आय थहां मवंकं मेमेगु ख्यलय् विकास जूसां उकिया खास अर्थ मदइगु राय नेपालं तःगु दु । मेगु छगू सूत्रं धाःसा ‘अति कम विकसित राष्ट्र’ या धलखं थहां वनाः ‘कम विकसित राष्ट्र’ या धलखय् वने सातकि अन्तर्राष्ट्रिय समुदायं नेपाःयात बिया वयाच्वंगु थीथी कथंया ग्वाहालि कटौती जुइगु सम्भावना दु ।

आर्थिक अनुदान, कम ब्याज दरया त्यासा आदि थेंज्याःगु सुविधा काये मखनीगु जुयाः नेपालं आः थथें अपग्रेट मजुइगु बिचाः न्ह्यःने तःगु खँ धाःगु दु ।

सम्बन्धित बुखँ

LEAVE YOUR COMMENTS