जब विमानय् चुरोस त्वनाबिल ………

छगू ई अज्याःगु नं खः कि मनूत न्ह्यागु थासय् नं च्वनाः याउँक चुरोस त्वनाच्वनी । बस, ख्यः, सतक, बजाः आदि थासय् नं धुक्क जुयाः चुरोस त्वनाच्वनीगु खः । तर ईलिसें वःगु न्हू न्हूगु ऐन, कानुन नियम लिपा अज्याःगु प्रवृत्ति नं बुलुहुं बन्द जुया वनसा मनूतय्के नं चेतनाया विकास जुल । उकिं थौंकन्हय् मनूत सार्वजनिक थासय् चुरो त्वने न्ह्यः छपला लिचिली ।

तर बस मखु, हवाईजहाजय् हे सुनानं चुरोस त्वना बिल धाःसा छु यायेगु ? उकिसनं यात्रु मखु चालकदलया हे दुजलं अज्याःगु ज्या याःगु धायेबलय् पत्याः मजुइफु । हङकङनिसें डालियन सहरया निंतिं उडान यानाच्वंगु चाइना एअरया छगः जहाजया को–पाइलटं जहाज उडानया हे झ्वलय् चुरोस त्वना बिल । गुकिं यानाः जहाज आकस्मिक अवस्था थ्यन ।

थम्हं चुरोस त्वनागु यात्रुं सीके मफयेमा धकाः उम्ह को–पाइलटं जहाजया एअर कन्डिसन हे बन्द यानाबिल, गुकिं यानाः लिपा जहाजय् तत्काल अक्सिजनया कमि जुल । अक्सिजनया मात्रा आवश्यकता स्वयां नं क्वय्या तहय् थ्यन । अक्सिजन कमि जुइवं यात्रुतय्सं तयातःगु अक्सिजन माक्स नं त्वःता अल ।

६५०० मिटर उचाइलय् दुगु जहाजया क्याप्टेनं तकं मसीक उम्ह को–पाइलटं चुरोस त्वंगु जुयाच्वन ।लिपा यात्रुतय्त ‘सिल्ट बेल्ट’ कसिक चिइत धासें चालक दलं विमानयात अज्याःगु अवस्थाय् नालेमाःगु उपाय शुरु याःगु खः । अक्सिजन मास्क त्वःतूगु इलय् तकं सुनानं चुरोस त्वंगु सीके मफु । लिपा बन्द जूगु एअर कन्डिसनयात हाकनं चले यानाः पुलांगु हे अवस्थाय् हःगु खः ।