मेक्सिकोय् हेलिकोप्टर दुर्घटना गभर्नर मन्त

मेक्सिकोय् सोमवाः छगः हेलिकप्टर दुर्घटना जुयाः अनया पुब्ला राज्यया गभर्नर व छम्ह सिनेटर व वय्कःया कलाः सीगु दु । अथेहे दुर्घटनाय् लानाः हेलिकप्टरया निम्ह चालक, छम्ह सहयोगी नं सिउगु खः । मेक्सिकोया राष्ट्रपति कार्यालयं जानकारी बिउ कथं गभर्नर मार्था एरिका अलोन्सो, सिनेटर राफेल मोरेनो भाल्ले व वय्कःया कलाः सीगु खः ।

मेक्सिकोया राष्ट्रपति म्यानुएल लोपेज ओब्राडोरं ट्विट यासें समवेदना प्वंकूगु दु । लिसें वय्कलं हेलिकप्टर दुर्घटनायात कयाः अनुसन्धान सुरु जुइधुंकूगु खँ नं धाःगु दु । पुब्लाया सान्ता मारिया कोरोनान्गो क्षेत्रं ब्वःगु १० मिनेट लिपा हे दुर्घटना जूगु खः । गभर्नर अलोन्सों वंगु डिसेम्बर १० य् जक पदभार ग्रहण यानादीगु खः । वय्कः पुब्लाया न्हापांम्ह मिसाम्ह गभर्नर नं खः ।