दिल्लीया बसपार्कय् द्वलंद्वः मनूतय् भीड

दिल्ली सरकारं ४ लाख मनूयात सितिकं नकीगु

येँ – कोरोना भाइरसया संक्रमण धमाधम अप्वया वनाच्वंगु जःलाखःला देय् भारतया राजधानी न्हूदिल्लींनिसें उत्तर प्रदेश तक वनेगु लागिं आपातकालीन बस सेवा शुरु याःगु दु । तर बस गयेगु लागिं न्हूदिल्लीया आनन्द विहार बसपार्कय् जूगु भीड खंबलय् धाःसा आः भारतय्को रोनाया बिष्फोट हे जुइगु जकं खः ला धकाः अनुमान याना हःगु दु ।

(छम्ह स्थानीय दिल्लीवासीं सामाजिक सञ्जालय् अपलोड याना हःगु भीडया भिडियो ।)

भारतन्यंकं लकडाउन जुइवं दिल्लीइ हे थानाच्वंपिं द्वलंद्वः मनूतय्सं न्यासि हे वनाः जूसां उत्तर प्रदेश व विहारस्थित थःपिनिगु छेँय् वनेगु कुतः यायेवं उमित उद्धार यायेगु लागिं दिल्लीपाखें १०० गः व उत्तर प्रदेशपाखें २०० गः बस चले यायेगु सहमति याःगु खः । तर बस चले जुइन धायेवं दिल्लीइ थानाच्वंपिं द्वलंद्वः मनूत बस पार्कय् मुं वःगु भीड खंबलय् धाःसा दिल्ली सरकार थारा न्हूगु दु ।

थ्व भीड खनेवं दिल्लीया मुख्यमन्त्री अरविन्द केजरीवालं बस चले याइगु जूसां मनूत पिहां मवँसे थःपिं गन लानाच्वंगु खः छुं न्हि अन हे च्वनाच्वंसा सुरक्षित जुइ धकाः आह्वान यानादीगु दु । थ्व बस चले यायेगु बिचाःयात विहार सरकारं नं विरोध याःगु दु । थ्व भीड खंपिं दिल्लीवासीतय्सं थुकियात ‘याकनं वयेत्यंगु कोरोनाया सुनामी’ धया हःगु दु ।

नेपाःलिसे सीमा स्वानाच्वंगु भारतया थीथी राज्यत मध्ये छगू उत्तरप्रदेश नं खः । न्हूदिल्लीया आनन्द विहार बसपार्कय् करिब निसःम्ह नेपाःमित नं थानाच्वंगु खँ भारतीय सञ्चार माध्यमतय्सं धयाच्वंगु दु ।

थ्वहे झ्वलय् न्हूदिल्ली सरकारं कम आय दुपिं व नये मखनाच्वंपिं दिल्लीया करिब ४ लाख मनूतय्त न्हिं न्हिं सितिकं जा नकीगु जूगु दु । थुकिया लागिं दिल्लीन्यंकं ५६८ गू स्कूल व २३८ गू शेल्टरया व्यवस्था याःगु दु ।

अथे हे दिल्लीया १००० गू पसलं कन्हसंनिसें सितिकं खाद्यान्न इनेगु व्यवस्था नं यायेत्यंगु दु । निश्चित रकमया खाद्यान्न सितिकं इनेगु व उकिया ध्यबा सरकारं पुला बीगु थ्व योजना कथं याकनं हे मेमेगु पसः नं चायेका हयेगु तयारी यानाच्वनागु खँ मुख्यमन्त्री केजरीवालं धयादीगु दु ।

(ने. सं. ११४० चौलाथ्व ४ / वि. सं २०७६ चैत १५, शनिवाः)