जलरंगय् सम्पदा क्षेत्र

विश्व सम्पदाया धलखय् दुथ्यानाच्वंगु यलया लाय्कू लागाय् वनाः विदेशी चित्रकारं जलरंग प्रयोग यानाः अनया पुरातात्विक महत्वया किपा आर्ट पेपर (चित्राधार) तयार याःगु दु । न्यूजिल्याण्डया जिनेट वांगं यल लाय्कूया किपा च्वच्वं धयादिल, ‘तसकं ताःहाकःगु अवधितक चित्र च्वये फइगु थाय् दु, थज्याःगु महत्वपूर्ण व ऐतिहासिक थासय् वयाः चित्र च्वये खनाः तसकं लय्ताः ।’

वय्कलं थीथी कोणं क्यामराय् तस्वीर कैद याःगुलिं थःगु देशय् लिहां वनाः नं नेपाःया चित्र च्वया च्वनेगु प्रतिवद्धता प्वंकादिल । चित्रपाखें नेपाःया कला पर्यटनया विकासय् ग्वाहालि जुइगु विश्वास विदेशी चित्रकारतय् दु । इमिसं नेपाः छगू प्राकृतिक रुपय् भिन्नता व विविधता दुगु धासें कला पर्यटनय् तकं नेपाः न्ह्यःने लानाच्वंगु प्रतिक्रिया नं बिउगु दु ।

अन्तर्राष्ट्रिय जलरंग समाजया विश्व अध्यक्ष अतानुर डोगानं नं उगु हे क्षेत्रया किपा च्वच्वं नेपाःया प्राकृतिक दृश्य ल्वःवनापुसे च्वंगु प्रतिक्रिया बियादिल । मंगोलियाया मुख्कु गुगुं मनूतय् ख्वाःपाःया किपालिसें लाय्कू लागाया तस्वीरया दुरुस्त चित्र च्वयादिल ।

भारतया अमित कपुर, बंगलादेशया कौशर हुसेन, अमेरिकाया मिनी भलेरो, न्यूजिल्याण्डया जिनेट वांङ व चीनया जाओ सिन लगायतया विदेशी चित्रकार लाय्कू लागाय् जूगु चित्रकाल कार्यशालाय् सहभागि जुयादीगु खः । इमितं नेपाली चित्रकारतय्सं नं ग्वाहालि याःगु खः । लाय्कूया चित्र च्वच्वं नेपाली चित्रकार सुरेश स्याङतानं येँ व लुम्बिनीया थीथी दृश्यं चित्रकारतय्त आकर्षित याःगु धयादी ।

लुम्बिनीइ ज्याझ्वः सिधयेकाः लिहां वयेधुंकूपिं देश व विदेशया ४० म्ह स्वयां अप्वः चित्रकार यलया लाय्कू लागाय् थ्यंकः वःगु खः । थन मौलिक कलाशैलीया आकर्षक देगः व थीथी बुट्टा कियाः दयेकातःगु लाय्कू दु ।

नेपाली नापं थ्यंमथ्यं पीम्ह चित्रकारतय् सहभागिताय् जूगु स्थलगत चित्रकला कार्यशालाय् चित्रकारं लाय्कू लागाया ‘ल्याण्डस्केप’ तयार याःगु खः । इमिसं चित्र च्वयाच्वंगु इलय् अन चाःहिउ वःपिं पर्यटक व स्थानीयवासीं नं इमिगु सृजनायात अभिरुचिपूर्वक अवलोकन याःगु खः ।

अन्तर्राष्ट्रिय जलरंग समाज नेपालया ग्वसालय् जूगु ‘अन्तर्राष्ट्रिय जलरंग महोत्सव व बृहत चित्रकला प्रदर्शनी’ अन्तर्गत लुम्बिनीइ ज्याझ्वः सिधयेकाः लिहां वयेधुंकूपिं देश व विदेशया ४० म्ह स्वयां अप्वः चित्रकार यलया लाय्कू लागाय् थ्यंकः वःगु खः । थन मौलिक कलाशैलीया आकर्षक देगः व थीथी बुट्टा कियाः दयेकातःगु लाय्कू दु ।

भुखाचं दुगु देगः पुनःनिर्माणया ज्या नं न्ह्यानाच्वंगु दु । चित्रया माध्यमं नेपाःया कला पर्यटनया विकास यायेगु मुख्य लक्ष्य महोत्वया जूगु धासें अन्तर्राष्ट्रिय जलरङ समाज नेपालया महासचिव दीपेन्द्रमान बनेपालीं नेपाल भ्रमण वर्षयात तकं थुकिं ग्वाहालि यायगु विश्वास प्वंकादिल ।

थन वयाच्वंपिं विदेशी चित्रकारं नेपाःया महत्वपूर्ण क्षेत्रया चित्र थःथःगु देशय् वनाः प्रदर्शन यायेगु व क्यनीगु जूगुलिं कलाया माध्यमं नेपाःया पर्यटन ख्यःया विकास जुइगु अपेक्षा याःगु दु । येँया नेपाल कला परिषदय् थ्व हे १७ गतेनिसें ३८ गू देय्या २७० चित्र ब्वज्या याःगु दु । आइतवाः क्वचाःगु चित्रकला कार्यशाला अन्तर्गत थ्व स्वयां न्ह्यः चित्रकारत लुम्बिनी वनाः स्थलगत चित्रकलापाखें कार्यशालाय् सहभागि जूगु खः ।

लुम्बिनीया शान्तिभूमि (भगवान गौतमबुद्धया जन्मस्थलं) चित्रकारंतय्त गाक्कं प्रभावित याःगु खः । इमिसं मायादेवी देगः लगायत थीथी क्षेत्रया १०० पाः स्वयां अप्वः चित्र च्वःगु खः । चित्रमध्ये उत्कृष्ट १५ पाः चित्र छनोट यानाः महोत्सवया लसताय् चित्रकारयात सम्मान व ट्रफी नं लःल्हायेगु ज्या जूगु महोत्सवया संयोजक एनबी गुरुगं कनादिल ।