चिकुलाया अधिवेशन प्रभावित

सभामुख मदयाः ब्वलंगु समस्या

येँ – प्रतिनिधिसभा थौंकन्हय् सभामुखविहिन जुयाच्वंगु कारणं मंसिरं सःते माःगु चिकुलाया अधिवेशन गबले सःतेगु धकाः अन्यौल पिहां वःगु खँ सीदुगु दु । चिकुलाया अधिवेशन सःताः अनं यायेमाःगु ज्याखँत न्ह्याकेमाःगु खःसां सभामुख हे मदुगु जुयाः थ्व अधिवेशन गबले सःतेगु धकाः अन्यौल सिर्जना जुयाच्वंगु खः ।

प्रतिनिधिसभाया ताल्लाया अधिवेशनय् टेबुल जुयाच्वंगु गुलिखे विधेयकय् आः सहलह यानाः पारित यायेमाःगु आवश्यकता दु । संसदीय नियम कथं गुगु संसदय् उकिया उत्पत्ति जूगु खः उकियात अन हे छलफल यानाः पारित यायेमाःगु आवश्यकता दु ।लिसें छुं न्हूगु विधेयक नं यंकेगु तयारी जुयाच्वंगु दु ।

न्हूगु विधेयक आः तुरुन्त मयंकूसां न्हापा थाति लानाच्वंगु विधेयकय् धाःसा सहलह यानाः पारित यायेमाःगु अवस्था दु । तर सभामुख मदुगु जुयाः थ्व ज्या नं थाति लानाच्वंगु दु । सभामुख मदुगु अवस्थाय् उपसभामुखं जूसां संसद आह्वान याये फइ । आः च्वनीगु अधिवेशनं दकलय् न्हापां न्हूम्ह सभामुख निं ल्ययेमाःगु जुइ ।

तर न्हूम्ह सभामुख ल्ययेगु खँय् आः तक नं सत्तारुढ दल दुने छुं कथं सहमति मजूगु कारणं तुरुन्त अधिवेशन सःते फइगु अवस्था नं मदु । सभामुख ल्ययेगु खँय् सहमति मजुइकं अधिवेशन सःतल धाःसा बैठक बिजनेसविहिन जुइ फइगु जुयाः तुरुन्त अधिवेशन सःतेगु ज्या मजुयाच्वंगु खः धाःगु दु ।

प्रधानमन्त्री विदेश भ्रमणय् वनेगु तयारी जुयाच्वंगु व वयां लिपा हानं स्वन्ति नखः लाःगुलिं थ्वया दथुइ न्हूम्ह सभामुखया बारे बैठक जुइगु सम्भावना मदुगु कारणं यानाः सभामुख ल्ययेगु ज्या नं अझं लिबायेफुगु खँ नं धाःगु दु । प्रम केपी ओली कार्तिक ७ गते अजर–
वैजान भ्रमणय् झाइगु जुयाच्वंगु दु ।

सभामुख ल्यज्या अझं अन्यौल
कृष्णबहादुर महरा सभामुख पदं च्युत जुइवं आः वय्कःया थासय् सु सभामुख जुइ धइगु खँय् सत्तारुढ दल दुने तःधंगु कचवं ब्वलंगु खँ सीदुगु दु । न्हापा तत्कालीन एमाले व माओवादी दथुइ सहमति जुयाः सभामुख माओवादीयात व उपसभामुख एमालेयात बीगु ज्या जूगु खः ।

आः न्हूगु संविधानय् सभामुख व उपसभामुख निगुलिं छगू हे पार्टीयापिं जुइ मजिउ धइगु व्यवस्था दुगुलिं यदि नेकपाया हे सभामुख जुइगु खःसा उपससभामुख पदं शिवमाया तुम्बाहाम्फें राजीनामा बीमालीगु अवस्था वइ । उकिं पुलांगु एमालेया नेतातय्सं तुम्बाहाम्फेयात हे सभामुख दयेके माली धइगु प्रस्ताव न्ह्यःने हयाच्वंगु दु ।

तर पूर्व माओवादीं धाःसा थुकियात स्वीकार यानाच्वंगु मदु । उकिया नेतातय्सं पुलांगु सहमति कथं पूर्व माओवादीयात हे सभामुख पदय् हयेमाः धकाः अडान कयाच्वंगु दु । अथे खःसां उकी सभामुखया उम्मेदवार सु जुइ धइगु धाःसा न्ह्यःने हयाच्वंगु मदुनि । थ्व विषयया कारणं एमाले व माओवादीया पार्टी एकताय् हे लिच्वः याये फइगु खँ समेत धयाहःगु दु ।

सम्बन्धित बुखँ

LEAVE YOUR COMMENTS