जुजुवादीतय् ‘राष्ट्रवाद’ !

नेपाःया पुलांपिं शाह जुजु व भारतया उत्तर प्रदेशय् लाःगु गोरखनाथ मठया दथुइ पारिवारिक व विशेष स्वापू दु । व हे स्वापूया लिधंसाय् गोरखनाथ मठय् पुलांपिं शाह जुजुपिंत विशेष थाय् बीगु व शाह जुजुतय्सं नं मठयात तसकं महत्व बीगु यानाच्वंगु दु । व हे गोरखनाथ मठया पुजारी योगी आदित्यनाथं ला ज्ञानेन्द्र शाह नेपाःया जक जुजु मखसे १०० गू करोड जनताया हिन्दू सम्राट धकाः तकं धायेगु यानाच्वंगु जुल । प्यदँ न्ह्यः नेपालय् जूगु अन्तर्राष्ट्रिय विश्व हिन्दू सम्मेलनया झ्वलय् वय्कलं नेपाःया पहिचान धइगु हे हिन्दू राजसंस्था, हिन्दू राष्ट्र व हिन्दू जनता खः धकाः धयाथकूगु खः ।

उत्तर प्रदेशया मुख्यमन्त्री जुइ न्ह्यः जूगु उगु सम्मेलनय् ब्वति कयादीम्ह योगी आदित्यनाथं राजसंस्था नेपाःया आवश्यकता खः धासें उकियात पुनःस्थापना यायेत अपिल तकं यानादीगु खः । वय्कलं धयादीगु खः, ‘नेपाःयात छगू नेपाल, श्रेष्ठ नेपाल, सामथ्र्य नेपालकथं न्ह्याकायंकेगु खःसा शाह राजवंशप्रति सम्मानया भाव प्वंकेगु नापं आदर यानाः उगु परम्परायात पुनःजीवित यायेगु प्रत्येक हिन्दूतय् दायित्व खः ।’

छगू सार्वभौम देशय् मेगू देय्या छम्ह पुजारी व राजनीतिक नेता योगी आदित्यनाथ वयाः देय्या आवश्यकताया बारे विवादास्पद संबोधन यानादीगु खः । छुं ई लिपा नेपाःया सिमानाय् लाःगु उत्तर प्रदेशया मुख्यमन्त्री आदित्यनाथ जुइगु जुइवं नेपाःया जुजुवादीत व हिन्दूवादीत तसंक उत्साहित नं जूगु खः । उत्साहित थ्व अर्थय् कि भारतया छगू राज्यया मुख्यमन्त्रीया साथ दत धाःसा थन हाकनं राजतन्त्र पुनःस्थापना यायेफइला, धर्मनिरपेक्ष राज्ययात हीकाः हिन्दू राष्ट्र घोषणा यायेफइला धकाः खः । मुख्यमन्त्री जुइधुंकाः मर्यादाया हिसाबं मेगु देय्या बारे पिने न्ववायेगु अशोभनीय ज्या जुइगु खःसां योगी आदित्यनाथया मनशाय छु खः धइगु प्रष्ट जू । मुख्यमन्त्री जुइधुंकाः नं पुलांम्ह जुजु ज्ञानेन्द्रयात नाप लायेगु, हिन्दू राष्ट्र बारे न्ह्यथनेगु नापं नेपाःया सीमा बारे विवादास्पद खँ पिहां वयाच्वंगु हे जुल ।

