विश्वास बी माली !
हालय् । झी प्रधानमन्त्रीजुं राष्ट्र संघया महासभाय् संबोधन यासें धयादी, ‘नेपाःया शान्ति प्रक्रिया विश्वया निंतिं हे अनुकरणीय ।’ अखबारय् ब्वने । झसंग वनी । धाथें खःला थ्व ? थःत हे न्ह्यसः तये । प्रधानमन्त्रीं महासभाय् धाःगु खँ ! गथे मखइ ! गय् मखु धाये ? खइ । खइ । पक्का । गर्वबोध जुइ । विश्वया अनेक द्वन्द्वय् फसे जूगु देय्तसें थःथःगु देय्या द्वन्द्व समाधान यायेया निंतिं आः नेपाःयाके सल्लाह काः वइ ।
नेपाःया अमूल्य अनुभव सेयर याः वइ । नेपालं सल्लाह साहुति बी । विश्वय् द्वन्द्व, ल्वापु, युद्ध अन्त्य यायेगु खँय् नेपाःया योगदान प्रभावकारी जुइ । विश्व शान्तिया निंतिं नेपाःया अनुभव वासः जुयाबी । सल्लाह निर्णायक जुइ ।थौंकन्हय् नेपाःया राजनीतिक बजारय् नोबेल शान्ति पुरस्कारया गाइँगुइँ हल्ला ताये दयाच्वंगु दु । नोबेल शान्ति पुरस्कार चिठ्ठा लाइ ।
आशा यानाच्वंपिं नेतात नं दु । विश्वय् हे अभूतपूर्व शान्ति प्रक्रिया सम्पन्न यानाः । विश्वयात नमूना बियाः । उकिं नोबेल शान्ति पुरस्कार थःगु भागय् लाइ । वइ । शान्ति प्रक्रियाय् संलग्न नेतातय् म्हगस थौंकन्हय् तिख्खर जुयाच्वंगु दु । उकिसनं प्रधानमन्त्रीजुं राष्ट्र संघया महासभाय् विश्वया प्रतिनिधितय् समक्ष थःगु देय्या अनुकरणीय शान्ति प्रक्रिया विषय ध्वाथुइकी ।
ध्यानाकर्षण याइ । प्रधानमन्त्रीजुया थ्व ध्यानाकर्षण, दावीं नोबेल शान्ति पुरस्कार कमिटीयात नं जरुर नैतिक रुपं दबाव लाइ । शान्ति प्रक्रियाया अभियन्तातय्त नं जरुर नोबेल पुरस्कार लाइ । आशा याये । प्रधानमन्त्रीजुया दावी सितिं वनीमखु । लुमं लुमं झिकु मन थहां वइ ।
थौंतक । विश्वय् । नेपाःया गौरव, प्रसिद्धि शान्तिया प्रतिक भगवान बुद्धया कारणं च्यानाच्वंगु खः ।
थिनाच्वंगु खः । आः वयाः अनुकरणीय शान्ति प्रक्रियाया प्रवर्तक देय्कथं नं नेपाःया ख्याति विश्वन्यंकं न्यनीगु जुल । धाइ । संसारया अधिकांश मनूतय्सं नेपाः देय्या बारे उलि मसिउ । तर भगवान बुद्धया जन्मभूमि, माउण्ट एभरेष्टया देय् धालकि ‘ए ऽऽऽ !’ धाइगु हँ ! आः प्रधानमन्त्रीजुया संबोधनं यानाः नेपाःयात म्हसीकीगु मेगु नं स्यल्लाःगु त्वह दइगु जुल ।
वंगु नाकाबन्दी भारत व तत्कालीन प्रधानमन्त्री
खड्गप्रसाद ओली दथुइ गोप्य सम्झौताकथं जूगु खः । व अप्रत्याशित, आकस्मिक मखु । पूर्व नियोजित । योजनावद्ध खः । गोप्य राजनीतिक सम्झौताया लिच्वः खः नाकाबन्दी ।
