‘आकिवं वृद्धभत्ता अप्वइ’

येँ – प्रधानमन्त्री ओली ज्याझ्वलय् न्ववायेगु झ्वलय् वइगु दँय् वृद्धभत्ता अप्वयेकेगु खँ नं धयादीगु दु । वृद्धभत्तां यानाः मनूतय् श्वास जगे याःगु धासें वय्कलं धयादिल, ‘वृद्धभत्तां यानाः बाः–मांपिनि आयु ताःहाकः यानाबिउगु दु ।’

वृद्धभत्ता अप्वयेकेगु घोषणा यायेगु झ्वलय् वय्कलं धयादिल, ‘थ्व सरकार आः क्वःदइ, अले क्वदइ धयाच्वंपिं मनूत ज्याथजिथिपिनि न्ह्यःने मवंसां जिउ, उमिसं कथि नका हइ ।’

नेकपां घोषणापत्रय् हे वृद्धभत्ता लछिया न्याद्वः तका बीगु घोषणा यानावःगु खँ न्ह्यथँसें वय्कलं छुं यायेमफुपिंत सरकारं बचे याइ, फ्वनाः नयेमाःगु अवस्था वइमखु धयादिल । थ्व झ्वलय् वय्कलं नेपाः स्रोत व साधनं गरिब मजूगुलिं देय्या विकास तीव्र गतिं जुइगु खँ नं धाये ल्वःमंकामिदल ।

सकसित‌ं बैंक खाता अभियान

विक्रम संवत्या न्हूदँया झ्वलय् लाकाः सरकारं सकलें नेपालीतय्त बैंक खाता चायेकेगु व सकलें ज्येष्ठ नागरिकतय्त स्वास्थय बीमाया राष्ट्रिय अभियानया सुरु याःगु दु । प्रधानमन्त्री केपी ओलीं ज्येष्ठ नागरिकतय् उपस्थितिइ ‘ज्येष्ठ नागरिक स्वास्थ्य बीमा तथा समृद्धिलिसे स्वाये नाता, सकलें नेपालीया बैंक खाता’ धयागु नारा बियाः न्ह्याःगु थ्व अभियानया शुभारम्भ यानादीगु खः । राष्ट्रिय सभागृहय् जूगु शुभारम्भ ज्याझ्वलय् प्रधानमन्त्रीया अबु व ससःमामं बैंक खाता चायेकूगु खः । थ्व अभियान अन्तर्गत बैंक खाता चायेकेवं बैंकतय्सं हे खाताय् सछि तका तयाबी ।

शुभारम्भया झ्वलय् प्रधानमन्त्री ओली थः अबु मोहनप्रसाद ओली व ससःमां धनमाया शाक्यया बैंक खाता चायेकूगु प्रमाणपत्र व निःशुल्क स्वास्थ्य बीमा कार्ड लःल्हानादीगु खः । उगु हे ज्याझ्वलय् सछि दँया जमुना गुरुङ्ग, ९४ दँया गौरीशंकरलाल दास, ९२ दँया टेकबहादुर बस्नेत, ८७दँया भैरव रिसाल, ८६ दँया शोभावति तिमल्सिना लिसें ५५ म्ह ज्येष्ठ नागरिकतय्त निःशुल्क स्वास्थ्य बीमा कार्ड लःल्हानादीगु खः ।
शुभाम्भ ज्याझ्वलय् न्ववानादिसें अर्थमन्त्री डा. युवराज खतिवडां खाताय् तयाबीगु सछि दामं जक भर मकासे थःपिंसं नं सछि दां तयेत इनाप यानादिल । वय्कलं वित्तीय सुृरक्षाया निंतिं बैंक खाता अनिवार्य जूगुलिं सरकारं थ्व अभियान सुरु यानागु खँ कनादिल ।

बैंक खाता चायेकेत नागरिकताया प्रमाणपत्र, राहदानी व फोटा सहितया मतदाता परिचयपत्र वा राष्ट्रिय परिचयपत्र वा सवारीचालक अनुमति पत्र वा सम्बन्धित स्थानीय तहं प्रमाणि यानाः उपलब्ध यानातःगु फोटो सहितया सिफारिस वा पहिचान पत्र वा मेमेगु भ्वँपाखें याउँक बैंक खाता चायेकेफइगु खँ धाःगु दु ।

बैंकया ब्याजदर धाःसा थीथी बैंकय् थीथी कथं जुइ । बैंक खाता चायेकेगु निंतिं वैशाख १ गते सार्वजनिक बिदा जूसां फुक्कं बैंक चायेकूगु खः ।
प्रधानमन्त्री तथा मन्त्रिपरिषद कार्यालय, स्वास्थ्य बीमा बोर्ड, नेपाल राष्ट्र बैंक व नेपाल बैंकर्स एशोसियसनया ग्वसालय् राष्ट्रिय सभागृहय् जूगु ज्याझ्वलय् ज्येष्ठ नागरिकतय् निंतिं छगू लाख तका तकया स्वास्थ्य बीमा घोषणा याःगु खः । थ्व बीमाय् नेपाः सरकारं हे प्रिमियम पुली ।

वित्तीय साक्षरता, सामाजिक सुरक्षा, समावेशीता व समृद्धिया आधार तय याइगु विश्वास यानाः थ्व अभियान न्ह्याकूगु खः । थ्व अभियान अन्तर्गत फुक्कं स्थानीय तहय् वित्तिय पहुँच थ्यनेवं फुक्क कथंया भुक्तानी बैंकपाखें जुइ धाःगु दु । थौंकन्हय् नेपाःया ७५३ गू स्थानीय तह मध्य ७१३ गू तहय् संस्थागत वित्तीय पहुँच थ्यनेधुंकूगु दुसा चालु आर्थिक दँया दुने फुक्कं तहय् वित्तीय पहुँच थ्यंकेगु लक्ष्य तयातःगु दु ।
राष्ट्र बैंकया कथं थौंकन्हय् बैंक व वित्तीय संस्थाय् २ करोड ५६ लाख ५८ हजार ३८७ गू खाता चालाच्वंगु दु । थुकी छम्ह हे व्यक्ति व संस्थाया तःगू खाता नं दुथ्यानाच्वंगु दु ।

सम्बन्धित बुखँ

LEAVE YOUR COMMENTS