क्यानाडाया एडमन्टन सहरय् न्हूदँया भिंतुनालिसें मंकाः म्हपुजा
येँ – क्यानाडाय् च्वंपिं नेवाःतय्सं नं नेपाल संवत् ११४० न्हूदँया भिंतुनालिसें म्हपुजा याःगु दु । क्यानाडाया एडमन्टन सहरय् च्वंगु नेपाली समाजं न्हूदँया भिंतुनालिसें मंकाः म्हपुजा याःगु खः । नेपालभाषा, कला, संस्कृति, तिसावसः, नसाज्वलंया बारे क्यानाडाय् च्वंपिंत नं जानकारी बीगु व न्हूपुस्तायात उकिया महत्व थुइकेगु ल्याखं उकथं ज्याझ्वः यानागु ग्वसाः खलकं जानकारी बिउगु दु ।
देय्या हे तःजिगु नखः, न्हूदँ, संस्कृति, राष्ट्रिय विभूति शंखधर साख्वाः, देय्या कला, संस्कृति, भाषा, कला–संगीतया म्हसीका बीगु नापं थुकथंया ज्याझ्वःया निरन्तरता बिया वनेगु ल्याखं उगु ज्याझ्वः याःगु खः । सन् २०१३ निसें नेवाः कल्चरल सोसाइटी अफ एलबर्टा (एनसीएसएं) मदिक्क थुकथंया ज्याझ्वःया याना वयाच्वंगु दु ।
थुगुसी न्हूदँया लसताय् संस्थां एडमन्टन सहर व उकिया जःखः च्वंपिं नेपाःमितय् दथुइ थ्व ज्याझ्वः याःगु खःसा ज्याझ्वलय् एलबर्टाया प्रान्तया विधानसभा सदस्य रिचार्ड फेहान व एलबर्टा विश्वविद्यालयया प्राध्यापक डा. डेभिड वाइने विशेष पाहांकथं उपस्थित जुयादीगु खः ।
नेपाल संवत्या प्रवर्तक राष्ट्रिय विभूति शंखधर साख्वाःया किपा, मित्रताया प्रतीककथं नेपाः व क्यानाडाया ध्वाँय् न्ह्यःने तयाः म्हपुजा याःगु खः ।
प्राध्यापक डा. वाइनें नेपाःया संस्कृतिया अध्ययन व अवलोकन थःगु हे देशय् च्वनाः प्रत्यक्ष रुपं याये खंगुलिं सन्तोष जूगु धासें ज्याझ्वःयात कयाः च्वछायादिल ।
ज्याझ्वःया उलेज्या समाजया नायः डा. हेमन्तराज जोशीं त्वाःदेवाय् मत च्याकाः यानादीगु ज्याझ्वलय् म्हपुजा व येँयाः जात्रा सम्बन्धी सपूmया नं पितब्वज्या याःगु खः । ज्याझ्वलय् नायः जोशीं स्वन्ति नखः, न्हूदँ व म्हपुजाया महत्वयात कयाः थःगु नुगःखँ तयादिसें नेपाल संवत् गुगुं छगू जाति विशेषया जक न्हूदँ मखु धयादिल ।
थःगु हे देय्या चाय् ब्वलंगु न्हूदँ व म्हपुजा सकल नेपाःमिं अपनत्व ग्रहण याये फयेकेमाःगु खँय् नं वय्कलं बः बियादिल । प्रान्तीय विधानसभा सदस्य फेहानं नं नेपाःमितय् महान नखःया इलय् सकलें नापं च्वनाः हने खंगुलिं थः अतिकं लय्ताःगु खँ कनादिल । लिसें वय्कलं नेपाःया सम्पन्नतां जाःगु सांस्कृतिक सम्पदाया ज्याझ्वलय् ब्वति काये खंगुलि थःगु लसता प्वंकादिसें सकसितं भिंतुना नं देछानादिल ।
मेम्ह विशेष पाहां प्राध्यापक डा. वाइनें नेपाःया संस्कृतिया अध्ययन व अवलोकन थःगु हे देशय् च्वनाः प्रत्यक्ष रुपं याये खंगुलिं सन्तोष जूगु धासें ज्याझ्वःयात कयाः च्वछायादिल । ज्याझ्वलय् ब्वति कायेत वःपिं सकलें नेपाःमि नापं पाहांपिंसं नं म्हपुजा यानाः पुजाविधिया बारे जानकारी काःगु खः । ज्याझ्वःया दकलय् लिपांगु ब्वय् सांस्कृतिक ज्याझ्वः न्ह्यब्वःगुनापं न्ह्यसःलिसः कासा नं याःगु खः ।
LEAVE YOUR COMMENTS