विषादी परीक्षण यायेत आदेश

विषादी परीक्षण दिकेगु निर्णय विरुद्ध प्रदर्शन

येँ – सर्वोच्च अदालतं नेपालय् आयात जुइगु तरकारी व फलफूलय् विषादी परीक्षण यायेम्वाः धकाः मन्त्रिपरिषदं याःगु निर्णय कार्यान्वयन मयायेत अन्तरिम आदेश बिउगु दु । न्यायाधीश डा. आनन्दमोहन भट्टराईया एकल इजलासं थ्व आदेश बिउगु खः । उद्योग वाणिज्य तथा आपूर्ति मन्त्रालयं असार २ गते नेपालय् आयात जुइगु तरकारी व फलफूलय् विषादी परीक्षण यायेगु कथं ‘निकासी पैठारी सम्बन्धी आदेश’ राजपत्रय् पिथंगु खः ।

भारतीय दूतावासं उकिया विरोध यायेवं १८ असारय् सरकारं तयारी मगाःगु धासें विषादी परीक्षण यायेगु निर्णय लित काःगु खः । उकिया विरोधय् सर्वोच्चय् रिट दायर जूगु खः । सर्वोच्चं थ्व विषयय् रिट निवेतःपिं व विपक्षी सरकार निगुलिं पक्षयात सहलह यायेत सःतूगु दु । सहलहपाखें क्वःमजिउ तले विषादी परीक्षण यायेगु निर्णय लित मकायेत नं आदेश बिउगु दु ।

थ्वहे झ्वलय् तरकारी व फलफूलय् विषादी परीक्षण मयायेगु सरकारी निर्णय विरुद्ध थौं बहनी नेपाली कांग्रेसया भातृ संगठन नेवि संघं मसाल
जुलस पिकाइगु जूगु दु । लिसें कन्हय् माइतीघर मण्डलाय् प्रदर्शन यायेगु ज्याझ्वः नं क्वःछिनातःगु दु । विषादी परीक्षणया विरुद्ध म्हिगः नेवि संघं प्रधानमन्त्री केपी शर्मा ओलीया पुत्ला नं च्याकूगु दु ।

नेपाःया तरकारी नं विषालु
भारतं दुहां वइगु तरकारी व फलफूलय् विषादी परीक्षण यायेमाः लाकि म्वाः धइगु विवाद पिहां वयाच्वंगु इलय् विज्ञतय्सं धाःसा स्वयम् नेपालय् हे उत्पादन जुइगु तरकारी व फलफूलय् तकं विषादी दुगु खँ धयाहःगु दु । उकिं भारतीय जक मखु नेपाःया हे तरकारी व फलफूल प्रयोग यायेत तकं सतर्क जुइमाःगु सुझाव उमिसं बिउगु दु ।

तरकारी नयेबलय् उकी दइगु विषादीयात कम यायेगु खःसा हितिं तःधाः जुइक हायाच्वंगु लखय् स्वक्वः तक सिला बिल धाःसा तरकारीइ दइगु विषादी ५० निसें ६० प्रतिशत तक च्वला वनीगु खँ विज्ञतय्सं धाःगु दु । अथवा बजारं न्याना हःगु तरकारीयात चि व लखय् १०–१५ मिनेट तक तया तल धाःसां नं उकी दइगु विषादी ५० प्रतिशत तक म्हो जुया वनीगु खँ धाःगु दु ।

१ लिटर लखय् छगू चम्चा चि तयाः सिलेगु खँ धाःगु दु । फलफूलयात नं अथे हे चि व लखय् सिला छ्वत धाःसा उकी दुगु विषादी म्हो जुया वनी । लिसें फलफूल नयेबलय् फयांफछि ख्वला मनसे वांछ्वया बीगु खँ नं धाःगु दु । अथे हे तरकारी व फलफूल नयेबलय् सदां छगू हे जक तरकारी मनयेगु व अफ सिजनया फलफूल नं मनयेत उमिसं सुझाव बिउगु दु ।

सम्बन्धित बुखँ

LEAVE YOUR COMMENTS