विश्वय् हलचल हःगु स्वंगू घटना

वंगु वालय् जूगु स्वंगू राजनीतिक घटना क्रमं एशिया, युरोप व अमेरिकाय् तकं तरंगित यानाबिल । छगू अफगानिस्तानया गृहयुद्धयात अन्त यायेगु लागि अमेरिकां पाकिस्तानयात शान्ति प्रक्रियाया ज्याय् ग्वाहालि यायेमाल धाःगु खँ, मेगु युरोपया राजनीतियात हे प्रभावित जुइगु कथं फ्रान्सया मजदूर जक मखु विद्यार्थीत तकं नं राष्ट्रपति विरुद्ध सतकय् कुहां वयाच्वंगु घटना व मेगु भारतय् न्यागु प्रदेशया चुनावया नतिजाया घटनाक्रमं यानाः भारतय् जक मखु एशियाया राजनीतिइ नं छुं हिउपा वयेफु धकाः राजनीतिक विश्लेषकतय्सं अनुमान यायगु ज्या यात ।

अथे धयागु न्ह्यःने वयाच्वंगु भारतया आम चुनावया लिच्वः एशियाया राजनीतिइ तकं नं छुं भचा हिउपाः वयेफु धकाः अनुमान यानाहःगु दु ।
न्हापाया राजनीतिक घटनाक्रम खः अफगानय् गृहयुद्ध जुयाच्वंगु १८ वषृ दयेधुंकल, अझ नं अन्त जुइगु लक्षण खनेमदु ।

जब अफगानया तालिवान सरकारयात अमेरिकाया सैनिक बलं पतन यानाः थः कतांमरि नेतातय्त सत्ता छ्वयेत सफल जुल, तर देशय् शान्ति वातावरण हयेत अमेरिका असफल जुल । थ्व हे कारणं तालिवान शासन ला अन्त जल, तर तालिवान लडाकुत अफगान सरकारनाप जक संघर्ष यानाच्वंगु मखुकि अमेरिकाया सेना नापं नं संघर्ष याना वयाच्वन ।

अफगानया गृह युद्धया कारणं यानाः अफगानया धनजन जक नाश ज ुयाच्वंगु मखु, अमेरिकाया सेना व हतियार नं यक्व नाश जुयाच्वंगुलिं यानाः अमेरिकाया अर्थतन्त्रय् तक नं नकारात्मक असर लानाच्वंगु दु । थ्व हे कारणं यानाः अमेरिकाया राष्ट्रपति ट्रम्पं पाकिस्तान सरकारयात अफगानय् शान्ति वातावरण हयेगु लागि भूमिका म्हिते माल धकाः अनुरोध यात ।

न्हापा राजाया शासनया इलय् अफगानिस्तानया जनतात शान्ति व आनन्दं जीवन हनाच्वंगु खः । जब अफगानया राजातय्सं अंग्रेजतय्गु आज्ञा पालना मयात धकाः सन् १९२९ साल पाखे राजा अमानुल्लाह फ्रान्स, जर्मन व इटालीया भ्रमणय् वंगु इलय् अंग्रेजतय्सं माक्व ध्यबा खर्च यानाः दलाल अफगानी नेता व कार्यकर्तात गांगामय् छ्वयाः प्रचार याकल, ज नताया राजा व राजनी मोजमस्ति याः वन ।

युरोपया राजनीति नं इलय् ब्यलय् परिवर्तन जुयाच्वं । युरापय् प्रजातन्त्र व्यवस्थाया राजनीति यक्व दँ दँ तक चले जुल । प्रजातन्त्रय् नं पूँजीपतित झन झन सम्पन्न जुजुं वनाच्वनसा बहुसंख्यक जनताया आर्थिक अवस्था परिवर्तन मजू

थज्याःगु प्रचारं यानाः राजाप्रति जनतां घृणा यात । अझ थुलि जक मखु दलाल नेतातय्त ल्हातय् कयाः राजाया विरुद्ध विद्रोह याकल । आखिरय् राजाया अन्त यायेगु खेल सफल याकाः दलाल नेता नादिर खानयात सत्ताय् छ्वयेगु ज्या यात । व इलंनिसें अफगानया हालत स्यना वनाच्वंगु खः ।

दलाल व स्वार्थी नेतात देशया लागि भस्मासुर खः धयागु प्रमाण अफगानया घटनां नं प्रस्ट यानाबिल ।युरोपया राजनीति नं इलय् ब्यलय् परिवर्तन जुयाच्वं । युरापय् प्रजातन्त्र व्यवस्थाया राजनीति यक्व दँ दँ तक चले जुल । प्रजातन्त्रय् नं पूँजीपतित झन झन सम्पन्न जुजुं वनाच्वनसा बहुसंख्यक जनताया आर्थिक अवस्था परिवर्तन मजुल ।

