ने. सं. ११४४ कौलाथ्व तृतीया -

रियल विरुद्ध स्वारेजया ह्याट्रिक

स्पेनिस ला लिगाय् बार्सिलोनां रियल म्याड्रिडयात तःधंगु अन्तरं बुकूगु दु । थ्व सिजनया एल क्लासिकोय् बार्सिलोनां रियलयात ५—१ गोलं बुकूगु खः। बार्सिलोनाया घरेलु मैदान नोउ क्याम्पय् जूगु कासाय् लुइस स्वारेजं ह्याट्रिक यातसा फिलिप कोन्टिन्हो व भिडालं छगू छगू गोल याःगु खः । कमजोर प्रर्दशन याःगु रियलया निंतिं छगू जक गोल मार्सेलाें याःगु खः ।

आक्रामक कासा म्हितूगु बार्सिलोनां ११ औं मिनेटय् कोन्टिन्होया गोलं अग्रता काःगु खः । कासाया ३० औं मिनेटय् राफेल भारनं स्वारेजयात फल यायेवं भीएआर प्रविधिया ग्वाहालिं चूलाःगु पेनाल्टीइ स्वारेजं थःगु न्हापांगु गोल याःगु खः । न्हापांगु हाफय् निगू गोलं अग्रता काःगु बार्सिलोनां निगूगु हाफय् नं रियलयात दबाबय् हे तल ।.

बार्सिलोनां निगूगु हाफया अन्तिम १५ मिनेटय् स्वंगु गोल याःगु खः । स्वारेजं कासाया ७५ औं मिनेटय् निगुगू व ८३ औ मिनेटय् गोल यानाः ह्याट्रिक पुरा याःगु खः । अथेहे भिडालं ८७ औं मिनेटय् गोल यात । रियलया नितिं मार्सेलाें ५० औं मिनेटय् गोल याःगु खः । खराब प्रर्दशन याना वयाच्वंगु रियल बार्सिलोनानाप तःधंगु अन्तरं बुइवं रियलया प्रशिक्षक जुलियन लोपेतेगी बर्खास्त जइगु सम्भावना अप्वःगु दु ।

थ्व विजय लिपा बार्सिलोना लिगया शीर्ष थासय् दु । कमजोर प्रर्दशन यानाच्वगु म्याड्रिड धाःसा ९ औं थासय् कुहां वंगु दु ।एल क्लासिकोयात स्टार कासामि लियोनल मेसी व क्रिष्टियानो रोनाल्डो दथुइया भिडन्तया रुपय् नं स्वयेगु याः । तर थगुसी जूगु कासाय् ११ दँ लिपा मेसी व रोनाल्डो दुमथ्यात । रोनाल्डो थ्व हे सिजनय् युभेन्टस् वंगु खःसा मेसी घाःपाः जुयाः म्हिते मखन ।