हिदानय् मिसापिं म्हो छाय् ?
हि छगू हे जक अज्याःगु पदार्थ खः, गुगु न त कारखाना वा उद्योगय् उत्पादन जुइ, न त छुं वासलं हे तयार जुइ । छम्ह मनुखं दान याइगु हि हे मेम्ह मनूया निंतिं ज्या वइ । उकिं हे हिदानयात महादान धायेगु यानातःगु दु । सवारी दुर्घटनाय् लानाः घाःपाः जूपिं व शल्यक्रिया यायेमाःपिं ल्वगियात हे दकलय् अप्वः हिया आवश्यक जुइगु खः ।
स्वनिगलय् हिया माग उच्च रुपं जुइगु याः । तर मागकथं हिया आपूर्ति धाःसा जुइ फयाच्वंगु मदु । अझ मोहनि, स्वन्ति थेंज्याःगु नखः व वयां लिपाया इलय् हिया माग पूवंकेत दकलय् अप्वः समस्या जुइगु याः । प्रत्येक १८ दँ दुम्ह मनुखं हिदान याये फइ । अले स्वलाय् छकः हिदान यायेगु उसाँय्या निंतिं नं तसकं निं ।
हिदान याइपिनिगु ल्याखय् मिजंतय्गु तुलनाय् मिसातय्गु सहभागिता धाःसा उलि सुधार जुइ फयाच्वंगु मदु । ‘हिदान यायेबलय् स्वास्थ्यय् खास हे लिच्वः लाइमखु’ धइगु माक्व जानकारी मदुगुलिं यानाः मिसापिं हिदातातय् ल्याः अप्वयेके मफयाच्वंगु खः । नेपाल रेडक्रस सोसाइटीपाखें संचालन जुयाच्वंगु केन्द्रीय रक्तसंचार सेवा केन्द्रं वंगु दँय् ६२ हजार ३५३ युनिट हि संकलन याःगु खः ।
उकी मध्ये १०,०६८ युनिट मिसा व ५२,२८५ मिजं हिदातापाखें संकलन जूगु खः । नगुनेया तुलनाय् थगुने मिसापिं हिदातातय् ल्याखय् छुं भचा सुधार वःगु धाःसा खने दु । नगुने गुद्वः मिसातय्सं जक हिदान याःगु खः । ‘मिसा हिदातातय् ल्याः अप्वयेकेत देय्न्यंकं अभियानय् लगे जुयाच्वनागु दु’ नेपाल रेडक्रस सोसाइटीया केन्द्रीय अध्यक्ष संजीव थापां धयादिल ।
देय्न्यंकं आर्थिक दँ ०७४÷७५य् निगू लाख ख्वीनिद्वः ४३९ युनिट हि संकलन जूगु खः । उकी मध्ये स्वंगू लाख पीप्यद्वः ९३३ युनिट हि व हिया तत्व ल्वगितय् निंतिं उपलब्ध याकेगु ज्या जूगु खः । थौंकन्हय् देय्या न्हय्स्वंगू जिल्लाया १०८ गू थासय् रक्तसंचार सेवा केन्द्र व इकाइपाखें हि संकलन यायेगु ज्या जुयाच्वंगु दु ।
उपिं हिदातात मध्ये ६६ म्हेसिके एचआइभी पोजिटिभ खने दुगु खः । केन्द्रया कथं हेपाटाइटिस बी व सी खने दुपिं हिदाताया ल्याः छसिकथं ४६६ व ३५१ दु । देय्न्यंकं ३ दशमलव १० प्रतिशत हिदाताय् ए, बी, ओ व एबी नेगेटिभ दुगु न्ह्यथंगु दु । तर स्वनिगलय् धाःसा नेगेटिभ रक्त समूह दुपिं हिदाताया ल्याः २ दशमलव ९ प्रतिशत दु ।
नेपालय् वि.सं. २०२३ साउन १२ गते नेपाल रेडक्रस रक्तसंचार सेवा केन्द्रया रुपय् स्थापना जूगु खः । उगु दँय् १५७ युनिट हि संकलन जुल । स्वनिगलय् दकलय् अप्वः हि खपत जुइगु यानाच्वंगु दु । थ्व झ्वलय् केन्द्रं वंगु छुं ई न्ह्यः जक थःगु ५२ क्वःगु स्थापना दिवस थीथी ज्याझ्वः यासें हन ।
ज्याझ्वलय् नवासें नेपाल रेडक्रस सोसाइटीया केन्द्रीय अध्यक्ष थापां रक्तसंचार सेवा व वितरणयात अझ प्रभावकारी व गुणस्तरीय दयेका यंकेत सोसाइटीं उच्च प्राथमिकता बिया वयाच्वंगु चर्चा यासें रक्तसंचार सेवाय् सरकारं लगानी अप्वयेका यंकेत इनाप यानादिल ।
केन्द्रीय जनस्वास्थ्य प्रयोगशालाया प्रमुख डा. हरिशचन्द्र उप्रेतीं रक्तसंचार सेवा केन्द्रं स्थापनाकालनिसें हे बांलाक ज्या याना वयाच्वंगु धयादिल । केन्द्रया प्रमुख डा. मनिता राजकर्णिकारं अझं १८ प्रतिशत हि ल्वगिया थःथितिपिनिगुपाखें सोधभर्ना यायेमालाच्वंगु अवस्था अन्त्यया निंतिं केन्द्रं बः बिया वयाच्वंगु धयादिल ।
नेपाल रेडक्रस सोसाइटीं केन्द्रीय रक्तसंचार सेवा केन्द्र बाहेकं विराटनगर, पोखरा, नेपालगंज, कैलाली, चितवनय् यानाः न्यागू थासय् क्षेत्रीय रक्तसंचार सेवा, २२ गू जिल्लाय् जिल्लास्तरीय, पीन्हय्गू जिल्लाय् आकस्मिक व स्वीच्यागू अस्पतालय् रक्तसंचार सेवा इकाइ संचालन याना वयाच्वंगु दु ।
LEAVE YOUR COMMENTS