ने. सं. ११४३ चौलाथ्व सप्तमी -

४० करोडया सफू बँ तलय्

एजेन्सी – लन्दनया छगू गोदामं खुयायंकूगु थ्यंमथ्यं ४० करोड तका बराबरया निसःपाः सफु रुमानियाया छगू गामय् च्वंगु छेँय् बँ तलय् सुचुकातःगु लुइकूगु दु। थ्व सफू मध्ये छुं छुं सफू ग्यालिलियो व आइज्याक न्यूटनं च्वयातःगु सफूया न्हापांगु संस्करण नं दुथ्याः ।

थ्व सफूत सन् २०१७या जनवरीपाखें खुँतय्सं फेल्टमया गोदामं खुयायंकूगु खः । सेन्सरपाखें बचे जुइगु निंतिं खुँत स्टोरया पलिं खिपःया ग्वाहालिं कुहां वःगु खः । थ्व खुँत रुमानियाया आपराधिक गिरोहयापिं जूगु खँ धाःगु दु । लन्दन मेट्रोपोलिटन प्रहरीं थ्व गिरोह इंग्ल्यान्डया थीथी थासय् मूवंगु वस्तु खुँज्याय् संलग्न दुगु खँ धाःगु दु ।

बुधवाः उत्तरपूर्वी रुमानियाया नियम्ट क्षेत्रय् लाःगु छखा छेँय् खानतलासी याःबल् थ्व सफू बँ तःलय् सुचुकातःगु अवस्थाय् लुइकूगु खः । अनुसन्धानकर्तातय्सं थ्व सफू मालेगु निंतिं २०१९या जून निसें इंग्ल्यान्ड, रुमानिया व इटलीया ४५ गू थासय् छापा मारे यायेधुंकल । थ्व खुँज्याय् संलग्न धकाः झिंस्वम्हेसित अभियोग तःगु खःसा उपिं मध्ये झिंनिम्हेस्यां थःपिनिगु संलग्नता स्वीकार यायेधुंकूगु दु ।

खुयायंकूगु ज्वलं मध्ये दाँतेया दुर्लभ सफू व स्पेनी चित्रकार फ्रान्सिस्को डिगोया चित्रया लिसें १६ औं व १७ औं शताब्दीया ग्यालिलियो व आइज्याक न्यूटनया सफू नं लाःगु खः । ‘थ्व सफू तसकं मूल्यवान । थुकिया विकल्प मेगु दइमखु । थ्व सफू अन्तर्राष्ट्रिय सांस्कृतिक सम्पदाया निंतिं तसकं महत्वपूर्ण खः’ मेट्रोपोलिटन प्रहरीया अनुसन्धान अधिकारी एन्डी डरमं धयादिल ।

अमेरिकाया लस भेगासय् जुइत्यंगु विशेष सफूया भाःक्वःछिउगु कार्यक्रमया निंतिं यंकेत्यंगु इलय् थ्व सफू खुयायंकूगु खः । हिथ्रो विमानस्थल लिक्क लाःगु फेल्टमय् च्वंगु गोदामया पलिं खिपः चिनाः ४० फिट कुहां वयाः खुँतय्सं खुयायंकूगु खः ।