ख्वपया सल्लाघारी जग्गा हाकनं नापजाँच

ख्वप – थनया सल्लाघारीइ च्वंगु खुल्ला ख्यःया नाप जांच याइगु जूगु दु । ख्वप नगरपालिका वडा नं. १ सल्लाघारीइ च्वंगु खुल्ला ख्यः (चौर)या हाकनं नाप जांच यायेत्यंगु खः । थौंकन्हय् नेपाल ट्रष्टया नामय् दुगु उगु खालीगु थाय्यात कयाः नाप जांच यायेगु छगु सहमति जूगु खः ।

ख्वप नगरपालिकाया प्रमुख सुनील प्रजापति व नेपाल ट्रष्टया सचिव गजेन्द ठाकुर दथुइ वंगु शुक्रवाः जूगु छगू भेटघाटया इलय् सल्लाघारीया खालीगु थाय्या क्षेत्रफल यकीन यायेत हाकनं नाप जांच यायेगु सहमति जूगु खः । नगरप्रमुख प्रजापतिं बियादीगु जानकारीकथं ख्वप नगरपालिका व नेपाल ट्रष्टया मंकाः रोहबरय् नापी कार्यालयमार्फट नापजाँच यानाः सीमा संकलन यायेगु निर्णय जूगु खः ।

सरकारी पर्ती जग्गाय् अतिक्रमण जुया वनाच्वंगुलिं सल्लाघारीया उगु खालीगु थाय्या संरक्षण यायेमाःगु आवश्यकतायात वाःचायेकाः नगरपालिकां करिब ९८ गू लाखया लागतय् जग्गाया पूर्व, पश्चिम व दक्षिणपाखे सीमांकन यानाः पःखालं ग्वयेगु ज्या न्ह्याकाच्वनागु नगरप्रमुख प्रजापतिं जानकारी याकादीगु खः ।

वय्कलं तत्कालीन राजदरवारं स्थानीय म्हय्, किसानया उगु जग्गायात वि.सं. २०२६ सालय् जग्गाधनीयात छपीया १२००÷– व तःसिंयात च्यासः तका बियाः जबरजस्ती अधिग्रहण याःगु धासें उगु जग्गा जनताया अधिकत हितया निंतिं प्रयोग यायेत धासें नगरपालिकायात हे बीत नं माग यानादीगु दु ।

जनताया भावनाकथं उगु जग्गाय् नगरपालिकां ख्वप विश्वविद्यालय स्थापना यायेगु लक्ष्य कयागु जानकारी वय्कलं बियादीगु दु । उगु भेटया इलय् ट्रष्टया सचिव ठाकुरं नेपाल सरकारया स्वामित्वय् दुगु उगु जग्गाया संरक्षण यायेमाःगु आवश्यक जूगु व उगु जग्गा संरक्षण याःगुलिं ख्वप नगरपालिकायात सुभाय् देछासे वइगु दिनय् उगु जग्गाया उपयोगया बारे नगरपालिका व ट्रष्टया दथुइ समन्वय यानाः न्ह्याः वनेगु जुइ धयादिल ।

१०८ रोपनी क्षेत्रफलया उगु जग्गा सरकारया सम्पत्ति जनताया हे सम्पत्ति जूगु धासें उकिया संरक्षण यानाः जनताया हितय् अधिकतम सदुपयोग यायेत जूगु संरक्षणया ज्या सकारात्मक जूगु नं वय्कलं धयादिल ।

 

सम्बन्धित बुखँ

LEAVE YOUR COMMENTS