मोदीयात रञ्जना लिपिया अभिनन्दन

भारतया प्रधानमन्त्री नरेन्द्र मोदी थनिंनिसें नेपाः भ्रमणय् वयेत्यंगु खँ थनया राजनैतिक माहौलय् चर्चित जुयाच्वंगु दु । भारतीय प्रधानमन्त्रीयात जनकपुर व येँय् नागरिक अभिनन्दन नं याइगु खँय् मत विमति ब्वलनाच्वंगु दु ।

नेपालं थःगु हे तयारीं पित बिउगु संघीय लोकतान्त्रिक गणतन्त्र नेपाःया संविधान जारी याये न्ह्यः भारतयात खबर (स्वीकृती) मकाःगु खँय् अनेक त्वहः तयाः नेपाःमि जनतायात नाकाबन्दी तयाः सास्ती याःम्ह प्रमुख हस्ति भारतया प्रधानमन्त्री नरेन्द्र मोदीयात थनया नागरिकतय्सं अभिनन्दन थ्यंक यायेमाःगु छुं तुक मदु धयागु आम मानसिकताया दुने थ्व भ्रमण जुइत्यंगु दु ।

नेपाःया सरकारं आः थुकियात नागरिक अभिनन्दन मखु, नगर अभिनन्द धकाः संशोधन यायेधुंकूगु दु । भारतं नेपालय् तःगु नाकाबन्दीं नेपाःमितय्गु जीवन हे कष्टपूर्ण जक जूगु मखुसें नेपाःया अर्थतन्त्रयात तकं प्रभावित याःगु खः ।

तर थुकियात हे सकारात्मकरुपं बिचाः याइपिंसं भारतं नेपाःयात न्ह्याबलें थःगु ल्हाःम्हू दुने जक तयेगु कुतः यानाच्वनीगु प्रवृतियात हाचांगायाः उगु इलय् नेपाः सरकार थः उत्तरपाखेया देश चीननाप सतिक व क्वातुक ब्यवहार यायेत ताःलाःगु कारणं नेपाःया अर्थतन्त्र दुने अनेक सकारात्मक लिच्वः नं लाःगु विश्लेषण यानाच्वंगु दु ।

प्रधानमन्त्री मोदीयात बीगु अभिनन्दन पौ नेवाः भासं र रञ्जना लिपिं बी फत धाःसा जक नेपाःमितय्गु स्वाभिमान ल्यनी । गर्वं छ्यं धस्वाके फइगु स्थिति ब्वलनी । अथे मजुसे देवनागरि आखः व इमिगु हे लिधंसा भाषां अभिनन्दन यायेगु खःसा झीगु स्वतन्त्र अस्तित्व गुकथं ल्यंका तये फइ ?

नेपाःयात चीन सरकारपाखें जूगु अनेक ग्वाहालि खनाः नुगः मूम्ह भारत सरकारं नं नेपाःयात थीथी कथं ग्वाहालि यायेत व लिपा वनाः नरम ब्यवहार यायेत बाध्य हे जुइमाःगु स्थिति ब्वलंगु खः । थुकिया हे लिच्वःकथं आः नेपालय् न्हापां सुनां रेल मार्ग हयेगु धयागु खँया छखेर धेंधेंबल्लाःया स्थिति खने दयाच्वंगु दु ।

भारतया प्रधानमन्त्रीया नेपाः भ्रमणया इलय् जुइत्यंगु नागरिक अभिनन्दनयात कयाः नं थनया पहिचानवादी भाषिक अधिकारकर्मीतय्गु ध्यान थुगु भ्रमणय् वनाच्वंगु दु । भारतया प्रधानमन्त्री नेपाः भ्रमणया झ्वलय् येँय् वये न्ह्यः जनकपुर वनाः जानकी मन्दीर दर्शन याइगु ज्याझ्वः दुसा अन हे मधेसी जनतां वय्कःयात नागरिक अभिनन्दन पौ देछाइगु नं जूगु दु ।

तर थ्व नागरिक अभिनन्दन पत्रय् छ्यलातःगु भाय्यात कयाः भाषिक अधिकारकर्मीतय्सं न्ह्यसः ब्वलंकूगु दु । नेपाःया प्रदेश नं. २ स मधेसी राजनीतिक पार्टीतय्गु वर्चश्वय् अन प्रशासन न्ह्यानाच्वंगु दु । मधेसीतय्गु मातृभाषा भोजपुरी व बज्जी भाषा खः, तर अन हिन्दी भाषां प्रभावित यानाच्वंगु दु । हिन्दी भाषा अनया वासिन्दातय्गु मातृभाषा मखु ।

तर राजनीतिकरुपं सत्तारोहण याःपिंसं अन हिन्दी भाषायात प्रोत्साहित यानाः अनया मनूतय्गु मातृभाषायात दमन यात धयागु ब्यापक असन्तुष्टी दु । थ्व हे कारणं आः भारतया प्रधानमन्त्रीयात स्वंगू भाषां अभिनन्दन पौ लःल्हायेमालीगु बाध्यता अन ब्वलनाच्वंगु दु ।

