राजधानीया चलखेल,हेटौंडा कायम यायेत मुख्यमन्त्री सक्रिय

येँ – ३ नम्बर प्रदेशया स्थायी राजधानी हेटौंडाय् हे तयेगु लागिं चलखेल जुयाच्वंगु खँ सीदुगु दु । थ्वहे पुस दुने प्रदेशया स्थायी राजधानी क्वःछी धकाः मुख्यमन्त्रीं डोरमणि पौडेलं धाःसां नं मुख्यमन्त्री पौडेल तत्काल राजधानी बारे निर्णय यायेत धाःसा अनिच्छुक जुयाच्वंगु खँ सूत्रं धाःगु दु ।

सूत्रया कथं थौंकन्हय् हेटौंडाय् हे राजधानी कायम याना तयेगु लागिं अन भौतिक निर्माणया ज्या तीव्र गतिं जुयाच्वंगु दु । प्रदेश राजधानीया निंतिं भौतिक निर्माण सम्पन्न जुइगु इलय् राजधानी अन हे तयेमालीगु अवस्था ब्वलनी । थ्वहे झ्वलय् सीदु कथं कंसया दुने हिउँदे अधिवेशन क्वचायेकेगु कथं तयारी जुयाच्वंगु दु ।

हिउँदे अधिवेशन क्वचाल धाःसा हाकनं राजनीतिक चलखेल जुयाः हेटौंडाय् हे राजधानी कायम जुइफइगु स्थिति वइ । प्रदेशया राजधानी गन तयेगु धइगु खँ गुलि लिबाना वनी उलि हे हेटौंडाय् हे लानाच्वनीगु मनस्थिति कयाः मुख्यमन्त्री पौडेलं प्रदेशया राजधानी सम्बन्धी विधेयक दर्ता यायेगु ज्याय् तकं आलताल यानाच्वंगु सूत्रया दावी दु ।

आः प्रदेशया राजधानी काभ्रेय् तयेमाः धइगु पक्षय् बहुमत सांसदत दु । राजधानी बारे निर्णय यायेगु ज्या लिबात धाःसा लिपा वनाः काभ्रेया पक्षय् दुगु बहुमत नं म्हो जुयाः काभ्रेय् तये मफइगु अवस्था ब्वलनीगु व हेटौंडाया पक्षय् नं दुई तिहार बहुमत मदयाः बाध्यात्मक परिस्थितिइ हेटौंडायात हे राजधानी दयेक मालीगु खँ सूत्रं धाःगु दु ।

हेटौंडाय् राजधानी तयेत नेतातय् दथुइ सहमत जुल धाःसा निगुलिं पक्षय् बहुमत मवइगु खँ सूत्रं धाःगु दु । तर आपालं सांसदत फयांफछि काभ्रेय् राजधानी तयेमाःगु पक्षय् दु । काभ्रेय् राजधानी जुल धाःसा प्रदेशया झिंस्वंगुलिं जिल्लाया जनतायात सुविधा दइगु उमिगु दावी दु ।
मुख्यमन्त्री पौडेल थः नं हेटौंडाय् च्वंम्ह जुयाः राजधानी गन तयेगु धइगु खँ वय्कःया राजनीतिक भविष्यलिसे हे स्वानाच्वंगु जुयाः वय्कः थुकी गहन रुपं सक्रिय जुयाच्वंगु खः ।