‘अनुकरणीय शान्ति प्रक्रियाया देय्’ धायेबलय् आः विश्वय् अलमल जुइमखुत । म्हसीका छर्लंग जुइगु जुल । ‘धन्य, छिमिगु देय् ।’ नेपाःमितय् परिचय न्यनाः विश्वया मेमेगु देय्या मनूत लय् ताइगु जुल । ‘नेपाःया शान्ति प्रक्रिया बाह्य शक्तिं मखु । देय्या इचछा शक्तिं हःगु खः ।’ प्रधानमन्त्रीजुं महाभासय् थःगु संबोधनय् नेपाःया शान्ति प्रक्रियाया विशेषतायात उली ।
न्ह्यथनी । धाइ । थ्व हे कारणं नं शान्ति प्रंक्रिया विशेष जुइ । अनुकरणीय जुइ । प्रधानमन्त्रीजुं थःगु धापूयात शानपूर्वक प्रष्ट याइ । आः धाथें प्रधानमन्त्रीया संबोधन लिपा राष्ट्र संघया महासभाय् उपस्थित विश्वया अनेक सरकारया प्रतिनिधित विश्वस्त जुल जुइ । नेपाःया अनुकरणीय शान्ति प्रक्रियाया मोडल आः वयाः विश्वया प्रसिद्ध विश्वविद्यालयय् अन्तर्राष्ट्रिय राजनीति विषयया पाठ््यक्रमय् दुथ्याइ ।
थ्व विषयय् चिन्तन मनन्, अनुसन्धानन जुइ । अले ला छु ? विश्वन्यंकंया प्राज्ञिक ख्यलय् नं झीगु देय्या शान्ति प्रक्रिया मोडलं तहल्का न्यंकी । झीगु न्हाय् तपुइ । छखे प्रधानमन्त्रीया पूर्वोक्त संबोधनं विश्वन्यंकं तहल्का न्यकी । तर प्रधानमन्त्रीजुया थ्व संबोधनया दावीं देय् दुने गज्याःगु प्रतिक्रिया थनी ? देय्या जनतां थुकियआत गुकथं काइ ?
प्रमजुया अनुकरणीय शान्ति प्रक्रियाप्रति देसय् छगू हे मत दु ला ? लिसः । मदु । देय् दुने थौं नं गुलिखे दलत दनि, इमिसं अझ नं धयाच्वंगु दु, ‘जनयुद्धया द्वन्द्व अन्त्य मजूनि ।’ युद्ध, द्वन्द्व यथावत तिनि । पक्का । द्वन्द्वात्मक भौतिकवादी माक्र्सवादीतय्सं देसय् वर्ग संघर्ष अझं अन्त्य मजूनि धाइ । अथे हे अनेक उत्पीडित जनतां नं शान्तिया सन्तोष काये मफुनि ।
युद्ध हाकनं हाकनं मानि । जुइतिनि । सः थ्वया हे च्वनतिनि । देय्या जनतां शोषण, असमानता, विभेद फये मात्तले शान्तिया अनुभूति गथे याये फइ । पीडा प्वंका हे च्वन तिनि । देय्या शान्ति प्रक्रियाय् विदेशीतय् ल्हाः द हे मदु धइगु खँय् शंका याइपिं राजनीतिक विश्लेषकत उतिकं दनि । द्वन्द्वपीडित सामान्य जनता अझं अलपत्रतिनि । नेपाःया शान्ति प्रक्रिया विश्वयात शिक्षाप्रद जुृइ ।
ज्ञां इना काये दइ । विश्वयात थज्याःगु आह्वान प्रमं याये न्ह्यः देशवासीतय्त शान्ति प्रक्रिया आम जनताया पक्षय् जुइ, कल्याणया निंतिं जुइ । विश्वास बी माल ।
LEAVE YOUR COMMENTS