छुं ज्या यायेत स्वस्थ जुइमाः । स्वस्थ जूसा हे जक मनुखं बांलाक वा तिप्यंक ज्या यायेफइ । अस्वस्थ मनुखं याःगु ज्या नं अस्वस्थ हे जुइ । छम्ह मनू स्वस्थ जूसा ज्या नं याये फइ, बांलाक नये फइ, गनं वने फइ, म्हिते फइ, मनोरञ्जन यायेफइ । स्वस्थताया निंतिं आपालं उपाय दु । दकलय् न्हापां ला स्वस्थकर नसाज्वलं हे नयेगु यायेमाल ।

उकिया नापनापं थौंकन्हय् यक्वसिनं थःगु स्वास्थ्ययात ध्यानय् तयाः मर्निङ वाक वनेगु, जीम वनेगु, स्वीमिंग यायेगु, जुम्बा, थीथी कथंया व्यायाम–कसरत, योगा आदि यायेगु यानाच्वंगु दुसा थुकिया नापनापं थौंया ल्याय्म्ह पुस्ताया दथुइ फुटसल नं छगू स्वस्थताया निंतिं लोकंह्वाःगु उपायमध्ये छगू खः ।

थुकथं स्वस्थताया निंतिं आपालं उपायमध्ये ‘स्वस्थ कलाकार, स्वस्थ मनोरञ्जन’ धइगु नारा बियाः वइगु साउन १८ गते शनिवाः कुन्हु स्वक्वःगु नेवाः कलाकार फुटसल कासा–११३९’ जू वनाच्वंगु दु । थुकी नेपालभाषाया म्येँ, संकिपा, टेलिप्याखं नापं खय् भाय्या संकिपाय् म्हिताच्वंपिं नेवाः कलाकारतय् सहभागिता दइ ।

नेपालभाषाया संकिपा निर्माणया ख्यलय् थःगु हे म्हसीका दुगु सुखावति मल्टि प्रोडक्सनया ग्वसालय् जूवनाच्वंगु थ्व फुटसल कासा थुगुसी स्वक्वःगु संस्करणयागु खः । संस्थां थ्व स्वयां न्ह्यः निक्वःतक थुकथंया फुटसल सफलतापूर्वक ग्वसाः ग्वये धुंकूगु दु । नेवाः कलाकार फुटसल कासा धाःसां नं थ्व गुगुं मेमेगु कासा गथेकि फुटबल, फुटसल, भलिबल, बास्केटबल आदि उपाधिया निंतिं प्रतिस्पर्धात्मक रुपं जुइगु कासा मखसे मात्र विशुद्ध मनोरञ्जनया निंतिं जुइगु कासा खः ।

न्ह्याबलें म्येँ, अभिनयपाखें न्यनामि व स्वकुमिपिंत मनोरञ्जन बीगु ज्याय् जक व्यस्त जुयाच्वनीपिं कलाकारत दछिया छन्हु जूसां थःगु निंतिं नं ई बीमाः, मनोरञ्जन यायेमाः अले उकिया निंतिं स्वयं थः हे स्वस्थ जुइमाः धइगु मान्यतां थुकथं नेवाः कलाकार दथुइ विशुद्ध मनोरञ्जनात्मक फुटसल कासा याना वयाच्वनागु प्रोडक्सनया नायःलिसें नांजाःम्ह कलाकार निर्देशक सुरेन्द्र तुलाधरं कनादिल ।

थ्व हे मान्यतायात आत्मसात यानाः कलाकार स्वयं थः स्वस्थ जूसा हे जक स्वस्थ मनोरञ्जन बी फइ धइगु मान्यतां थुकथं कासाया नां बियाः नेपालभाषाया सांगीतिक, संकिपा, टेलिसंकिपा, म्युजिक भिडियोया कलाकार, निर्माता, निर्देशक, प्राविधिक, च्वमिपिं दुथ्याकाः फुटसल म्हितकाः स्वयम कलाकार थःपिंसं मनोरञ्जन कायेगु अले स्वकुमिपिंत मनोरञ्जन बीगु ज्या वंगु स्वदँ न्ह्यवंनिसें याना वयाच्वनागु वय्कलं धयादिल ।

नेवाः कलाकार दथुइ जुइगु फुटसल कासा मात्र कलाकारया स्वस्थता व मनोरञ्जनय् जक नं सीमित जुयाच्वंगु मदु । कासाय् ब्वति कायेगु निंतिं छगू निश्चित शुल्क पुलेमाः । थ्व शुल्कय् नं छुं प्रतिशत ध्यबा संस्थापाखें चायेकातःगु नेवाः कलाकार ग्वाहालि कोषय् तयेगु यानाच्वंगु दु ।

