जलसमाधीइ नवदुर्गा द्यः

ख्वप – थनिंनिसें नवदुर्गा द्यः समाधीइ च्वनाबिज्याःगु दु । नवदुर्गा द्यवं सछिन्हुया लागिं ब्रम्हायणी कुण्डय् जलसमाधी काःगु खः । कलशं द्यःगणयात साला हःगु वंगु नवमिया कलशं हे आः अन न्या त्वःते धुंकाः स्वलाया लागिं जलसमाधी काःगु खः । नवदुर्गा द्यवं जलसमाधी काइगु धइगु नवदुर्गाया हंसयात जक जलय् तइगु खः ।

उगु ज्या विधिवत रुपं तन्त्रमन्त्र ब्वनाः आचाजुं याइगु खः ।म्हिगः न्हिछियंकं नवदुर्गायात द्यःछेँय् तयाः थीथी कथं विधिवत पूजा यानाः थःगु हे लाछिइ थीथी जंगलया स्वां हयाः पूजा यानाः विधिवत रुपं बहां स्याये धुंकाः द्यः पित हःगु खः । द्यःयात ख्वप देय् चाःहिके धुंकाः लिपा सुजःद्यःमरः त्वालय् फैचा बहां स्यानाः वयां लिपा ख्वाःपाः पाछाया यंकाः तुयुगु कापतं त्वपुनाः सिथं यंकूगु खः ।

सिथं यंकेबलय् सुनानं खंके मजिउ धइगु चलन दु । प्यन्हु न्ह्यः शनिवाः तलेजुइ यंकाः सी जा नकेधुंकूम्ह नवदुर्गायात ख्वप देसय् चाःहिके धुंकाः हाकनं थःगु हे द्यःछेँय् दुहां वनेत वःगु इलय् अन नकिं पाः च्वनाः लुखां दुत मकासें ‘छ सिइधुंकूम्ह जुल, आः थःगु हे थाय् ब्रम्हायणी कुण्डय् हुँ !’ धाइगु चलन दु ।

अथे अन लुखा मचाकेवं थःगु ख्वखना ख्वाः वयेकाः हीमी चायाः ब्रम्हायणीपाखे स्वयाः वनीगु खः । चान्हय् अन मन्त्र ब्वनाः आचाजुया उपस्थितिइ ख्वाःपाः फुक्कं तछ्यानाः ब्रम्हायणी जगातिइ हे सिँपँ तनाः ख्वाःपाः उनाथकूगु खः ।

वइगु मोहनिया नवमिकुन्हु हाकनं आँचा बःजु कर्माचार्यपाखें हे विधिवत रुपं कलशं खुसिं नवदुर्गायात प्रतिस्थापन याइगु चलन दु । ख्वपय् नवदुर्गा द्यः गणया जात्रा पर्व फुक्कं बनमाली वा बनमाला धयातःगु गथु व मालि समुदायं सञ्चालन याना वयाच्वंगु दु ।