ने. सं. ११४४ ञलाथ्व दशमी -

शंखधर प्रतिष्ठानया भवन उलेज्यालिसें हस्तान्तरण

थिमि (नेपालभाषा टाइम्स) – थनया मध्यपुर थिमि नगरपालिकाय् दयेकूगु शंखधर सामुदायिक भवन उलेज्यालिसें हस्तान्तरण ज्याझ्वः जुल । वंगु ने.सं. ११४१ कछलाथ्व दशमि, शंखधर दिवसकया न्हिकुन्हु लाकाः उगु भवनया उलेज्यालिसें हस्तान्तरण याःगु खः ।

मध्यपुर थिमि नगरपालिकाया प्रमुख मदनसुन्दर श्रेष्ठया सभापत्विय् जूगु ज्याझ्वःया मूपाहां येँ महानगरपालिकाया प्रमुख विद्यासुन्दर शाक्यं भवनया उलेज्या यानादीगु खः । मध्यपुर थिमि नगरपालिकाया ग्वसालय् जूगु ज्याझ्वलय् नवासें मूपाहां येँ मनपा प्रमुख शाक्यं च्वसापासापाखें शुरु जूगु नेपाल संवत्या सांस्कृतिक आन्दोलन थौंया इलय्तक थ्यंगु अवस्थाय् सरकारपाखें नेपाल संवत्यात राष्ट्रिय संवत्या मान्यता बीगु व नेपाल संवत्या प्रवर्तक शंखधर साख्वाःयात राष्ट्रिय विभूति घोषणा यायेगु ज्यां थ्व संवत् विवादरहित जूगु खँ न्ह्यथनादिल । लिसें वय्कलं आः नेपाल संवत्यात व्यावहारिक रुपं छ्यलाबुलाय् हयेत अध्ययन अनुसन्धानया ज्यायात निरन्तरता बीमाःगु खँय् नं बः बियादिल ।

विशेष पाहांया थासं बागमति प्रदेशया सांसद डा. राजेन्द्रमान श्रेष्ठं नेपाल संवत्यात महत्वयात पाठ्यक्रमय् जक सीमित मयासे व्यावहारिक रुपं नं छ्यलाबुलाय् हयेमाःगु खँय् बः बियादिल । नेपाल पत्रकार महासंघ ख्वप जिल्लाया अध्यक्ष पुष्करराज बुढाथोकीं नेपाःया मौलिक संवत्कथं स्वीकार याःगु नेपाल संवत् व्यावहारिक रुपं छ्यलाबुलाय् हयाः शंखधर साख्वाःया विषयय् अझ खोज अनुसन्धान यायेमाःगु खँ कनादिल ।

नगरपालिकाया उपप्रमुख अञ्जनादेवी मधिकःमिं लसकुस यानादीगु ज्याझ्वलय् शंखरापुर (सक्व) नगरपालिकाया प्रमुख सुवर्ण श्रेष्ठ, सूर्यविनायक नगरपालिकाया उपप्रमुख जुना बस्नेत, नेपाली कांगे्रस जिल्ला सभापति सुरेन्द्र श्रेष्ठ, नेकपा जिल्ला अध्यक्ष बच्चन देउजा, ज्याझ्वःया व्यवस्थापन याःगु राष्ट्रिय विभूति शंखधर साख्वाः प्रतिष्ठानया नायः चन्दनकृष्ण श्रेष्ठ लगायतं भिंतुना देछानादीगु खः ।

थनिं दछि न्ह्यः जग स्वनाः निर्माण याःगु शंखधर प्रतिष्ठानया उगु सामुदायिक भवन छगू करोड न्यय्गू लाख लागतय् निर्माण जूगु भवन निर्माण उपभोक्ता समितिया संयोजक श्यामकृष्ण मानन्धरं ‘नेपालभाषा टाइम्स’ जानकारी बियादिल । वय्कलं बियादीगु जानकारीकथं भवन निर्माणया निंतिं मध्य्पुर थिमि नगरपालिकां ९० गू लाख व सांसद विकास कोषपाखें ५० गू लाख तका ग्वाहालि याःगु खःसा प्रतिष्ठानया १० गू लाख यानाः छगू करोड न्यय्गू लाखं उगु भवन निर्माण यायेगु ज्या जूगु खः ।

लकडाउनया इलय् नं नियमित रुपं निर्माणया ज्या जूगुलिं हे दछिया दुने भवन निर्माण पूवंगु वय्कलं कनादिल । प्यतँत्या जाःगु उगु भवन उलेज्या लिसें नगरप्रमुख श्रेष्ठं प्रतिष्ठानया नायः श्रेष्ठयात भवन हस्तान्तरण नं यानादीगु खः ।