चक्रपथ सुधारय् चिनियाँ सरकारया ज्या क्वचाल

येँ – कोटेश्वर–कलंकी सतक दयेके ज्या क्वचाःगु दु । काठमाडौं चक्रपथ सुधार योजनाया इन्जिनियर निरञ्जन शर्मां अर्यालं सतक दयेके ज्या पूवंक क्वचाःगु खँ धयादीगु दु । १०.४ किलोमिटरया थ्व सतक दयेकेगु ज्या चिनियाँ सरकारया ग्वाहालिं चिनियाँ कम्पनी सांघाइ कन्स्ट्रक्सनं याःगु खः ।

सतक दयेके ज्या क्वचायेकाः आः सतकय् चिं तयेगु ज्या जुयाच्वंगु खँ इन्जिनियर अर्यालं कनादीगु दु । सतक चिं तये क्वचायेकाः सरकारयात सतक हस्तान्तरण याइ । सतक दयेकेगु झ्वलय् छगू तहया पिच सिधयेकाः निगूगु चरणया पिच यानागु खँ योजनां धाःगु दु । निगूगु चरणया पिच सिधयेवं सतकं चिं तयेगु ज्या न्ह्याःगु खः ।

मेखे चक्रपथ सुधारय् चिनियाँ सरकारं जिम्मा काःगु ज्या क्वचाःसां नेपाः सरकारं जिम्मा कयातःगु ज्या धाःसा गनं नकतिनि सुरु जूगु दुसा गनं ज्या तकं सुरु याये फयाच्वंगु मदुनि । च्यागू लेन सतक स्वयां पिने निखेरं छगू छगू लेनया सर्भिस ट्र्याक (सेवा सतक) दयेकेगु जिम्मा नेपाल सरकारयागु खः । थ्व ज्या गनं गनं जक सुरु जूगु दु ।

चक्रपथ सुधारय् चिनियाँ सरकारं जिम्मा काःगु ज्या क्वचाःसां नेपाः सरकारं जिम्मा कयातःगु ज्या धाःसा गनं नकतिनि सुरु जूगु दुसा गनं ज्या तकं सुरु याये फयाच्वंगु मदुनि ।

सर्भिस ट्र्याक दयेकेथाय् छेँ टहरा चिइकेमफुगुलिं ज्या यायेमफुगु खँ धाःगु दु । थ्व सतकय् मुक्कं झिगू आकाशे ताँ दयेमाःगु खः । चिनियाँ सरकारं जिम्मा काःगु स्वंपु ताँ जक दयेके सिधःगु दु ।इन्जिनियर आचार्यया कथं नेपाः सरकारं जिम्मा कयातःगु ताँ दयेकेगुली गनं ज्या सुरु जूगु दुसा गनं ठेक्का प्रक्रियाय् दु ।

प्यदँ न्ह्यव थ्व सतक ४० महिना दुने दयेके क्वचायेकेगु कथं दयेके ज्या न्ह्याःगु खः । सम्झौता कथं थगुने हे सतक दयेके सिधयेमाःगु खःसां वि.सं. २०७२ या तःभुखाय् व नाकाबन्दीया कारणं इलय् हे ज्या सिधयेके मफुगु खः । थ्व लिपा सरकारं दछिया ई तनाबिउगु खः ।
थप जूगु ई कथं वइगु डिसेम्बर महिना दुने हे सरकारयात सतक हस्तान्तरण यायेगु कथं चिनियाँ कम्पनीं ज्या न्ह्याकूगु खः ।

थ्व सतकय् लाःगु अण्डरपास लँ नेपाःया हे दकलय् न्हापांगु थज्याःकथंया लँ खः । कलंकीया खसिबजारं निसें बाफः पिचायेकेथाय्या अण्डरपास नं दयेके क्वचायेकाः संचालनय् वयेधुंकूगु दु । थ्व सतक दयेकेत माक्व प्राविधिकत फुक्क चीनं वःगु खः । अदक्ष ज्यामिइ जक नेपाली व चिनियाँ दुथ्याकूगु खः ।

थ्व सतकय् मुख्य लेन, सहायक व सर्भिस यानाः स्वंगू कथंया लेन दु । चिनियाँ सरकारं च्यागू लेन जक दयेकूगु खःसां सर्भिस लेन न्हापां स्वायेबलय् थ्व सतक झिगू लेनया जूवनी । सतकया दथुइ मू लेन व मू लेनया निखेरं सहायक लेन दु ।

चक्रपथ दुहां वनेत सर्भिस ट्र्याक नं दु । गनं दुहां वनेधुंकाः निश्चित थासय् थ्यनेवं जक सहायक व मुख्य लेनय् दुहां वनेफइ ।१०.४ किलोमिटरया थ्व सतकय् ७.६ किलोमिटर येँय् लाःसा २.८ किलोमिटर यलय् लाः ।

 

सम्बन्धित बुखँ

LEAVE YOUR COMMENTS