पद्मरत्न महानायक खः
- उदेन न्हूसाय्मि
- किपा-राजेन व दिपक तुलाधरया फेसबुक
येँ – निरंकुता पंचायती व्यवस्थाया इलय् उगु हे व्यवस्थाया विरोधय् जूगु आन्दोलन अग्रपंक्तिइ भूमिका म्हितादीम्ह पद्मरत्न तुलाधर नेपाःमिया निंतिं नायक जक मखसे महानायक हे खः ।
गुगु इलय् पंचायती व्यवस्था विरुद्ध नवायेतकं मजिउगु, राजनीतिक स्वतन्त्रया ज्याखँ यायेगु ला त्वःतादिसँ खँ तक नं ल्हाये मजिउगु, दलतय्त प्रतिबन्ध तयातःगु इलय् उगु हे व्यवस्थाया विरोधय् कुहां वयाः वय्कः छम्ह थज्याःम्ह महानायक जुयाः पिलू वल गुम्हेसित झीसं गबलें नं ल्वःमंके फइमखु ।
नेवाः न्ह्यलुवानापं मानवअधिकारवादी आन्दोलन, नेपाल संव्त सांस्कृतिक आन्दोलन, आदिवासी जनजाति आन्दोलनया नं न्ह्यलुवा पद्मरत्न तुलाधर मदुगु झिंस्वन्हुया पुण्यतिथिइ लाकाः पद्मरत्न तुलाधर विचाः मुँज्या ग्वसाः खलःपाखें ग्वसाः ग्वःगु विचाः मुँज्याय् नवासें उपप्रधानलिसें रक्षामन्त्री ईश्वर पोखरेलं उगु खँ धयादीगु खः ।
वय्कलं पद्मरत्न तुलाधरं थःत थीथी भूमिकाय् प्रस्तुत यायेगु झ्वलय् हरेक भूमिकाय् उलि हे सशक्त रुपं निष्ठापूर्वक प्रस्तुत यायेत सफल जूगु नापं वय्कलं थःत थः छु खः व हे प्रस्तुत यानाः क्यनादीगु व उकी वय्कः सफल नं जुयादीगु रक्षामन्त्री पोखरेलं धयादिल ।
मन्त्री पोखरेलं पद्मरत्न तुलाधर भौतिक रुपं आः झीगु न्ह्यःने मदुसां वय्कःया विचाः, वय्कःया योगदान, वय्कलं हरेक ख्यलय् म्हितीगु भूमिका व वय्कःया सन्देशयात सुरक्षित याना आः झीगु ब्वहलय् वःगु दु धयादिल । लिसें वय्कलं पद्मरत्न मदयेधुंकाः नं वय्कः सु खः, छु खः धइगु थप सीकेमाःगु आवश्यक दु धयादिल ।
नेपाः निरंकुशता विरोधी आन्दोलननिसें आदिवासी, जनजाति, उत्पीडित समुदायया निंतिं आन्दोलन यानाच्वंम्ह पद्मरत्नप्रति विचाः हायेकेत ग्वसाः ग्वःगु ज्याझ्वः औपचरिकताय् जक सीमित मयासे न्हूपुस्ताया दथुइ नं यंकेमाःगु खँय् बः बियादिल । पद्मरत्नया योगदानयात कयाः वय्कःया नामं प्रतिष्ठान नीस्वनेगु खँय् सरकार व व्यक्तिगत रुपं थः सकारात्मक दुसां नेवाः ख्यलं थ्व ज्या आः सरकारया जिम्माय् त्वःता बी धुन धकाः सुम्क च्वनेगु मखसे जनस्तरं हे प्रतिष्ठानया निंतिं न्ह्यचिलेमाः धयादिल ।
नेपाल परम्परागत बौद्ध धर्म संघपाखें मदुम्ह पद्मरत्नया लुमन्तिइ दुर्गति परिशोधन धारणी पाठ यानाः छगू मिनेट मौन धारण यासें वय्कःया किपाय् स्वां देछायाः न्ह्याःगु ज्याझ्वलय् जनकवि दुर्गालाल श्रेष्ठं पद्मरत्न सीत वःम्ह मनू मखु, व गबलें नं सीमखु, पद्मरत्न न्ह्याबलें झीनाप हे दयाच्वनी धासें वय्कःया विचाःयात म्वाकातयेत इनाप यानादिल ।
आदिवासी जनजाति राष्ट्रिय आन्दोलनया प्रवक्ता डा. ओम गुरुंगं पंचायती व्यवस्थाय् निरंकुशताया विरोध यानादीम्ह पद्मरत्नया भूमिका, योगदानयात लुमंकाः राज्यं हे वय्कःया नामं पद्मरत्न तुलाधर राष्ट्रिय प्रतिष्ठान चायेकाः सम्मान बीत माग यानादिसें वय्कःया राष्ट्रिय विभूति व नेपाल रत्न घोषणा यायेमाःगु माग यानादिल ।
डा. गुरुंगं बहुआयामिक व्यक्तित्व पद्मरत्न तुलाधर नेवाःया कुलय् जन्म जुयाः नं समग्र आदिवासी जनजाति, मधेशी, थारु, उत्पीडित समुदायया मानवअधिकार व हक अधिकार प्राप्तिया निंतिं गुकथं प्रतिवद्ध जुयाः थःत पानादीगु खः, उकिं आदिवासी जनजाति आन्दोलनय् गबलें नं पूवंके मफइगु ह्याकिं वंगु दु धयादिल ।
नेवाः आन्दोलनया न्ह्यलुवा मल्ल के. सुन्दरं आः राई, लिम्बु, मगः, गुरुंग, आदिवासी जनजाति, मधेशी, हरेक जातिया दुने पद्मरत्न तुलाधरया जन्म जुइमाः धयादिल ।
पुलांम्ह सभामुख, मानवअधिकारवादीनापं पद्मरत्न तुलाधरया सहकर्मि दमननाथ ढुंगानां पद्मरत्न तुलाधर मदयाः राष्ट्रयात हे तःधंगु क्षति जूगु धासें वय्कलं गुकथं देय्, जनता, आदिवासी जनजाति, भाषा, साहित्यया क्षेत्रय् यानादीगु योगदान व मानवअधिकारया क्षेत्रय् म्हितादीगु भूमिकायात राष्ट्रं गबलें नं ल्वःमंके मजिउ धयादिल ।
नेपाःया राजनीतिक आन्दोनलया इतिहासय् पुष्पलाल, गंगालाल व गणेशमानयात समर्पण यायेधुंकाः मानवअधिकारया क्षेत्रय् पद्मरत्नयात बिया । अझ नं येँ देशं देय्यात योगदान बीफुपिं बीत सामर्थ दु धयादिल ।
विचाः मुँज्याय् नआदिवासी जनजाति महासंघ नेपालया न्वकु गोविन्द छन्त्याल, नागरिक न्ह्यलुवा श्यम श्रेष्ठ, मानवअधिकारवादी नेता लिसें राष्ट्रपतिया सल्लाहकार सुशील प्याकुरेल, न्हूदँ समारोह समिति ११३९या नायः नापं साहित्यकार सत्यभामा माथेमापिंसं नं पद्मरत्नया थीथी पक्षयात कयाः नुगःखँ तयादीगु खः । कवयित्री प्रतिसरा साय्मिं न्ह्याकादीगु ज्याझ्वलय् ग्वसाः खलःया दुजः सुरेशकिरण मानन्धरं सुभाय् देछानादीगु खः ।
LEAVE YOUR COMMENTS