थारु नेता विरुद्धया फैसलायात कयाः संघीय गठबन्धनया ध्यानाकर्षण

येँ (नेपालभाषा टाइम्स) – पहिचानय् आधारित संघीय गठनबन्धनं थारु नेतातय्त दिपायल उच्च अदालतं कैलाली जिल्ला अदालतं स्वदँ न्ह्यः याःगु जन्मकैदया फैसलायात सदर याःगु खँय् थःपिनिगु गम्भिर ध्यानाकर्षण जूगु खँ धाःगु दु ।

गठबन्धनया संयोजक नापं नेपाः राष्ट्रिय पार्टीया अध्यक्ष डा. विजयप्रकाश सैंजू छगू विज्ञप्ती जारी यासें गठबन्धनया सक्रिय छगू घटक थरुहत थारुवान राष्ट्रिय मुक्ति मोर्चाया युवा नेता लक्ष्मणलाल थारु व सांसद रेशमलाल चौधरीयात हालय् दिपायल उच्च अदालतं कैलीली जिल्ला अदालतपाखें स्वदँ न्ह्यः याःगु जन्मकैदया फैसलायात सदर याःगुयात थःपिनिगु गम्भिर ध्यानाकर्षण जूगु खँ धाःगु दु ।

थारु जनतात थःपिनिगु पहिचानया राजनीतिक अधिकारया निंतिं संघर्ष याना वयाच्वंपिं संघर्षशील थारु जनतातलिसे सम्बन्धित व २०७२ मंसिर ८ गते जूगु चर्चित टिकापुर घटना छगू सुनियोजित जूगु जूगु गठबन्धनं दावी याःगु दु । शंकाया भरय् थारुवान नेतातय्त जन्मकैदया फैसलायात सदर यायेगु धइगु उत्पीडीत थारु समुदायया जनताप्रति अन्याय व षडयन्त्रपूर्ण जूगु ठहर गठबन्धनं याःगु दु ।

अदालतया फैसलायात तत्काल भिंकेत व टिकापुर घटनालिसे सम्बन्धित मेपिं थारु नेतातय्त नं विना शर्त रिहा यायेत गठबन्धनलिसे सम्बन्धित पार्टी व संघर्ष समितिं जोडदार माग यानागु नं विज्ञप्तीइ धयातःगु दु ।