बहुसंख्यक जनताया जीवनस्तर सुधार मजूगु कारणं यानाः प्रजातन्त्त प्रतियात हे अविश्वास यायेगु सुरु यानाहल । जब बहुसंख्यक जनतां प्रजातान्त्रिक व्यवस्थायात हे अविश्वास यानाहःगु कारणं यानाः हानं राष्ट्रवाद व नव राष्ट्रवादया राजनीति सुरु जुल । राष्ट्रवादया नारा ज्वनाः इम्मानुअल म्याक्रें नं फ्रान्सया राष्ट्रपति जुइत सफल जुल ।

म्याक्रों चुनावया इल्य् क्रान्तिकारी परिवर्तन हयाः राष्ट्रया विकास उच्च यानाः बहुसंख्यक जनताया कल्याण यायेगु धकाः बचन बियावःगु खः । म्याक्रों राष्ट्रपति जुइत सफल ला जुल, तर सामाजिक न्याय बीगु खँय् ध्यान त्वःताः पूँजीपतितय्त अप्वः सुविधा बिइगु लागि करय् भारी छुट यानाबिल । अथे धयागु पूँजीपतितय्त झन अप्वः सम्पन्न जुइगु मौका बिल ।

बहुसंख्यक साधारण जनतायात धाःसा राहत मखु आहत बिइगु ज्या यात । अथे धयागु विद्यार्थी व न्यून आय दुपिं जनतायात बियातःगु सहुलियतय् रोक यानाबिल । राष्ट्रपति म्याक्रों सुधार ला यात, तर धनी वर्गयात झन धनी यायेगु, गरिब जनतायात झन गरिब यायेगु ज्या जक यात ।

राष्ट्रपतिया ज्या खनाः जनता दिक्क जुयाच्वंगु इलय् हानं इन्धनया चर्काे भाः वृद्धि यानाः अझ जनताया आर्थिक स्थिति झन डाँवाडोल यानाबिल । थ्व हे कारणं यानाः फ्रान्सया बहुसंख्यक जनता सतकय् कुहां वयाः सरकारया विरुद्ध चर्को आन्दोलन यात । आन्दोलनया रुप छु जुइगु खः स्वयेगु ल्यं दनि ।

भारतय् नं न्यागू राज्यय् जूगु चुनावया लिच्वः कथं भाजपा पराजित जुल । मध्यप्रदेश, राजस्थान, छत्तिसगढय् कांग्रेस पार्टी विजय प्राप्त यातसा मिजोरम व तेलगनाय् क्षेत्रीय पार्टीत विजय जुल । भारतय् नं फ्रान्सय् थें सुधार कार्यक्रम धकाः पूँजीपतितय्त झन झन धनी यायां यंकाच्वनसा किसान, मजदुर व मध्यम वर्ग जनतायात ध्यान बीगु त्वःतूगु जक मखु, अझ किसान व मजदूरयात झन झन समस्या अप्वयेका यंकाच्वंगुलिं यानाः भाजपा खनाः जनता वाक्क दिक्क जुयाच्वंगु खः ।

मेगु कारण खः, भाजपाया उच्च नेतातय्सं राष्ट्रवादया चर्को नारा यानाच्वनसा मेखे हानं धर्मया नामं राजनीति यानाच्वंगु नाः नं जनता दिक्क जुया च्वनेत बाध्य जुल । जनतां थथे नं धायेगु सुरु यात अयोध्याय् राममन्दिर निर्माण जुल कि जनताया गरिबी समस्या समाधान जुइगु खः ला धकाः नं न्ह्यसः थनेगु सुरु यानाच्वंगु दु ।

अथे धयागु जनतायात धार्मिक मुद्दा मखु, आर्थिक मुद्दा् ध्यान बियाः जनतां समस्या समधान याना वनेमाल धायेत्यंगु खः । अमेरिकाय् डोनाल्ड ट्रम्प राष्ट्रपति जुइत सफल जूगु कारण खः मध्येम वर्गया जनतां साथ बिउगुलिं । छाय्धाःसा चुनाव प्रचारया क्रमय् थथे धायेगु यानाच्वन– सरकारपाखें अप्वः फाइदा कयाच्वंपिं धनि वर्गत खः ।

सरकारं नं धनि वर्गया खँ न्यनाः मध्यम वर्ग व निम्नवर्गयात बेवास्ता यानाच्वनी । मेगु खँ नेतां निसें कर्मचारीतन्त्रं पेन्सन निसें अनेक सुविधा कयाच्वनी । थुकिया अर्थ छु धाःसा आर्थिक रुपं सम्पन्न जुयाच्वंपिं नेतात व उच्च अधिकारीतय्त छाय् अप्वः आर्थिक सुविधा बीमाल, उमित अप्वः आर्थिक सुविधा बियाच्वंगुलिं यानाः देय्या आर्थिक क्षेत्रय् नकारात्मक असर लानाच्वंगु खँ नं ट्रम्प धयाच्वनी । हान. मेगु खँ देशय् बेरोजगारी बढे यानाः छाय् बेरोजगार भत्ता बीमा धकाः नं न्ह्यसः थनाच्वनी । वास्तवय् ट्रम्पया भनाइ सत्य खः ।

 

सम्बन्धित बुखँ

LEAVE YOUR COMMENTS