जनताया जनआन्दोलनपाखें निर्देशित व जनप्रतिनिधितय् सर्वोच्च संस्था संसदपाखें राजतन्त्रया अन्त्य यायेधुंकूगु अवस्थाय् आम जनताया समर्थन मदयेवं जुजुवादीतय्सं थःगु समर्थनया निंतिं देय् दुने स्वयां देय् पिनेया ‘पावर’ छ्यलेगु कुतः जुयाच्वंगु खत । वहे ‘पावर’ उत्तर प्रदेशया मुख्यमन्त्रीया अभिव्यक्तिपाखें इलय् ब्यलय् वइगु खः । हिन्दूत्वया नामय् राजनीति यानाच्वंगु भारतीय जनता पार्टी व राष्ट्रिय स्वयमसेवक संघ (आरएसएसं) नेपाःयात हिन्दू अधिराज्य व हिन्दू जुजुयात बल बीगु यानाच्वंगु खत । व हे दलनाप आवद्ध योगी आदित्यनाथपाखें वयाच्वंगु अभिव्यक्ति छम्ह व्यक्तिया मखसें भारतया संस्थापन पक्षया नं खः धकाः थुइके फु ।

राष्ट्रवादया खँ केवल विदेशी शक्तितय्सं राजतन्त्र व हिन्दू राज्यया पक्षय् याःगु समर्थनया जक मखु । स्वयम शाह जुजुत गुलि तक राष्ट्रवादी खः, थ्व हे नं छगू विषय खः । सन् १९६२या चीन–भारत युद्ध लिपा नेपाःया कालापानी क्षेत्रय् भारतीय सेनां थःगु उपस्थित क्यंगु खः । नेपाःया भूमिइ भारतीय सेनां क्याम्प दयेकाः च्वनेगु अनुमति स्वयम तत्कालीन जुजु महेन्द्रं बिउगु खः । थुगु विषयय् जानकारतय्सं धायेगु याः कि जुजु महेन्द्रया निजी सामान दिल्लीं छुटे याकेगु निंतिं वय्कलं भारतीय सेनायात नेपालय् च्वनेत स्वीकृति बिउगु खः । थःगु व्यक्तिगत स्वार्थ पूर्तिया निंतिं देय्या भूभागय् जुजुं विदेशी सेनायात थाय् बिउगु खः । थ्व विषय गुलि सत्य खः व खोजया विषय जुइफु । तर छता सत्य खँ छु खः धायेबलय् नेपाःया भूमीइ विदेशी सेनायात च्वने बिउम्ह जुजु महेन्द्र हे खः ।

शाहवंशया इतिहासय् अझ लिउने वनाः स्वयेगु खःसा पृथ्वीनारायण शाहं गुबलय्निसें राज्य विस्तार यात अबलय्निसें नेपाःया राष्ट्रियता कमजोर जूगु व विदेशी हस्तक्षेपया सुरुवात जूगु खनेदु । सन् १८१४–१८१६या युद्धलिपा बेलायतनाप जूगु सुगौली सन्धीं राष्ट्रिय अस्मिताया रक्षा यायेमफुत । वयां लिपा नेपालय् बेलायती रेजिडेन्सीयात स्थायी रुपं तयेगु निर्णयनिसें कयाः नेपाःया मन्त्रिपरिषद्या मुँज्याय् तकं भारतीय प्रतिनिधि च्वनेगु व्यवस्था जुल । सन् १९५०य् नेपाल–भारत दथुइ जूगु शान्ति सुरक्षा सन्धीं नेपाःया सार्वभौमसत्ताय् लाकूगु लिच्वःनिसें कयाः सन् १९६५लय् भारतनाप जूगु हातहतियार सन्धीं यानाः नेपाःया राष्ट्रिय सुरक्षाया विषयय् तकं नेपाः भारतय् निर्भर जुइमाःगु अवस्था वल । थुपिं फुक्कं जुजुतय्सं प्रत्यक्ष शासन यानाच्वंगु इलय् नेपाःया सार्वभौसत्ताय् लाकूगु गम्भीर लिच्वःत खः । नेपाःया स्वाधीनता, अखण्डता व सार्वभौमसत्तायाय् दकलय् अप्वः गुबलें लिच्वः लाःगु दुसा व जुजुतय् शासनया इलय् लाःगु दु ।

