नखः हनेगु नामं नेवाःतय् दथुइ विभाजन जुइके मजिउ

कतिपुन्हि व सिघः पुन्हि धायेबलय थौं खुन्हु व कन्हय् खुन्हु लाः वः । अले स्मृति पुराण माने याइपिं सर्वसाधारण स्मार्त व वैष्णव धर्म ग्रहण यानातःपिनि एकादसि नं निन्हु हे लाः वः । परम्पराय् सुर्यो दयनं वेध मयाःगु शुद्धा तिथि व वेध यायेधुंकूगु बद्धा तिथि धकाः माने यानावयाच्वंगु दु । गन तक नखः चखः हनेगु सवाल दु, नखःचखः व सम्बन्धित कर्मया सिद्धान्तकथं हे गुगु भिं धइगु नं ल्याः दु । थुकी थःथःगु हे सिद्धान्त नं दइ ।

नेपालय् झीसं सिउकथं सुर्द्यः लूगु इलय् गुगु तिथि लानाच्वन, उगु हे तिथियात बहनीतक हे माने यानाः नखः चखः हनावयाच्वंगु खः । चःह्रे व चापुजाया सवालय् धाःसा सुद्र्यः लुयाः वेध जूगु तिथि मकासें चान्हय् क्यंगु तिथि कायेगु यानावयाच्वंगु खः । सुथय् सापूजा यानाः जक बहनी लक्ष्मी पुजा यानावयाच्वनगु खः, थौंकन्हय् पात्रोय् च्वयाहःथें थौं कुन्हु बहनीइ लक्ष्मीपुजा यानाः कन्हय् खुन्हु सुथय् सापुजा याःगु सिउगु खँ मखु । तर धर्मसिन्धु व निर्णयसिन्धु घइगु सफू ब्वनावया धाइपिसं सुद्र्यः लूगु तिथिया ल्याः मतसें गुगु इलय् गुगु कर्म यायेगु खः, उगु कर्मय् सम्बन्धित तिथि दयेमाःगु ल्याखं नखःचखःया निर्धारण यानाबिल । थुकिं यानाः नेवाः समाजय् हे गुगु विभाजन खनेदत व दुःखद् खँ खः ।

खतुं मैथिल समाजय् व्रतपर्वया निर्धारण यायेगु थःगु पद्धति व सिद्धान्तया सफू खनेदु । उकथं हे नेवाः समाजय् नं दयेमाःगु खः, तर आःतक सुनां नं पितहःगु वा दु धकाः धाःगु मदुनि । नेपालय् व्रतपर्व निर्धारण याइगु आधिकारिक संस्था पञ्चाङ्ग निर्णायक समितिया नेवाः ज्योतिषीत नं व हे धर्मसिन्धु व निर्णयसिन्धुया लिउने ब्वाँय् वंगु खनेदु । थुकिं यानाः नं नेवाः समाजय् विभाजन हयेगु नितिं ग्वाहालि जूवंगु दु। थगुने थ्व विषयस येँ व यलया दथुइ जक विभाजन वल धाःसा आः हिन्दू व बौद्ध नेवाः धइगु ल्याखं नं विभाजन वइगु खतरा पिदनाच्वंगु दु ।

थगुने विवाद तच्वःसेंलि पात्रो पिकाइपिं व पञ्चाङ्ग निर्णायक समितिया मनूतसें नेवाःतय्गु विशिष्ट मान्यता दुसां जिमिसं आकिवं पात्रो पिकायेबलय् न्ह्यथनाबी धकाः तकं न्ववाःगु खः । तर नेवाःत पाखें हे थुकिया फलो अप मजूगु झी नेवाःतय्गु हे कमजोरी खः । अथे जूगुलिं विवाद जक पिथनाच्वनेगु स्वयाः माःगु पहलकदमी थौंया आवश्यकता खः ।

निभाःद्यः लूगु इलय्या तिथि माने यायेगु लाकि  गुगु इलय्या कर्म खः, उगु इलय् हे तिथि दुगु इलय् कर्म यायेगु धइगु विषय वस्तुतः गुगु सिद्धान्त नालेगु धइगु खँ खः । हानं नखः चखः कर्म, संस्कारया ल्याखं नं गृुगु भिं धइगु खँ नं दु। अले निभाः द्यः लूगु इलय् या तिथिया ल्याः तइपिं मध्ये नं निभाःद्यः लुइधुंकाः निघौ दुसा माने यायेगु, प्यघौ दुसा माने यायेगु मखुसा माने मयायेगु धाइपिं नं दु । थ्व ल्याखं स्वयेबलय् थुगुसी स्वन्ति चःह्रे कार्तिक २९ गते सन्चवाः सुथय् निभाःद्यः लुइधुंकाः १८ घौ, २९ पला दु । ६० घौया २४ घण्टाया ल्याखं हिसाब यायेबलय् न्हिनय् १ बजे जुयाः ४९ मिनेट वंकाः तक दु धकाः पात्रोय् क्यनातःगु दु। थुकथं मध्यान्ह जुइधुंकाः अपरान्हया छुं ईतक नं चःह्रे दुगु हे जुल । वयांलिउ तिनि आमाइ सुरु जुइ । तर थ्व शुद्ध आमाइ खः, न्हिया आमाइ मखु। अनंलि कार्तिक ३० गते आइतवाः खुन्हु आमाइ सुर्द्यः लुइधुंकाः १२ घौ ३३ पला दु। सुर्द्यः लुयाः ४ घौतक आमाइ दुसां उगु न्हियात आमाइ माने यायेगु सिद्धान्त नालेगु खःसां थुखुन्हु हे लक्ष्मीपूजा जूवइगु खनेदु। विशुद्ध तिथि जक माने यायेगु खःसा जक न्ह्यथु खुन्हु यायेमाल । वास्तवय् आमाइपत्तिकं सनां (स्नान) व दान याइपिसं थुख्ुन्हु हे यायेगु धकाः नं पात्रोय् क्यनातःगु हे दु ।