भाषिक अधिकारया निंतिं सनाच्वंगु बहुसंख्यक संघ संस्था, खलः पुचःत नेवाःतय्गु बाहुल्यता दुगु स्वनिगलय् थ्व खँ चर्चा जुयाच्वंगु मदु । स्वनिगः नेवाःतय्गु आदिभूमि जूगु कारणं थन नं अभिनन्दन पौ नेवाःतय्गु मातृभाषा नेपालभाषां बीमाः धयागु बारे आः तक सुना नं सः तःगु खनेमदुनि ।

स्वनिगः दुने नेकपा एमालेया प्रभावशाली उपस्थितिया कारणं थनया स्थानीय तह व प्रादेशिक तहलय् न्ह्यथनेबहः जुइक नेवाःत जनप्रतिनिधिकथं उपस्थित जुयाच्वंगु दु । नेकपा एमाले २०४६ सालया आन्दोलन लिसें हे लिपांगु आन्दोलनया ई तक नेवाःतय्गु सहभागिताय् निर्णायक आन्दोलन यायेत ताःलाःगु राजनीतिक पार्टी खः ।

थ्व हे कारण नं नेवाःतय्गु भाषा, जाति संस्कृतिया आधिकारिकताय् थुमिगु सद्भावना अप्वयेमाः धयागु मानसिकता थनया आम जनताया दु । प्रदेश नं. ३ नेवाःतय्गु आदिभूमि व बाहुल्यता लिसें द्वलंद्वःदँनिसें थनया मूलवासी नेवाःतय्सं थःपिनिगु शिल्प व शैलीया माध्यमं अनेक कृतित नीस्वनाः नेपाःयात विश्वय् हे अलग्ग म्हसीका बीत ताःलाःगु खँय् शंका मदु ।

नेवाःत सभ्य व सुसंस्कृत जातिया मनूत खः धयागु खँया अनेक दृष्टान्त दु । आःया इलय् राजनीतिक पार्टी दुने नं राष्ट्रवादया ब्यापक चर्चा जुयाच्वंगु इलय् राष्ट्रया गर्व यायेगु निंतिं नं भारतीय प्रधानमन्त्री नरेन्द्र मोदीयात येँ महानगरपालिकां याइगु अभिनन्दन पौ नेवाः भासं जुइमाःगु व उकिया लिपि नेवाःतय्गु मौलिक लिपि रञ्जना लिपि जुइमाःगु खँय् चिन्तन जुइमाः ।

जनकपुरया जनतां थःपिनिगु भाषाया महत्वय् अडिग जुयाः स्वंगू भाषां अभिनन्दन पत्र तयार यायेफुसा थनया नेवाःतय्सं जक थुकी नुगः कय्कुंकेमाःगु आवश्यकता मदु ।प्रधानमन्त्री मोदीयात बीगु अभिनन्दन पत्र नेवाः भासं व रञ्जना लिपिं हे बीमाःगुया ऐतिहासिक व राजनीतिक कारण दु ।

नेपालं छगू इलय् संयुक्त राष्ट्र संघय् सदस्यताया लागिं निवेदन तःगु इलय् नेपाः भारतया हे प्रान्त खः, अन छ्यलीगु आखः देवनागरि व ल्हाइगु भाय् संस्कृत भाषाय् आधारित जुयाच्वंगु व थ्व निगुलिं भारतीय खः धकाः सदस्यता मबिउगु इलय् नेपाः छगू स्वतन्त्र देश खः धकाः नेपाःया थःगु हे लिपि रञ्जना लिपि व तिब्बत बर्मी परिवारया भाय् ल्हाइपिं खः धकाः क्यनाः उकिया हे आधारय् थःपिं स्वतन्त्र राष्ट्र खः धकाः प्रमाणित याःगु खः ।

थ्व राष्ट्रवादयात नालाः प्रधानमन्त्री मोदीयात बीगु अभिनन्दन पौ नेवाः भासं र रञ्जना लिपिं बी फत धाःसा जक नेपाःमितय्गु स्वाभिमान ल्यनी । गर्वं छ्यं धस्वाके फइगु स्थिति ब्वलनी । अथे मजुसे देवनागरि आखः व इमिगु हे लिधंसा भाषां अभिनन्दन यायेगु खःसा झीगु स्वतन्त्र अस्तित्व गुकथं ल्यंका तये फइ ? छथ्वः राजनीतिज्ञतय्सं हे धयाच्वंगु ‘लम्पसारवाद’ या नियति थ्व अभिनन्दन ज्याझ्वः मजुइमा धयागु खँय् झी सकसिगुं ध्यान वनेमाः । थःगु स्वाभिमान ल्यंकेगु ज्याय् सकलें न्ह्यचिलेमाः ।

 

सम्बन्धित बुखँ

LEAVE YOUR COMMENTS