झीगु भाय् गुलि पुलां ?–२

दसि व तर्क

२.२ च्वय् वंगु खँ सीदत कि नेपालया शिलालेख आदी झीगु भाषाया प्रयोग जूगु ने.सं. ३५३ (इस्वी १२३३) निसें खनेदु । थ्वयां न्ह्यः दको फुकं संस्कृत भासं च्वया तःगु अभिलेख जक दु । अथे हे ल्हातं च्वया तःगु सफू वा मेगु लिपिबद्ध दसिइ नं स्थिति मल्लयां न्ह्यः नेपाल भाषाया प्रयोग जूगु उस्त खने मदु ।

जिं गन तक स्यू जयस्थिति मल्लयां न्ह्यःया खालि छगू ल्हातं च्वयातःगु सफुली नेपाल भाषाया प्रयोग जूगुदु । व सफू खः बंगालया पण्डित नारायणं १२ गू शदी संस्कृतं च्वःगु हितोपदेशयात ल्ह्ययाः संस्कृत लिसें नेपाल भाषां टिका च्वया तःगु नेपाल सम्बत् ४८१ (इस्वी १३६०) या सफू । थ्व सफू पश्चिम बर्लिनया सरकारी संग्रहालयया Ethnological Museum अन्तरगत संग्रहले दु ।

अत्यन्त बांलाक ल्हातं च्वयातःगु थ्व चिकिचा धंगु सफूचा जम्मा ९६ पौ, छगू पती ५ झो च्वया तःगु दु । थ्व सफूया उल्लेख प्रो. अगष्ट कनरेडीं थःगु ‘Das Newari धैगु (इस्वी १८९१) लेखेछ याना दीगु दु । अनंली डा. हायन्स् योरगनशेनं वेकःया नांदंगु A Dictionary of the Classical Newari या पौ ४ सं मिति नापं बिया थ्व सफूया–उल्लेख याना दीगु दु ।

थ्व सफूया निगू पौया किपा (स्टकहोम विश्वविद्यालयया इन्डोलोजीया प्रोफेसर डा. सिग्पे्रmड लीनहार्डया ठ सौजन्यं) थन क्वे बियागु दु ।
9. Newari – Due Pagine du una versione in newari Hitooadesa. Manoscritto datato–1360 d.c.

इस्वी १३६० या हितोपदेशयां ल्यू जुजु जयस्थिति मल्लया पालेया जम्मा स्वंगू सफू नेपाल भाषां च्वया तःगु वा नेपाल भाषा दुथ्याकाः संस्कृतं च्वयातःगु आतक लुयावःगु दु । व स्वंगू सफूत खः (छि) मानव न्यायशास्त्र (ने.सं. ५००–इस्वी १३८०) ।

नारदया न्यायशास्त्र अथवा मनुस्मृतिया विषये नारदया संहितायात जयस्थिति मल्लया मन्त्री जायतया लागि नेपाल भाषां हीका तःगु (स्वया दिसँ— हरिप्रसाद शास्त्रीया A Catalogue of Palm-leaf Manuscripts in the Durbar Library, Nepal, Vol I p 43  ।

अथवा राष्ट्रिय संग्रहालयया धलःपौ १, संख्या १२३ …)(नि) अमरकोष (ने.सं. ५०६, चैत्र कृष्ण, इस्वी १३८६) मन्त्री जायतया काय्यात अमरकोष स्यनेत नेपाल भाषां टिप्पणी च्वया तःगु । केम्ब्रीज विश्वविद्यालयया बौद्ध संस्कृत हस्तलिखित संग्रहे दुथ्याका तःगु ।(प्रो. बेण्डलं थःगु Catalogue of the Buddhist Sanskrit Manuscripts in University Library Cambridgem 9 1883 यापौ १८७ स थ्व अमरकोष सफूया छगू वर्णन थुकथं बिया तःगुदु ।

नापं प सफूया Colophon या छगू उद्धरण नं बिया तःगु दु : “ताडपत्र, १६१ पौ ५ झोः १२ ह् २ इन्च, मिति ने.सं. ५०६ (सन् १३८६) अमरकोष, जयस्थिति मल्लया राज्य काले ख्वपे माणिक्यं च्वयातःगु विवित्रि, नांया नेवाः टीका नं दुथ्यागु ।

कथहं

डा. कमलप्रकाश मल्ल

च्वमिया मेमेगु

• झीगु भाय् गुलि पुलां ?–६
• झीगु भाय् गुलि पुलां ?–५
• झीगु भाय् गुलि पुलां ?–४
• झीगु भाय् गुलि पुलां ?–३
• दसि व तर्क झीगु भाय् गुलि पुलां ?