आः थन लाक्क नेपालय् हाकनं जुजु माल, हिन्दू राज्य घोषणा यायेमाल धाइपिंत न्ह्यसः – जुजु व हिन्दू राज्यया आवश्यकता नेपाःमियात खः कि विदेशी शक्ति केन्द्रयात ? जुजुवादीतय्सं नकतिनि येँनापं झापा, चित्तवन, रुपन्देही लगायतया थासय् याःगु प्रदर्शन देय्या माग खः कि विदेशीतय् माग ? थःपिंत राष्ट्रवादी धायेगु अले देय् व जनताया जनआन्दोलनं स्थापित याःगु मुद्दा स्वयां प्रतिगामी मुद्दाय् प्रदर्शन यायेगु गुलि तक राष्ट्रवादी खः ? देय्या राष्ट्रिय स्वाधीनताय् गम्भीर लिच्वः लाकूपिं जुजु व राजतन्त्रया पक्षय् आन्दोलन यानाच्वंपिं गुलि राष्ट्रवादी ? देय्या जनताया इच्छा व चाहना स्वयां अप्वः विदेशीतय् इशाराय् चले जुइगु राजसंस्थाया पुनःस्थापना यायेमाः धइगु सः गनं हाकनं वहे विदेशी शक्तिया लिधंसाय् जकं थ्वयाच्वंगु खःला ?

यदि अथे मखसें देय् व जनताया पक्षय् बिचाः यानाः आन्दोलन जुयाच्वंगु खःसा प्रतिगामी माग तयाः मखु देय्या राष्ट्रिय एकता व अखण्डता क्वातुकेग निंतिं अग्रगामी मुद्दा ज्वनाः सतकय् कुहां वःसा बेस जुइ । ‘चिहानमा गएर हड्डि फुक्दैमा लाश फर्किंदैन’ धाःथें सीधुंकूगु संस्था पुनःजीवित यायेगु स्वयां संघीय लोकतान्त्रिक व्यवस्थाय् मगाः मचाःगु मुद्दायात क्वातुकाः देय्यात बल्लाकेगुपाखे आन्दोलित जूसा बांलाइ ।
जुजुवादीतय्सं आः लोकतन्त्र व प्रजातान्त्रिक अधिकारया कुण्ठित जूगु व उकिया निंतिं नं राजतन्त्रया पुनःस्थापना यायेमाःगु खँ नं ल्ह्वनाच्वंगु जुल । लुमंकेमाःगु खँ छु धायेबलय्, जुजुया प्रत्यक्ष शासनया इलय् लोकतन्त्र व गणतन्त्रया नां तकं कायेमदु तर थौं संविधान अःखः राजतन्त्रया माग यानाः प्रदर्शन यायेगु तकं छुट दु । उकिं जुजुया शासनकाल गुलितक लोकतान्त्रिक खः उकिया बारे चर्चा यानाच्वने माःगु मदु ।

अले आःया व्यवस्थाप्रति आस्था तइपिंसं राजतन्त्रया विरोध यानाच्वंगुप्रति जुजुवादीतय्सं चिउताः तयाच्वने माःगु आवश्यक नं मदु । जुजुया प्रत्यक्षया शासनकालय् मनूतय्त अत्यावश्यक फोन व इन्टरनेट थेंज्याःगु आधारभूत सुविधापाखे तकं बञ्चित यानातःगु खः । थौं ‘राजा आउ, देश बचाउ’ धकाः आन्दोलन यानाच्वंपिंसं यदि थःपिं फोन सुविधा व इन्टरनेटपाखें ब्यागलं च्वने फइमखु धकाः धाइसा लोकतान्त्रिक शक्ति स्वयां न्हापां जुजुया शासनया विरोध व हे जुजुवादीत स्वयमपाखें जुयाच्वंगु दु । उकिं नेपालय् हाकनं जुजु गुलि आवश्यक धकाः जुजुवादीतय् व्यवहार स्वयमं धयाच्वंगु दु । मेपिंसं थुकि न्ववनाच्वने माःगु आवश्यकता मदु ।

सम्बन्धित बुखँ

LEAVE YOUR COMMENTS