तालिबान सरकारविरुद्ध मिस्तय् प्रदर्शन

एजेन्सी- अफगानिस्तानया राजधानी काबुल व उत्तर पूर्वी प्रान्त बादखस्तानय् तालिबान सरकारविरुद्ध सलंसः मिस्तय्सं प्रदर्शन याःगु दु । तालिबानं गठन याःगु अन्तरिम सरकारय् दक्वं दुजः मिजंत जक जूगु धकाः विरोध प्रदर्शन जूगु खः । मिसातय्गु उपस्थिति मदुगु सरकारयात स्वीकार यायेमखु धकाः प्रदर्शनकारीतय्सं धाःगु दु ।

तालिबानया स्थानीय सञ्चार माध्यम एतिलाट्रोजं बिउगु जानकारीकथं प्रदर्शनकारी मिसातय्त तालिबानया लडाकुतय्सं दाःगु व हातपात नं याःगु दु । प्रदर्शनया रिपोर्टिङ्ग यानाच्वपिं पत्रकारतय्त नं तालिबान लडाकुतय्सं दाःगु व ज्वनायंकूगु स्थानीय सञ्चार माध्यम एतिलाट्रोजं जानकारी बिउगु दु । तालिबानं धाःसा थ्व द्वपंया लिसः बिउगु मदुनिसा मिस्तय्सं याःगु प्रदर्शन गैरकानूनी खः धासें ख्याच्वः बिउगु दु । तालिबानं प्रदर्शनकारीतय्सं अनुमति कयाः जक प्रदर्शन यायेदइ धाःगु दु । वंगु मंगलवाः तिनि काबुलय् जूगु प्रदर्शनय् गोलीं लानाः स्वम्ह मनू सीगु खः ।

तालिबानं मंगलवाः सरकार गठनया घोषणा याःगु खःसा तालिबानं सरकारय् दुपिं दक्वं दुजःत अमेरिकी सेनायात आक्रमण याःपिं लानाच्वंगु व थ्व सरकारय् मिसापिं छम्ह नं मदुगुलिं अमेरिका व युरोपियन युनियन चिन्ता प्वंके धुंकूगु दु । अथे हे तालिबानलिसे ल्वानाच्वंगु एनआरएफं नं तालिबान सरकारयात अन्तर्राष्ट्रिय मान्यता मबिइत इनाप याःगु दु ।

चीनं धाःसा तालिबान सरकारयात मान्यता बिइधुंकूगु दु । अथे हे चीनं अफगानिस्तानया तालिबान सरकारयात २० करोड युआन नं ग्वाहालि याइगु जूगु दु । चीनं अफगानिस्तानयात खाद्यान्न व कोरोना खोप नं ग्वाहालि यायेत्यंगु दु । चीनं अमेरिकी सेनां अफगानिस्तानय् विध्वंस याःगु द्वपं नं बिउगु दु ।

थ्वया हे दथुइ अफगानिस्तानया पूर्व राष्ट्रपति अशरफ घानीं अफगानया जनतालिसे क्षमा फ्वंगु दु । तालिबानं अफगानिस्तानयात कब्जाय् कायेधुंकाः युएई शरण काःवंम्ह पूर्व राष्ट्रपति घानीं देशय् शान्ति व स्थीरता हयेमफुगुलिं दुःख प्वंकूगु दु । ट्विटर पाखें छगू विज्ञप्ति पिकयाः घानीं काबुल त्वःतेगु निर्णय थःगु जीवनया हे थाकुगु निर्णय जूगु व मेगु विकल्प मदुगुलिं देश त्वःतागु धाःगु दु । काबुलय् हिंसा मजुइमा धकाः देश त्वःतागु नं घानी धाःगु दु । देशया निंतिं घानी जीवनया २० दँ समर्पण यानागु व ६० लाख जनताया रक्षा यायेत देश त्वःताः वनेगु छपु हे जक लँपु दुगु नं विज्ञप्तिइ धयातःगु दु । घानीं लखंलखं डलर ज्वनाः बिसिउँवंगु द्वपंया प्रतिवाद नं याःगु दु । ‘जिगु च्याप्टर मेपिं राष्ट्रपतित थें हे शान्ति व स्थीरता बिना अन्त जुल’ घानीं धाःगु दु ।