कन्हय् स्वंगूगु थाय्या निंतिं कासा
थुगुसीया विश्वकपय् न्हूम्ह च्याम्पियन पिहां वइगु खनेदुगु दु । निगूगु सेमिफाइनलय् इंग्ल्यान्डयात बुकाः क्रोसिया फाइनलय् दुहां वंगुलिं आः न्हूम्ह च्याम्पियन पिहां वइगु सम्भावना ब्वलंगु दु । आइतवाः फ्रान्स व क्रोसिया दथुइ फाइनल कासा जुइ । बेल्जियमयात बुकाः फाइनलय् थ्यंगु फ्रान्सं छक्वः विश्वकप त्याकातये धुंकलसा क्रोसिया दकलय् न्हापांखुसी फाइनलय् थ्यंगु खः ।
यदि फाइनलय् फ्रान्सयात बुकेफत धाःसा क्रोसिया न्हूगु विश्व च्याम्पियन देय् जुइ । फ्रान्स सन् १९९८ य् विश्वकप त्याकूगु खः । थ्व फाइनल न्ह्यः शनिवाः मेगु छगू कासा जुइ । विश्वकपया स्वंगूग थासय् लाइगु टिम ल्ययेगु निंतिं सेमिफाइनलय् पराजित इंग्ल्यान्ड व बेल्जियम दथुइ प्लेअप कासा जुइ ।
विश्वकपय् स्वंगूगु थाय्या निंतिं जुइगु कासायात उलि महत्व बियाः स्वयेगु याइमखु । अथे खःसां बेल्जियम व इंग्ल्यान्डया फ्यानतय् निंतिं धाःसा थ्व रोमाञ्चक भिडन्त हे जुइ । विश्वकपया लिग चरणय् नं थ्व निगू टिम दथुइ धेंधेंबल्लाः जुइ धुंकूगु दु । छगू समूह लाःगु थ्व निगू टिम दथुइ जूगु कासाय् बेल्जियम १–० गोलं त्याकाः समूह बिजेता जुयाः नकआउट चरणय् वंगु खः ।
स्वंगूगु थाय् निंतिं धेंधेंबल्ला यायेत्यंपिं थुपिं निगू टिम मध्ये इंग्ल्यान्ड सन् १९६६ या विश्व विजेता खःसा बेल्जियमं फाइनल म्हिते खंगु मदुनि । वं ३२ दँ न्ह्यः छक्वः स्वंगूगु थाय्या निंतिं म्हितूगु खः । तर उबलय् व पराजित जुयाः प्यंगूगु थासय् लाःगु खः । मेखे इंग्ल्यान्डं २८ दँ न्ह्यव स्वंगूगु थाय्या निंतिं धेंधेंबल्लाः याःगु खः । इंग्ल्यान्ड नं अबलय् पराजित जुयाः प्यंगूगु थासय् हे चित्त बुझे यायेमाःगु खः ।
LEAVE YOUR COMMENTS