रामशेखरया ख्यालः ब्वज्या न्ह्यात
ख्वप (नेपालभाषा टाइम्स) – नांजाःम्ह साहित्यकार लिसें ख्यालः च्वमि, निर्देशक, कलाकार रामशेखर नकःमिया ख्यालः ब्वज्या वंगु शनिवाःनिसें न्ह्याःगु दु । साहित्यकार कलाकःमि नकःमिया न्हिं छपु छपु ख्यालः क्यनेगु ल्याखं उगु ख्यालः ब्वज्या ग्वसाः ग्वःगु खः ।
नेपाल मजदुर किसान पार्टीया अध्यक्ष नारायणमान बिजुक्छेँ (रोहितं) छगू ज्याझ्वःया दथुइ ख्यालः ब्वज्याया उलेज्या यानादीगु खः । ज्याझ्वलय् नवासें वय्कलं बहुप्रतिभाशाली रामशेखर नकःमि थः गबलें नं मन्हिउसे मेपिंत इतिइति न्हिइके फुम्ह, जनतायात जागरुक याये फुम्ह, शोषण, अन्यायया विरोधय् च्वइम्ह नांजाःम्ह साहित्यकार जूगु विचाः तयादिल ।
नाट्यकर्मी समाज नेपालया ग्वसालय् लिबालिबिइ च्वंगु आस्था सांस्कृतिक समूहया थिएटरय् जुयाच्वंगु ख्यालः ब्वज्याया न्हापांगु दिं शनिवाः ‘खेल खतम’ व आइतवाः ‘छेरावति’ ख्यालः न्ह्यब्वगु खः । ब्वज्याया झ्वलय् सोमवाः रामशेखरया तसकं लोकंह्वाःगु ख्यालःमध्ये छपु ‘१२ बजे’ न्ह्यब्वइ ।
अथे हे मंगलवाः ‘खुँयात ज्वँज्वँ’, बुधवाः ‘तन्त्र ताब्लेत’ (खस नेपाली भासं), विहीवाः ‘खुँ’, शुक्रवाः ‘तन्त्र ताब्लेत’ (नेपालभाषां), शनिवाः ‘टुरिष्ट गाइड’, आइतवाः ‘अस्पतालया जा’, सोमवाः ‘रानीपुखू’ ख्यालः न्ह्यव्वइ । ब्वज्याय् दकलय् लिपा मंगलवाः ‘सिमात फफस्वः’ क्यनेगु तयारी जुयाच्वंगु खःसां प्राविधिक कारणं उकिया पलेसा ‘खेल खतम’ दोहोरे यानाः क्यनेगु ग्वसाः खलकं जानकारी बिउगु दु ।
थुपिं ख्यालः न्हिं छगू छगू थीथी शैक्षिक, सास्कृतिक व सहकारी संस्थापाखें न्ह्यब्वइ ।
LEAVE YOUR COMMENTS