थुकथं हे मंसिर १ गते सोमवाः खुन्हु कौलाथ्व पारु तिथि सुद्र्यः लुइधुंकाः ६ घौ ५३ पला दु धाःसा मंसिर २गते कौलाथ्व दुतिया तिथि सुद्र्यः लुयाः १ घडी ४१ पला जक दु। थुकथं स्वयेबलय् विवाद जूसा किजापुजाया जक विवाद जुइमाःगु खः । न्हूदँ कायेबलय् सुद्र्यः लूगु ईयात हे काइगु जूगुलिं थुकी सुनां नं विवाद यानाच्वंगु मदु। खेलुइताः स्वयाः दच्छि तकया बांलाःगु व बांमलाःगृु दशा अवस्था सीदइ धइगु नेवाः मान्यता स्वयेबलय् न्हूदँ व म्हपुजा सम्बन्ध स्पष्ट खनेदु। अथे खःसा झीगु न्हूदँ ११४० दँ जक पुलांगु खःला? धइगु नं न्ह्यसः पिदनेफु। थुकी कालगणना यानाः न्हूदँ हनेगु चलन गुगुं संवत् वयेगु सिकं न्ह्यःया हे खः । संवत्या अधीनस्थ कालगणना मखु, कालगणना पुलांगु खः, न्हूदँ नं पुलांगु खः । अथे जूगुलिं म्हपूजा यायेगु सवालय् झीसं बहनीया पारु तिथि मालेगु जुइमखु, न्हूदँ खुन्हु हे यायेगु पाय्छि जुइ । थुकी १ सुर्द्यः लुयाः बागू पला जक पारु दुसां उखुन्हु हे यायेगु पाय्छि जूवइ । गन तक लक्ष्मीपूजाया सवाल दु, थ्व नं सालतमामी नाप स्वानाच्वंगु खनेदु । मखुसा गुलिगुलिसिनं ला कतिं पुन्हि वा कोजाग्रत पुर्णिमा खुन्हु लक्ष्मीपुजा याइ ।

किजापुजाया नां हे यमद्वितीया खः । थ्व यमराज व वया केहेँ यमुना नाप स्वाःगु बाखंलिसे स्वापू दु । को धइम्ह यमराजया दूत, खिचा धइम्ह यमराजया पाले अले यमद्वितीया खुन्हु केहेँम्ह यमुनां काःगु वचन कथं किजापुजा याइगु जुल । थुकथं यमराज व यमुनाया बाखं नाप स्वाःगु धइगु ला थुपिं स्वता जक जुल । कृष्णं गोकुलवासीतय्त इन्द्रया विरुद्ध विद्रोह याकूबलय् इन्द्र तं चायाः वाफय् वयेका बिउगुली कृष्णं गोबद्र्धन पर्वत ह्वनाः वाफसं गोकुलवासीतय्त बचे याःगु जूगुलिं गोबद्र्धन पूजा याइगु खः । अथे जूगुलिं थ्व नं यमराज व यमुनाया बाखं नाप स्वाःगु खँ मखु। वास्तवय् नखः चखः हनेगुली लिउने दयाच्वंगु बाखं स्वयाः उगु नखःया मान्यता, सिद्धान्त इत्यादि थुइका कायेफइ । पर्व व उत्सव खत धाःसा
निभाःद्यः लूगु ईया तिथि हे कायेगु पाय्छि जूवइ । गुगुं धार्मिक सिद्धान्त, तन्त्र आदि नाप स्वाःगुृ खःसा उगु सिद्धान्तकथं यायेगु पाय्छि जुइ ।

थुगु च्वसुया च्वमि गुम्हं विज्ञ मखु, थ्व ज्या विज्ञपिनिगु हे खः । अले विज्ञपिन्त मुंकेगु ग्वसाःया भाला नेवाः अभियन्तापिनिगु खः । नेपाल सरकारं थगुने नं नेवाःतय्त किजापुजाया बिदा धकाः बिउगु खः । थुगुसी नं बिउगु दु। थगुने विवाद तच्वःसेंलि पात्रो पिकाइपिं व पञ्चाङ्ग निर्णायक समितिया मनूतसें नेवाःतय्गु विशिष्ट मान्यता दुसां जिमिसं आकिवं पात्रो पिकायेबलय् न्ह्यथनाबी धकाः तकं न्ववाःगु खः । तर नेवाःत पाखें हे थुकिया फलो अप मजूगु झी नेवाःतय्गु हे कमजोरी खः । अथे जूगुलिं विवाद जक पिथनाच्वनेगु स्वयाः माःगु पहलकदमी थौंया आवश्यकता खः । तर थुगु नामय् नेवाःतय्गु विभाजनयात धाःसा पने हे माः ।

सम्बन्धित बुखँ

LEAVE YOUR COMMENTS