वा वयाः सन्त्रासी खेती स्यंकल

बनेपा – काभ्रेपलाञ्चोकया किसानत बांलाक सन्त्रासीं मसःगुलिं चिन्तित जूगु दु । सन्तरासी माय् स्वां ह्वाः सि सयेमाःगु इलय् वा वयेगु लिसें पु गाःगुलिं बांलाक सन्त्रासी मसःगु खँ धाःगु दु । पनौती नगरपालिका १० शंङ्खु थापागाउँया किसान केदारबहादुर थापां थगुने स्वयां थुगुसी म्हो जक सि सःगु खँ कनादिल ।

२०३८ साल निसें सन्तरासी खेती याना च्वंम्ह वय्कलं दँय् न्यागू निसें न्हय्गु लाख तका तकया सन्त्रासी मिइगु याना वयाच्वंगु खः ।स्याङजा निसें सन्त्रासीया मा हयाः व्यावसायीक खेती यानाच्वंम्ह थापां २१ रोपनी जग्गाय् सन्त्रासी खेती याना वयाच्वंगु दु । थगुने वय्कलं साढे ३ लाखया सन्त्रासी मियागु खँ कनादिल ।

स्वदँ न्ह्यव खुगू लाख तकया सन्त्रासी मिउम्ह थापां थुगुसी अप्वः सन्त्रासी सइगु इलय् हे वा वःगुलिं यक्व सि कुतुं वंगु खँ कनादिल ।वय्कःया कथं भुखाय् ब्वसां निसें सन्त्रारी सइगु म्हो जुया वंगु खः । गुबलें लः मदया, गबलें छु समस्या वयाः सन्त्रासी सइगु म्हो जुयावंगु खँ वय्कलं धयादीगु दु ।

यक्व ल्याखय् सन्त्रासी खेती यानाच्वंम्ह थापां सिमा हे स्वयाः हचुवाभरय् व्यापारीतय्त सन्त्रासी मिइगु याना वयाच्वंगु दु । ‘थुगुसी मियागु मदुनि । आः व्यापारीत वइगु ई जुइधुंकल, तर सि बांलाक लगे मजूनि । व्यापारीतय्सं बांलाक भाः मबिल धाःसा थःम्हं हे मी माली जुइ’ वय्कलं धयादीगु दु ।

अथे हे शङ्खु दाहालटारया मेम्ह किसान देवमाया दाहालं नं सन्त्रासी म्हो जक सःगुलिं थुगुसी आम्दानी नं म्हो जक जुइगु खनेदु धयादीगु दु । वय्कलं नं भुखाय् लिपा थःगु जग्गाय् ला सन्त्रासी हे मसयेधुंकूगु खँ धयादीगु दु । शङ्खुया थापागामय् जक ३५÷३६ रोपनी तक जग्गाय् सन्त्रासि खेती यानाच्वंपिं किसानत दु ।

थनया दाहालटार, थापागाउँ, मकैटार, सुन्थान लगायतया थासय् दँय् छगू निसें छगूत्या करोड तकया सन्त्रासी विक्री जुयाच्वंगु खँ किसानतय्सं धाःगु दु । पनौती नगरपालिकाया कृषि तथा पशुपंक्षी शाखाया मणि सापकोटां धाःसा थुगुसी बांलाक सन्त्रासी सयाच्वंगु खँ धाःगु दु । वय्कलं काभ्रे जिल्लाय् १ हजार ५९७ हेक्टर सुन्तलाय् जातया खेती जुइगुली ७५ प्रतिशत खेती पनौती नगरपालिका दुने हे जुइगु खँ धयादीगु दु ।