धुँ खः ला कि ! छु खः ?

टि.भि. । छगू दृश्य खनी । न्वचु बियाच्वंगु । वक्ता । कमल थापा । खूब जोरदार भाषण । विषय । स्वनिगलय् जुयाच्वंगु सतक विस्तार । श्रोतातय् पुचलय् भूपू प्रधानमन्त्री बाबुराम भट्टराई नं खनी । कमल थापां भूपू प्रधनामन्त्री बाबुराम भट्टराईपाखे स्वइ । संबोधन याइ । धाइ, ‘क्या वात भट्टराईजु ! नेपाःया इतिहासय् राजा महाराजातय्सं याये मफुगु सतक विस्तारया ज्या छिं याना क्यन ।

थुकिं छितः छम्ह बेजोड, ऐतिहासिक पुरुष प्रमाणित याइ । छिगु थ्व महान कार्यया निंतिं छितः न्ह्याक्व प्रशंसा याःसां म्हो जुइ । इतिहासय् थुकिया लागि छिगु नां लुँया आखलं की । धन्य ! धन्य ! भट्टराईजु ।’टि.भि. । कमल थापाया न्वचु न्यने । अजू चाइ ! राजसंस्थाया मिखा तिसिनाः बयान यानाः नयाच्वंम्ह कमल थापा ।

थौं वं एक्कासी छाय् बाबुराम भट्टराईया अन्धाधुन्ध तारिफ यात । राजतन्त्र माल । जुजु पुनर्जीवित याये माल । अझ नं हाला च्वनीम्ह कमल थापां जुजु महाराजातय्त स्वयां च्वय् तयाः बाबुराम भट्टराईया प्रशंसा याइ । पृथ्वीनारायण शाहं एकीकरणयात धकाः पृथ्वीनारायण शाहयात राष्ट्रिय विभूति खंकीम्ह कमल थापा ।

बाबुराम भट्टराईया सतक विस्तार अभियानयात पृथ्वीनारायणया एकीकरण स्वयां च्वय् खंकी । महान तायेकी । बाबुराम भट्टराईयात सिमा गयेकी ।थौं स्वनिगलय् जुयाच्वंगु सतक विस्तार पृथ्वीनारायणया एकीकरण स्वयां तःधं । महान् उपलब्धि खः । बाबुराम भट्टराईयात जुजु महाराजापिं स्वयां गन खः, गन खः, च्वय् खंकी ।

कमल थापा छम्ह राजावादी । राजा महाराजावादी । राजा महाराजातय् ऐतिहासिक भूमिकायात कमल थापां छाय् न्यून खंकल ! स्वनिगः दुने सतक विस्तारया अभियान न्ह्याकाः गुगु अभूतपूर्व साहसी ज्या बाबुराम भट्टराई नं थःगु कार्यकालय् यात उकिया प्रशंसा यायां पलख कमल थापां राजतन्त्र हे ल्वःमंकल ।

जुजु महाराजापिनि तारिफ यानाः गबलें त्यानु मचाःम्ह राजावादी कमल थापां थौं भट्टराईजुयात जुजु महाराजा स्वयां च्वय् खंकी । कारण खः स्वनिगलय् सतक विस्तारया महान कार्यया निंतिं । न्यने । मती तिक्क मिनी । कमल थापाया थ्व छु पहःया राजनीतिक दाउ खः ? राजा महाराजातय् वकालत याना जुइम्ह कमल थापां थौं भट्टराईयात छाय् थथे च्वय् च्वये धायेकेत स्वल ?! पक्का ।

थुकिया दुने छुुं नं छुं राजनीनितक रहस्य दयेमाः । शंका जुइ । अनेक तर्कत लुइ ।थौं राजसंस्था म्वाकेमाल धकाः सः सुक्क हाला जुइम्ह कमल थापा । भट्टराईयात छाय् वं राजा महाराजायात स्वयां नं इतिहासय् छम्ह महान पुरुष खंकल ? थुकिं जुजु महाराजापिनिगु अवमूल्यन मजुइला ? कमल थापा छम्ह राजावादी । राजा महाराजावादी ।

राजा महाराजातय् ऐतिहासिक भूमिकायात कमल थापां छाय् न्यून खंकल ! स्वनिगः दुने सतक विस्तारया अभियान न्ह्याकाः गुगु अभूतपूर्व साहसी ज्या बाबुराम भट्टराई नं थःगु कार्यकालय् यात उकिया प्रशंसा यायां पलख कमल थापां राजतन्त्र हे ल्वःमंकल । राजा महाराजातय्त हे ध्याकुनय् तल । थथे छाय् ! छु रहस्य !

मखु । न्यने दु । कमल थापापिंसं राजतन्त्र पुनःस्थापना यायेगु राजनीतिक अभियान न्ह्याकेत स्वयाच्वंगु दु । तर थ्व खँय् इमित संकट नं वयाच्वंगु दु हँ ! राजतन्त्र पुनःस्थापना यायेगु खःसा आः सुयात जुजु यायेगु ? थ्व न्ह्यसलं राजावादीतय् न्ह्यपु नयाच्वन धाइ । राजतन्त्र वःसा ‘थ्व जुजु जुइ’ धकाः जनताया न्ह्यःने ब्वयेत लायकम्ह शाहवंशय् मनू हे मदु हँ ! मती लुइ ।

शायद कमल थापां याःगु बाबुराम भट्टराईया प्रशंसा गनं थ्व हे संकटबोधया छुमा खः ला ? जनताय् जुजुया उम्मेदवार धकाः क्यनेत ल्वःम्ह व्यक्तिया खोजी खःला कमल थापाया थ्व प्रशंसा ? बाबुराम भट्टराई नं पृथ्वीनारायण शाह थें गोरखायाम्ह । गोखाराय चाय् बूम्ह । गोरखाया हि दुम्ह ।पृथ्वीनारायण शाहं एकीकरणया महान अभियान न्ह्याकी ।

इतिहासय् थःगु थाय् काइ । थौं बाबुराम भट्टराई । सतक विस्तारया महान अभियानया अभियन्ता । युगपुरुष ! कमल थापां शायद जुजुया उम्मेदवारया अभावया पूर्ति बाबुराम भट्टराईयात न्ह्यब्वयाः यायेत स्वःगु खः ला ? बाबुराम भट्टराईयात ह्ययेकूगु ला मखुला ? आधुनिक पृथ्वीनारायण जुइत !

तर कमल थापाया प्रशंसां बाबुराम भट्टराईयात कातुमत्तु कायेका बिउगु दु । बाबुराम भट्टराईनं धुँ जुयाः सतक विस्तार न्ह्याकल । थौंकन्हय् बाबुराम भट्टराईजुं सतक विस्तारं पीडित जनतालिसे छुँ जुयाः एक्यवद्धता क्यनेत स्वयाच्वंगु दु । वय्कः यथार्थतय् धुँ खः ला कि ? छुँ खः ? जनता अन्योलय् ! अन्धकारय् !