ने. सं. ११४६ बछलागा तृतीया -

उतिकं कठोर जुयाः दनेमाः

काठमाडौं महानगरपालिकाया ‘प्रमुख हाइ, हाइ’ बारे छपु च्वसु च्वयागु । पिहां वल । विशेष यानाः बालेनजु निगू ज्यां जनताय् आकर्षणया केन्द्र जुल । प्रशंसाया पात्र जुल । सतकपेटीया व्यापारीतय्त चिइकेगु व अवैध छेँ, संरचनातय्त तत्काल घारघुर यानाः थुना बीगु । नगर प्रमुखया थ्व साहसी ज्यां नगर प्रमुख बालेनपाखें ‘आः थन छुं जुइ’ धइगु आशा जनमानसय् थना बिउगु दु । खतुं प्रभावित पक्षतपाखें बालेन गाक्कं आलोचित जुल । तर स्थानीय जनताया समर्थन व लहरं यानाः बालेनजुं गुगुं विरोधया चिउताः मतसे आत्मविश्वास साथ थःगु ज्या पूवंकेत सफल जुल । जनतापाखें ‘वाह वाही’ काये खन ।

तर । पेटीया व्यापारीतय्त चिइकेगु व नियम विपरीतया छेँ, संरचनातय्त थुनेगु ज्यां नगर प्रमुख बालेन प्रशंसाया पात्र जूसां थुसकं उतिकं गम्भिर न्ह्यसः नं थना बिउगु दु । गुकिं यानाः थनया जनतां सम्बन्धित पक्षतपाखें लिसःत काये दयेमाः । काये फयेमाः । सतकपेटीया व्यापारीतय् समस्या थौं म्हिगःया समस्या मखु । काठमाडौंलय् दँदँ न्ह्यवनिसें थनया सतकपेटीइ व्यापार संचालन याना वयाच्वंगु दु । अथे हे बालेनं थुंगु नियम विपरीतया छेँ संरचनात नं दँदँ निसें छर्ल· जुयाच्वंगु खः । थुपिं संरचनात गुगुं गोप्य संरचनात मखु ।

तर बालेनं । नेतृत्व काये न्ह्यःया महानगरपालिकां पेटी व्यापार व अवैध संरचनात बारे छाय् कठोर कारवाही याये मफुत ? छाय् मिखा तिसित ? छाय् बालेन हे पी माःगु ? काठमाडौं महानगरपालिका शक्ति सम्पन्न स्वायत्त केन्द्र खः । अथे हे थन वडात दु । गन छु अनियमित ज्या जुयाच्वन धइगु निगरानी, अनुगमन छाय् मयाःगु ? छाय् मजुल ? भ्रष्टाचारया कारणं खः ला ? अनुचित राजनीतिक दबावया कारणं खः ला ? थौं येँ महानगरय् खने दुगु अनेक विकृतिप्रति म्हिगःया महानगरया प्रमुखत, वडाअध्यक्षत गुलि जिम्मेवार ? गुलि दोषी ? उकिया नं छानविन जुइमाः । स्थानीयवासी जनताया न्ह्यःने उकिया प्रतिवेदन, हिसाबकिताब वयेमाः ।

अवैध छेँ, संरचनात निर्माण जूगु थाय् जरुर गुगुं वडाय् लाः जुइ । अनया वडाअध्यक्षपिंसं अवैध संरचनाय् छाय् मिखा तिसित ? छाय् मखंछु यात ? थन छुं गोप्य लेनदेन, गैरकानूनी हस्तक्षेपया खेलं ज्या यानाच्वंगु दइ । सहजकथं अनुमान याये फइ । फु । उकिं सतकपेटीया व्यापार, गतिविधि जुइ बिउ वा अवैध नियम विपरीतया छेँ संरचनाया खँ जुइ बिउ । थुकी महानगरपालिका, वडाअध्यक्षत थःथःगु कर्तव्यं च्यूत जूगु दु ।

काठमाडौंलय् थज्याःगु विकृति ब्वलंकेगुलिइ तात्कालीन महानगरपालिकाया पदाधिकारी, प्रशासन जवाफदेही जुइ । जुइमाः । बालेनजुं म्हिगःया थनया विकृति, अकर्मण्यता छाय् छु खँय् जुल ? उकिया हिसाब किताब जनताया न्ह्यःने तयेमाः । क्षणिक प्रशंसां प्रभावित मजुसे नगर प्रमुखजुं थःगु संस्था दुनेया अनियमितता, बाह्य हस्तक्षेप, आन्तरिक भ्रष्टाचारयात नं नियन्त्रण यायेमाः । मखुसा बालेनजु नं वहे मुलु व हे सुका जुयाः विलिन जुइ ।

बालेनजु ! आतक छिं अवैध अनियमित कर्मतय् विरोधय् पलाः छित । खः । प्रमुखजुं थन विरोध फयेमाल । तर व विरोध लःफ्वं थें जक खः । छाय् धाःसा व अवैध, अनियमितताया विरोधय् जूगु कदम खः । तर गत सरकारतसें सहरी विकास प्राधिकरण नांया संस्था छ्यलाः काठमाडौंया रैथाने स्वाबासीतय् वैध छेँखात सहरी विकासया नामय् अन्धाधुन्ध थुना बिउगु दु । गुलिखे काठमाडौंवासीतय्त घरवारविहीन याना बिउगु दु । गुलिखे काठमाडौंवासीत थौं थःगु छेँबुँया भाग्य छु जुइगु खः ? अनिश्चित ! चिन्तित जुयाच्वंगु दु । भू माफियातय्सं काठमाडौंया सहरीकरणया ज्या थःगु ल्हाती कयाः कयाः थःगु लाभ, स्वार्थ अनुरुप काठमाडौंया आदिवासीतय्त गासबास विहीन यायेत स्वयाच्वंगु दु । थन अवैघ, अनियमित संरचनाया मखु, वैध, नियमपूवर्क नक्सा दुगु छेँय् नं गिद्दे दृष्टि तइपिं गिरोहत सक्रिय जुयाच्वंगु दु ।

बालेनजी ! थ्व खँय् काठमाडौवासीत असुरक्षित । बालेन प्रमुख जुया अवैध, अनियमित छेँ संरचनातय्त थुनाः थःगु ज्या क्यन । प्रशंसित जुल । आः प्रमुखजुया न्ह्यःने चुनौतित दु । काठमाडौंवासीतय् वैध छेँ, बुँ, संरचनातय् न्यायोचित संरक्षण जुइमाः । नक्सा मदुपिंप्रति गुकथं कठोर जुल । नक्सा दुपिनिगु पक्षय् नं प्रमुखजु उतिकं कठोर जुयाः दनेमाः ।