ब्राजिल, अर्जेन्टिना, फ्रान्स व इटली त्यात

मैत्रीपूर्ण अन्तर्राष्टिय कासा

ब्राजिल, अर्जेन्टिना, फ्रान्स व इटलीं मैत्रीपूर्ण कासा त्याकूगु दु । म्हिगः जूगु थीथी मैत्रीपूर्ण कासाय् ब्राजिलं क्यामरुनयात, अर्जेन्टिनां मेसिक्कोयात, फ्रान्सं उरुग्वेयात व इटलीं अमेरिकायात बुकूगु खः । अथेहे मेगु कासाय् चिलिं होन्डुरसयात व अल्बानियां वेल्सयात बुकूगु दु ।
अर्जेन्टिना मेसिक्कोयात २–० गोलं बुकूगुु खः ।

अर्जेन्टिनाया निंतिं माउरो इकार्डीं कासा सुरु जूगु निगू मिनेट दुने हे गोल याःगु खः । कासा जःछि मेसिक्कोयात दबाबय् तयातःगु अर्जेन्टिनाया निंतिं पाउलो डिबालां ८७ औं मिनेटय् गोल याःगु खः । अर्जेन्टिनाया कप्तान लियोनल मेसीं धाःसा थ्व कासा मम्हितूगु खः ।
मेगू मैत्रीपूर्ण कासाय् इटलीं अमेरिकायात १–० गोलं बुकूगु खः ।

अमेरिकायात दबाबय् तयातःसां इटलीयात गोल यायेत धाःसा थाकुल । १६ गू पोष्ट प्रहार याःगु इटलीं निगूगु हाफया इन्जुरी इलय् जक गोल यायेत ताःलाःगु खः । इटलीया निंतिं मातओ पोलातानों गोल याःगु खः ।मैत्रीपूर्ण कासाय् ब्राजिलं क्यामरुनयात १–० गोलं बुकूगु खः । ब्राजिलया निंतिं कासाया छगू जक गोल रिचार्लिसन ४५ औं मिनेटय् याःगु खः ।

कासाया खुगूगु मिनेटय् चोटया कारणं स्टार कासामि नेयमारं मैदान त्वःतेमाःगु खः । बल थ्वायेगु झ्वलय् नेयमारया तुतिया एडक्टर मसलय् समस्या वःगु खः । रिचार्लिसन नेयमारया थासय् मैदानय् वःगु खः ।मेखे विश्वकप विजेता फ्रान्सं उरुग्वेयात १—० बुकूगु खः । कासाया ५२ औैैं मिनेटय् ओलिभर जिराउडं पेनाल्टीपाखें याःगु छगू जक गोलं फ्रान्स त्याःगु खः ।

थ्व कासाय् फ्रान्सया स्टार कासामि एमबाप्पे धाःसा घाःपाः जूगु दु । उरुग्वेया गोलकिपर मार्टिन क्याम्पानालिसे ट्याकल याःवंबलय् एमबाप्पेया ब्वहलय् चोट लाःगु खः । थ्व चोट कारणं एम्बाप्पेया क्लब पिएसजीयात धाःसा समस्या वःगु दु । म्हिगः हे जूगु मेगु मैत्रीपूर्ण कासाय् घाःपाः नःम्ह नेयामर नं पिएसजीयाम्ह हे कासामि खः ।मेगु मैत्रीपूर्ण कासाय् चिली होन्डुसयात ४—१ व अल्बानियां वेल्सयात १–० गोेलं बुकूगु खः ।

 

सम्बन्धित बुखँ

LEAVE YOUR COMMENTS