थ्व स्वयां न्ह्यः निक्वःतक जूगु कासापाखें म्हःगु शुल्क कोषय् तःगु खःसा थुगुसी धाःसा ताःई न्ह्यवंनिसें म्हं मफयाच्वंम्ह नांजाःम्ह कलाकार स्वतन्त्र संसार महर्जनयात आर्थिक ग्वाहालिया निंतिं नं थ्व फुटसल जू वनाच्वंगु दु । निफ्वः स्वां संकिपापाखें अभिनय यात्रा न्ह्याकाः जिपिं बदमास मखु, अय् जि यःम्ह, इहिपा, माया, थ्व जिगु नुगः लगायत आपालं संकिपाय् थःगु अभिनय न्ह्यब्वयादीधुंकूम्ह कलाकार महर्जन थौंकन्हय् ‘स्पाइनल ट्यूमरं’ ग्रस्त जुयाच्वनादीगु दु ।

५,६ दँ न्ह्यवंनिसें थुगु समस्याग्रस्त जुयाच्वनादीम्ह वय्कः दथुइ थ्व ल्वय् लने धुंकूगु खःसा आः वयाः हाकनं ल्वय् तच्वयावःगु दु । उकिं थुगुसी जुइगु फुटसल कासापाखें दुहां वःगु शुल्क मध्ये प्रत्येक कासामिपाखें ५०० तका दांया ल्याखं वय्कःयात आर्थिक ग्वाहालि याइगु जूगु दु ।

वइगु शनिवाः नेवाः कलाकार दथुइ फुटसल जुइगु व वयां मेगु शुक्रवाः छगू न्ह्यइपुक सांस्कृतिक ज्याझ्वः यासें कलाकार महर्जनयात आर्थिक ग्वाहालि लःल्हायेगु ज्याझ्वः दुगु प्रोडक्सनया दुजः भोगेन्द्र मानन्धरं जानकारी बियादिल । उकुन्हु नेवाः कलाकारतय् छगू सांस्कृतिक ज्याझ्वः यासें फुटसल कासाय् ब्वति काःपिं व विजयी जूपिंत लुमन्ति कथं पदक व दसिपौ लःल्हायेगु नापं कलाकार महर्जनयात नं आर्थिक ग्वाहालि लःल्हायेगु वय्कलं धयादिल ।

स्वक्वःगु नेवाः कलाकार फुटसल कासाय् ब्वति काइपिं कलाकारया ल्याः नं न्हापा स्वयां गाक्कं अप्वः दु । निक्वःगु संस्करणया कासा जूगु इलय् तक मिजं कलाकारपाखे च्यागू व मिसा कलाकारतय् प्यंगू पुचः दुगुलिइ थुगुसी मिजं कलाकारपाखे हे झिंनिगू पुचः दुसा मिसा कलाकारपाखे नं खुगू पुचः दु ।

थुगुसीया कासाया निंतिं समूह ‘क’पाखें मोहन ब्यञ्जनकार (निर्देशक), धिरेन शाक्य (मिजं कलाकार संकिपा), भीम तुलाधर (मिजं म्येँ हालामि), समूह ‘ख’पाखें उजय शाही (मिजं कलाकार संकिपा), सुरेन्द्र महर्जन (प्राविधिक), नागय डंगोल (टेलिफिल्म कलाकार), समूह ‘ग’ पाखें सुरेश प्रधान (मिजं म्येँ हालामि), पुष्पराज शाक्य, (मिजं म्येँ हालामि), अमरराज शर्मा–संगीत निर्देशक), समूह ‘घ’पाखें राजेन्द्रमान शाक्य (मिजं कलाकार व म्येँ हालामि), सलिलसुन्दर तुलाधर (मिजं मल्टि आर्टिष्ट) व संजय शर्मा राजोपाध्याय (मिजं प्याखं हुलामि)यात टीम क्याप्टेन ल्यःगु दु ।

मिसा कलाकार पुचलय् समूह ‘क’पाखें हिसिला महर्जन (मिसा फिल्म कलाकार), राज्यलक्ष्मी स्थापित (मिसा कलाकार टेलिफिल्म), समूह ‘ख’पाखें रचु शाक्य (मिसा हुलाप्याखं कलाकार), रुक्साना महर्जन (मिसा मोडल), समूह ‘ग’पाखें सरना श्रेष्ठ (मिसा म्येँ हालामि) व पल्पसा डंगोल (मिसा कलाकार)यात टीम क्याप्टेनकथं ल्यःगु दु । मिसातय् पुचलय् क्याप्टेननापं खुम्ह कलाकार दुथ्याकातःगु दुसा मिजं पुचलय् धाःसा खुम्हंनिसें न्हय्म्ह दुथ्याकातःगु दु ।

सम्बन्धित बुखँ

LEAVE YOUR COMMENTS