फुटबलय् नेपाःयात स्वर्ण

तेजनारायण महर्जन

नेपालं झिंस्वक्वःगु दक्षिण एशियाली कासा (साग)या फुटबलय् स्वर्ण त्याकूगु दु । म्हिगः जूगु फाइनल कासाय् भूटानयात २–१ गो लं बुकुसें स्वर्ण ल्हातय् लाकूगु खः । तसकं प्रतिस्पर्धात्मक कासाय् नेपालं कासाया १६ औं मिनेटय् हे अभिषेक रिजालया गोलं अग्रता काःगु खः । अभिषेकया झिंस्वक्वःगु सागय् थ्व स्वंगूगु गोल खः ।

कासाया ३७ औं मिनेटय् भूटानया रोनाल्डो धाइम्ह चेन्चो ग्याल्चेनं गोल यासें कासा बराबरीइ हःगु खः । नेपाःया रक्षकतय्सं मार्क याये मफयेवं ताःहाकःगु पासय् वःगु बलयात बांलाःगु फिनिसिङ यासें ग्याल्चे नं पोस्टय् प्रहार याःगु खः । न्हापांगु हाफ बराबरीइ क्वचाये वं लिपांगु हाफ सुरु जूगु छगू मिने टय् हे नेपाःयात गोल यायेगु अवसर वःगु खः ।

तर भूटानी गोलकिपर डिबक्सं पिहां वयाः हेड यानाः बचे यात । थ्वयां खुगू मिनेट लिपा निगूगु हाफ सुरु जूगुयां न्हय्गूगु मिनेटय् हे सुनिल बलं गोल यासें नेपाःयात अग्रता बिउगु खः । जवगु विंगपाखें वःगु बलयात ब्याक हेडयासें सुनिलं गोल याःगु खः ।

थ्वयां न्यागू मिनेट लिपा नं नेपाःयात बांलाःगु मौका वःगु खः । भूटानी गोलकिपर याकःचा दुगु अवस्थाय् अभिषेकयात लंग पासय् बल वःगु खःसां भूटानी गोलकिपरं बांलाःगु बचाउ यात । थ्व लिपा निगुलिं टिमं गोल याये मफयेवं ने पाः २–१ गो लं विजय जूसें स्वर्ण त्याकूगु खः । दक्षिण एशियाली कासाया फुटबलय् ने पाःया थ्व प्यंगूगु स्वर्ण खः । थ्वयां न्ह्यव सन् १९८३, १९९३ व २०१६ य् जूगु झिनिंक्वःगु सागय् नेपालं स्वर्ण त्याकूगु खः ।

सम्बन्धित बुखँ

LEAVE YOUR COMMENTS