लुँया भाः अझ हे थहां वन, न्हूगु कीर्तिमानया सम्भावना

येँ (नेपालभाषा टाइम्स)- अन्तर्राष्ट्रिय बजारय् लँुया भाः थहां वनेवं नेपालय् नं उकिया लिच्वः लाःगु दु । म्हिगः नेपाःया लुँ वह बजारय् लुँ तोलां १ लाख ५ हजार थ्यंगु खः । लुँया भाः निरन्तर थहां वनाच्वंगुलिं अझ नं भाः थहां वने फइगु अनुमान जुयाच्वंगु दु ।

थ्वहे कथं लँुया भाः थहां वनाच्वन धाःसा थुकिं न्हूगु रेकर्ड तये फइगु अनुमान नेपाल सुनचाँदी व्यवसायी संघया पुलांम्ह अध्यक्ष लिसें बजार विश्लेषक तेजरत्न शाक्यं यानादीगु दु । वय्कःया कथं वंगु छुं न्हि न्ह्यः तक अन्तर्राष्ट्रिय बजारय् लुँ प्रतिऔंश १९०० डलर जुयाच्वंगु खःसा म्हिगः १९२१ डलर थ्यन । वि.सं. २०७८ फागुन २५ गते नेपालय् लुँया भाः तोलां १ लाख ५ हजार ५०० तका थ्यंगु खः । थ्व लुँया भावय् आः तकया हे दकलय् थिकेगु कीर्तिमान खः ।

शाक्यया कथं म्हिगः नेपाःया ध्यबा कुहां मवःगु खःसा म्हिगः हे न्हूगु रेकर्ड कायम जुइ फइगु खः । वय्कलं धयादिल, ‘डलरया भाः कुहां वयाः म्हिगः नेपाःया ध्यबा छुं भचा बल्लाःगुलिं जक लुँया भावय् न्हूगु रेकर्ड मच्वन । म्हिगः नेपाःया ध्यबा कमजोर जूगु खःसा न्हूगु रेकर्ड जुइगु खः ।’

आः लुँया भाः थहां वनाः औंशं २ हजार डलर थ्यनीगु अनुमान जुयाच्वंगु दु । थुकिया कारण धाःसा विश्वया थीथी केन्द्रीय बैंकतय्सं लुँ न्यायेगु ज्या न्ह्याकूगुलिं खः । सेन्ट्रल बैंकतय्सं अझ नं लुँइ लगानी अप्वयेकल धाःसा लुँया भाः थहां वनाः ४ हजार डलर तक थ्यनीगु अनुमान नं वय्कलं यानादीगु दु ।

विश्वय् लगानी यायेगु क्षेत्र म्हो जुया वनेवं उकिया लिच्वः लुँइ लाःगु खँ कनादिसें वय्कलं धयादिल, ‘थौंकन्हय् विश्वय् हे बेरोजगारी अप्वया वनाच्वंगु दु । शेयरय् लगानी याइपिंसं नं आः लुँइ लगानी यानाच्वंगु दु । अमेरिकाय् न्हापा रियल स्टेटय् लगानी याइपिं नं आः लुँपाखे हे आकर्षित जुयाच्वंगुलिं लुँया भाः थहां वनाच्वंगु खः ।’

अथे हे चीन व अमेरिका दथुइ ८०० बिलियनया कारोबार विवादं यानाः नं लुँया बजाः प्रभावित जुयाच्वंगु खँ वय्कलं कनादिल ।

नेपालभाषा टाइम्स

च्वमिया मेमेगु

• चित्तरन्जन नेपालीयात लुमंकल
• मतया तार भूमिगत यायेगु ज्या बेवारिस
• निम्ह साहित्यकारया थौं बिचाः मुँज्या
• एमालेया संकल्प यात्रायात पहिचानवादीया हाथ्या
• शरणार्थी काण्डय् गुम्हेसित कुना हे तइगु