ने. सं. ११४६ तछलागा द्वादशी -

नेपाली सीवं सरकारया विरोधय् प्रदर्शन

आत्मदाह याःम्ह नेपाली म्हिगः सुथय् मंत, प्रधानमन्त्री व गृहमन्त्रीया राजीनामा माग

येँ (नेपालभाषा टाइम्स) – गणेश नेपाली आत्मदाह घटनायात कयाः म्हिगः फिब्वख्यलय् व वीर अस्पताल न्ह्यःने प्रदर्शन जूगु दु । फिब्वख्यलय् संयुक्त विद्यार्थी संगठनं प्रदर्शन याःगु खःसा वीर अस्पताल न्ह्यःने बाइक राइडरतय्सं प्रदर्शन याःगु खः । वीर अस्पताल दुने प्रदर्शनकारीतय्सं प्रदर्शन यायेवं अन आपालं प्रहरी तयाः सुरक्षा बिउगु खः । वीर अस्पताल परिसरय् प्रदर्शन यायेगु झ्वलय् प्रदर्शनकारीतय्सं प्रधानमन्त्री बालेन साह व गृहमन्त्री सुधन गुरुङया राजीनामा फ्वंगु दु ।

वंगु बिहीवाः त्रिपुरेश्वरया राहदानी विभाग न्ह्यःने येँ महानगरपालिकाया प्रहरीं नेपालीया मोटरसाइकलय् ‘ह्विल लक’ यानाबिउगुलिं तंम्वःम्ह नेपालीं थःगु मोटरसाइकलया पेट्रोल लिकयाः थःगु म्हय् लुनाः आत्मदाह याःगु खः । आत्मदाहया कुतः लिपा घाःपाः जूम्ह नेपालीयात वीर अस्पतालय् यंकूगु खःसा अन वासः याकुयाकुं म्हिगः मदयेवं थाय्थासय् विरोध प्रदर्शन जूगु खः ।

म्हिगः प्रदर्शनकारीत वीर अस्पतालं येँ मनपाया पुलांगु भवन घेरे यायेत वनेत्यंगु इलय् प्रदर्शनकारी व प्रहरी दथुइ छझाः घ्वात्तुमत्तु घ्वायेगु ज्या जूगु खः । येँ मनपाया नगर प्रहरी बल च्वनाच्वंगु बागदरवारया पुलांगु मनपा भवन घेरे यायेत वंपिं प्रदर्शनकारीतय्त प्रहरीं लुँहिति हे पना बिउगु खः । उकथं हे संयुक्त विद्यार्थी संगठनं म्हिगः फिब्वख्यलय् प्रदर्शन लिपा वीर अस्पतालपाखे वनेगु कुतः याःगु खःसा प्रहरीं उमित लुँमधी (भद्रकाली) इ पनाबिउगु खः ।

गणेश मदुगु घटनायात कयाः म्हिगः सदनय् नं सः थ्वयेकेगु ज्या जूगु दुसा गृहमन्त्री गुरुङं प्रष्टीकरण बियादीगु दु । म्हिगः सदनय् नेपाली कांग्रेस, नेपाली कम्युनिष्ट पार्टी, सत्तारुढ राष्ट्रिय स्वतन्त्र पार्टी (रास्वपा) व राष्ट्रिय प्रजातन्त्र पार्टी (राप्रपा) या सांसदतय्सं घटनायात कयाः निष्पक्ष छानबिन यायेमाःगु माग याःगु खः । नेपालीं आत्मदाह याःगु खँयात प्रष्टीकरण बीगु झ्वलय् आक्रोशित जूम्ह गृहमन्त्री गुरुङ धयादीगु दु, ‘म्हिगः अस्पतालय् गणेश नेपाली जीवनया लिपांगु लडाईं ल्वानाच्वंगु इलय् थन ततःसलं सः थ्वयेकूपिं ग्वम्ह सांसद वीर अस्पताल वंगु दु ?’

गृहमन्त्री गुरुङं गणेशयात म्वाकेगु निंतिं गृह मन्त्रालयया पुचः चछि खटे जुयाः कुतः यानागु धासें थम्हं यानागु ज्यायात विपक्षीतय्स ‘स्टन्टबाजी’ धाःगु खँय् नुगः स्याःगु खँ धयादीगु दु । सम्बोधनया झ्वलय् म्हिगः गृहमन्त्री गुरुङ येँ महानगरपालिका व स्थानीय प्रशासनया भूमिकायात कयाः न्ह्यसः थसें धयादिल, ‘गणेशया बाइकय् ह्विल लक यायेगु ज्या ट्राफिक प्रहरी याःगु मखुसे नगर प्रहरीं याःगु खः । थुकिया भिडियो प्रमाण नं दु ।’

गणेश नेपालीया आत्मदाहया घटनायात कयाः छानबिन यायेत डीआईजी गोविन्द थपलियाया नेतृत्वय् समिति नीस्वंगु दु । उपत्यका प्रहरी कार्यालय, रानीपोखरीं डीआईजी थपलियाया नेतृत्वय् जिल्ला प्रहरी परिसर काठमाडौं व उपत्यका अपराध अनुसन्धान कार्यालयया अधिकारीत दुथ्याःगु न्याम्ह दुजः दुगु छानबिन समिति नीस्वंगु खः । समितियात गणेश सी न्ह्यःया घटनाया अध्ययन यानाः याकनं प्रतिवेदन लःल्हायेत निर्देशन बिउगु दु ।

थ्वहे झ्वलय् उगु इलय् घटना जूगु थासय् खटे जुयाच्वंपिं स्वम्ह महानगर प्रहरीतय्के घटनायात कयाः प्रहरीं न्यनेकने यायेधुंकूगु दु । छम्ह मिसाम्ह नगर प्रहरीं गणेश बाइकय् च्वनाच्वंगु इलय् हे ह्वील लक यानाबिउगु खः ।

गणेशया सीम्ह लःल्हाना कायेत अस्वीकार
आत्मदाह याम्ह गणेश नेपालीया सीम्ह लःल्हाना कायेत छेँजःपिसं अस्वीकार याःगु दु । गणेशया काय्चा मन नेपालीं सरकारं मदुम्ह गणेशया छेँजःपिनिगु हेरचारया जिम्मेवारी मकाःतले थःपिंसं सीम्ह लःल्हाना मकायेगु खँ धयादीगु दु । वय्कलं सञ्चारकर्मीतय्त प्रतिक्रिया बीगु झ्वलय् धयादिल, ‘अंकलया जहान ब्वनाच्वंगु दु । म्ह्याय् नं चीधिकः तिनि, अंकलं ज्या यानाः छेँजःपिंत लहिनाच्वंगु खः । सरकारं अन्टी व वय्कःया म्ह्याय्या जिम्मेवारी कायेमाः । जिम्मेवारी मकाःतले जिमिसं सीम्ह लः ल्हानाः कायेमखु ।’

वय्‌कलं सरकारं छेँजःपिनिगु जिम्मेवारी कायेत माने मजुल धाःसा आन्दोलन यायेगु ख्याच्वः बिसें धयादिल, ‘फिब्वख्यलय् वनेमाः कि गन वनेमाःगु खः, जिमिसं आन्दोलन यायेगु जुइ ।’