थाइल्यान्डयात १७० रनं बुकाः नेपाः शीर्ष थासय्

येँ – टि–२० विश्वकप क्रिकेटया एशिया छनोट अन्तर्गत आइतवाः जूगु कासाय् नेपालं थाइल्यान्डयात १४० रनं बुकूगु दु । टस बुनाः न्हापां ब्याटिङ याःगु नेपालं निर्धारित २० ओभरय् न्हय्गू विकेटया क्षतिइ १७२ रन दयेकूगु खः । लिसलय् ब्याटिङ याःवःगु थाइल्यान्डयात नेपाली बलरतय्सं ८.५ बलय् हे मुक्कं १८ रन दयेकूबलय् गुंगू विकेट कयाबिउगु खः ।

थ्व धुंकाः वा वयेवं डिएल नियमया आधारं नेपाः त्याःगु घोषणा याःगु खः । आक्रमण बलिङ याःगु नेपाःया निंतिं सन्दीप लामिछानें जक न्यागू विकेट काःगु खः । थ्वयां न्ह्यः मलेसियालिसे जूगु कासाय् नं सन्दीपं न्यागू हे विकेट काःगु खः । म्हिगः सन्दीपं न्यागू विकेट कायेगु म्हिगः सन्दीपं न्यागू विकेट कायेगु झ्वलय् ३ ओभरय् छगू मेडन सहित च्यागू रन जक बिउगु खः ।

म्यान अफ द म्याच जूम्ह करन केसीं १.५ ओभरय् मुक्कं निगू रन जक बियाः स्वंगू विकेट काःगु खः । करनं अविजित ४० रन नं दयेकूगु खः । अथेहे शरद भेषवाकरं ३४, दीपेन्द्र सिंह ऐरीं ३०, अनिल शाहं २५ व विनोद भण्डारीं १५ रन दयेकूगु खः । नेपाः आः स्वंगू कासा त्याकाः ६ ल्याः सहित शीर्ष थासय् दु । नेपाःया लिसें सिंगापुरया नं ६ अंक हे दुसां नेपाःया रन रेटया आधारय् शीर्षथासय् दु ।

थ्व छनोटय् शीर्ष स्वंगूगु थासय् लाःगु टिम विश्वकप छनोटया मेगु चरणय् म्हिते खनी । प्यंगू कासा म्हितेधुंकूगु थाइल्यान्ड ल्याः धलखय् स्वंगूगु थासय् दु । निगू कासा त्याःगु, छगू बूगु व छगू बराबरी सहित थाइल्यान्ड ५ अंक कयाः स्वंगूगु थासय् दुगु खः ।

उत्कृष्ट कासा न्ह्यब्वया वयाच्वंगु नेपालं थ्वयां न्ह्यः म्यानमार व मलेसियायात बुकूगु खः । म्यानमारयात बुकूबलय् नं मुक्कं २९ रनय् अल आउट यानाबिउगु खः । नेपालं मेगु कासा मंगलवाः भुटानलिसे म्हितिसा बुधवाः चीनलिसे म्हिती । शुक्रवाः सिंगापुरलिसे म्हिती ।