एमाले १५ वडा कमिटीया वृहत कार्यकर्ता भेला

येँ – नेकपा (एमाले) येँ महानगर १५ वडा कमिटीया वृहत कार्यकर्ता भेला जुल । कमिटीया अध्यक्ष धावा रुम्बाया अध्यक्षताय् कार्यकर्ता भेला जूगु खः । भेलाय् नेकपा (एमाले)या केन्द्रीय दुजःलिसें येँ जिल्ला अध्यक्ष कृष्ण राई मूपाहांकथं झायादीगु खःसा विशेष पाहाकथं येँ महानगरपालिकाया प्रमुख विद्यासुन्दर शाक्य झायादीगु खः ।

ज्याझ्वलय् नवासें मूपाहां राईं नेकपा एमाले येँ महानगर १५ वडा कमिटी महानगर दुनेया हे मेमेगु कमिटी स्वयां अप्वः सक्रिय व क्रियाशील जूगु धासें लसता प्वंकादिल । ज्याझ्वलय् उपस्थित कार्यकर्ता व पार्टीप्रतिया मतिना खनाः थः तसकं लय्ताः धासें वय्कलं आः न्हूपिं दुजः दयेकेगु व ल्याय्म्हतय्त प्राथमिकता बिया वनेत नं कमिटीयात निर्देशन बियादिल ।

निर्वाचनय् एमालेया सुद्र्यः चिं कयाः निर्वाचित जुयादीपिं जनप्रतिनिधि गुपिं थःगु हे सरकार क्वःथलेत सिमाय् भोट कुर्काः मूल पार्टी त्वःताः राजीनामा तकं मबसे मेग पार्टीइ वनीपिंत इमिगु नैतिकता बारे नं न्ह्यसः तयेत कार्यकर्तातय्त इनाप यानादिल ।

विशेष पाहां येँ महानगर प्रमुख विद्यासुन्दर शाक्यं नं नुगःखँ तयादीगु भेलाय् पार्टीया येँ जिल्ला सचिवलिसें बागमति प्रदेश सांसद दीपक निरौला, महानगर कमिटी अध्यक्ष निर्मल देउजा, जिल्ला समन्वय समितिया प्रमुख शिवसुन्दर राजवैद्य, १५ वडा कमिटीया दुजः निमा घ्याम्छो, आनन्दराम गौतम, येँ क्षेत्र नं ८या सचिव उदय पसःखलः, महानगर कमिटी दुजः लक्ष्मण शाही, राष्ट्रिय युवा संघ केन्द्रीय स्थायी कमिटीया दुजः शिवकुमार महर्जन, सचिवालय दुजः दिलिप थिङ, युवा संघया केन्द्रीय कमिटीया दुजःपिं, महानगर कमिटीया थीथी कवः, अखिल नेपाल महिला संघ जिल्ला सचिवालय युवा संघ १५ वडा कमिटी लगायतया संगठनया प्रतिनिधिपिनिगु नं उपस्थिति दुुगु खः ।

नेपालभाषा टाइम्स

च्वमिया मेमेगु

• तोखाया धर्म संस्कृति सम्बन्धी सफू
• यःसिं हनुमानध्वाखा थ्यन
• देय दबूया स्वीक्वःगु बुसादँ हन
• आः लाइसेन्सया पलेसा क्युआर कोर्ड दुगु रसिद
• माओवादीपाखें नं खुसि मापदण्डया विरोध