मिस्त याकनं स्कूल वनेखनी– तालिबान

एजेन्सी- अफगानिस्ताया सत्ता कब्जाय् काःगु तालिबानं मिस्तय्त याकनं हे स्कुलय् वनेगु अनुमति बिइगु धाःगु दु । तालिबानया प्रवक्ता जबिल्लाह मुजाहिदं मिस्तय्त स्कुलय् वनेत अनुमति बिइगु व उकिया निंतिं ज्या जुयाच्वंगु धाःगु दु । अफगानिस्तानय् वंगु शनिवाः निसें मिजंतय्गु निंतिं स्कुल चाःगु खः ।

तालिबानया प्रवक्तां थीथी मन्त्रालयया नं घोषणा याःगु दु । तालिबानं घोषणा याःगु मन्त्रालयय् अझ नं मिस्त धाःसा तःगु मदुनि । तालिबानं सत्ताय् वयेधुंकाः महिला मन्त्रालय बन्द याःगु खःसा उकिया थासय् नैतिकता मन्त्रालय दयेकूगु खः । तालिबानं सरकारय् मिस्ततय्त नं तयेगु धाःगु खःसां आतक छगू नं मन्त्रालयय् मिस्ततय्त नियुक्त याःगु मदुनि । अथे हे गैरतालिबानतय्त नं मन्त्री दयेकीगु धाःसां व ज्या नं तालिबानं याःगु मदु ।

तालिबानं न्हापा सत्ताय् दुबलय् मिस्तय्त भेदभावपूर्ण व्यवहार याःगु खः । थुगसी धाःसा तालिबानं मिस्तय्त नं अधिकार बिइगु व आखः ब्वंकेगु धाःगु खःसां व लागु धाःसा याःगु मदुनि ।