आरोहीपाखें प्यन्हुया दुने प्यंगू करोड राजश्व

येँ – पर्यटन विभागं हिमाल आरोहणया निंतिं अनुमति बीत ‘पर्मिट’ जारी याःगु प्यन्हु दुने हे थ्यंमथ्यं प्यंगू करोड राजश्व संकलन जूगु दु । सर्वोच्च शिखर सगरमाथा लिसें थीथी हिमाल गःवनेत अनुमति काःपिनि पाखें स्वंगू करोड ९० लाख ९ हजार २९७ तका राजश्व उठे जूगु खँ राजश्व विभागया पर्वतारोहण शाखां धाःगु दु ।

थ्व मध्ये दकलय् अप्वः सगरमाथा गःवनीपिं पाखें ३ करोड ५३ लाख तका राजश्व उठे जूगु दु । वसन्तु ऋतुया मौसमय् हिमाल आरोहणया निंतिं झिंन्यागू स्वयां अप्वः आरोही दलं पर्मितया निंतिं निवेदन बियातःगु खःसा सोमवाः तक विभागं गुंगू पुचःयात अनुमति बिउगु खः । थ्व मध्ये स्वंगू पुचः सगरमाथाया दुसा मेगु ल्होत्से, अन्नपूर्ण, कुम्भकर्ण, पुमरी, थापा पिक व छोपबमरी हिमाल गःवनीपिं दु ।

वैशाख तक आरोहणया अनुमति काइपिं दइगुलिं आरोहीतय् ल्याः अझं अप्वः दयेफुगु खँ धाःगु दु । सन् २०१८ या वसन्त ऋतुइ जक सगरमाथा लिसें थीथी हिमाल गयेत १०७ गू आरोही पुचः वंगु खः । थुपिं मध्ये ३४ गू पुचः सगरमाथा आरोहणय् वंगु खः । सन् २०१७ य् थ्व हे मौसमय् सगरमाथालिसे मेमेगु हिमाल आरोहण यायेत १०८ गू आरोहि पुचः वःगु खः ।

सगरमाथा आरोहणया निंतिं ऋतु कथं बिस्कं बिस्कं हे भाः पुलेमाः । विदेशी आराहीतय्सं वसन्त ऋतुइ ११ हजार अमेरिकी डलर रोयल्टी पुलेमाः । विभागया कथं सन् २०१८ या वसन्त ऋतुइ जक ४१ करोड २८ लाख ८४ हजार रोयल्टी मुंगु खः । थ्व मध्ये दकलय् अप्वः सगरमाथा गःवनीपिं पाखें ३५ करोड १४ लाख ९८ हजार तका रोयल्टी उठे जूगु खः । सरकारं हिमाल आरोहणया निंतिं ४१४ गू हिमाल खुल्ला यानातःगु दु । नेपालय् अझं आरोहणयोग्य १३ सय गू हिमाल दु ।