मुम्बईया बान्द्रा स्टेशन पिने द्वलंद्वः मनूतय् भीड

येँ – भारतय् मे ३ तारिक तक लकडाउनया ई थप यायेगु घाेषणा याः कुन्हु हे उकीया उल्लंघन याःगु दु । मंगलवाः मुम्बईया बान्द्रा रेल्वेस्टेशन पिने द्वलंद्वः मनूतय् भीड जम्मा जूगु खः । अन जम्मा जूपिं आपालं मनूत प्रवासी मजदुरत जूगु व उपिं थःथःगु गृह जिल्ला वनेदयेमाःगु धासें बान्द्रा स्टेशन थ्यंकः वःगु खः ।

भारतीय प्रधामन्त्री नरेन्द्र मोदीं मंगलवाः सुथय् राष्ट्रया नामय् सम्बोधन यानाः लकडाउनया ई थप यायेगु घोषणा याःगु छुं ई लिपा हे थ्व घटना जूगु खः । वंगु मार्च २४ निसें सुरु जूगु लकडाउनया ई थौं बहनी क्वचायेत्यंगु खः । तर सरकारं लकडाउन हानं थप यायेवं अप्रवासी मजदुरतय्सं छेँय् लिहांवने दयेमाः धासें भीड याःगु खः ।

भीडयात अनं चीकेत मुम्बई पुलिसं छुं ई लाठीचार्ज नं यायेमाःगु अवस्था वःगु खः । आः मुम्बई पुलिसं बान्द्रा स्टेशनय् उलिमछि मनूत गुकथं जम्मा जुल धकाः छानबिन सुरु याःगु दु ।

उखे महाराष्ट्र सरकारया मन्त्री आदित्य ठाकरें थुकीया जिम्मा केन्द्र सरकारं यायेमाःगु धासें ट्वीट याःगु दु । वय्कलं प्रवासी मजदुरतय्त सेल्टर व खाना म्वाःगु धासें उपिं थःथःगु छेँय् लिहांवने चाहेजूगु धयादिल ।

भारतय् कोरोनाया कारणं दकलय् अप्व प्रभावित राष्ट्र महाराष्ट्र खः । अन आः तक २ हजार ३ सय ३७म्ह मनूत संक्रमित जुइधुंकूगु दुसा १ सय ६०म्ह मनूत सीधुंकूगु दु ।