स्पेनया जंगलय् मिं नयाः १२ म्ह सित

म्याड्रिड – स्पेनया दक्षिण-पूर्वी प्रान्तया छगू जंगलय् तसकं बांमलाक मिं नःगु दु । दक्षिण पूर्वी प्रान्त अल्मेरियाया अन्डालुसियाया लस गायार्दोस लागाय् च्वंगु जंगलय् मिं नयाः म्होतिं नं झिंनिम्ह सीगु दु । घटनाय् मेपिं खुम्ह घाःपाः जूगु दु ।

अन्डालुसियाया स्थानीय नेता जुआनमा मेरेनों नं घटनाय् झिंनिम्ह सीगु पुष्टि याःगु दुसा राज्यया सरकारं सीपिं अप्वः थें विदेशी नागरिक जूगु प्रारम्भिक अनुमानया विवरण सार्वजनिक याःगु दु । स्थानीय अधिकारीतय्सं सीपिमध्ये प्यम्ह बेलायती नागरिक जूगु जानकारी बिउगु दु । स्पेनया अधिकारीतय्सं धाःसा थुकिया पुष्टि याःगु मदुनि । मिं नःगु थासय् गाडी दुने च्वनाच्वंपिं नं सिनाच्वंगु अवस्थाय् लुइकूगु दु ।

मि तसकं याकनं न्यना वंगुलिं मनू बिसिउँ वने मफूगु स्थानीतय्सं धाःगु दु । प्रत्यक्षदर्शीतय्कथं मतया लाइन कुतुं वयाः उगु घटना जूगु व तत्काल मि जंगलय् न्यना वंगु खः ।

स्पेन, फ्रान्स, पोर्चुगलया सत्यां मल्याक दमकल परिचालन यानाः मि नियन्त्रणय् कायेगु कुतः यानाच्वंगु दुसा आपातकालीन उद्धार पुचः नं परिचालन याःगु दु । तसकं बांमलाक मिं नःगुलिं उगु लागाय् च्वंपिं द्वलंद्वः मनुखं थःगु छेँ त्वःता वने माःगु दुसा इमित मेथाय् सुरक्षित रुपं तयेयंकूगु दु ।

अन्डालुसियाया स्वास्थ्य व आपतकालीन मामिलामन्त्री एन्टोनियो सान्जं मि तीव्र रुपं न्यना वनाच्वंगुलिं उद्धार व नियन्त्रणय् कायेत नं तसकं थाकुया च्वंगु धाःगु दु ।

स्पने लिसें दक्षिण युरोपया आपालं देशय् तापक्रम थहां वनाः ४० डिग्री स्वयां च्वय् थ्यनाच्वंगु दु । थुकिं यानाः स्पेन व जःखःया देशय् जंगलय् मिं नइगु घटना नं अप्वयाच्वंगु दु ।