मोतिलानी सिरपाः लःल्हात

येँ (नेपालभाषा टाइम्स)- नेपाल संवत् ११४१, ४२ व ४३ या मोतिलानी सिरपाः लःल्हाःगु दु । थुगु दँय् एसइइ, बिए व एमएय् नेपालभाषाय् उत्कृष्ट जूपिं विद्याथपिंत दां सिरपाःसहित दसिपौ लःल्हाःगु खः । ने.सं. ११४१ य् एसइइ जगतसुन्दर ब्वनेकुथिया पूर्णिमा तुलाधर, बिएय् सोमी डंगोल, एमएय् राकेशमान मास्के उत्कृष्ट जूगु खःसा ने.सं. ११४२ इ एसइइ आर्दश मावि थिमिया निकेश बसी श्रेष्ठ व एमएय् अनिल स्थापित उत्कृष्ट जूगु खः । अथेहे ने.संं ११४३ य् एसईइ जगतसुन्दर ब्वनेकुथिया रविना श्रेष्ठ उत्कृष्ट जूगु खः ।

उत्कृष्ट जूपिं विद्यार्थीपिंत मूपाहाँ येँ महानगरपालिकाया पुलांम्ह मेयर विद्यासुन्दर शाक्य व विशेष पाहाँ नेपालभाषा केन्द्रीय विभागया प्रमुख सह प्रा. राजनलाल जोशीं दसिपौ, मोतिलानि सिरपाःया अध्यक्ष प्रा. प्रेमशान्ति तुलाधरं स्वां, सरोज तुलाधरं मतिनाया चिं व सिरपा दाता मोतिलानी ताम्राकारया तःधिकःम्ह म्ह्याय् सीता ताम्राकारं दां सिरपाः लःल्हानादीगु खः ।

प्रा. तृुलाधरया सभापतित्वय् जूगु ज्याझ्वलय् मूपाहाँ लिसें पाहाँपिंसं मदुम्ह ताम्राकारया किपाय् स्वांमाः देछासें श्रद्धाञ्जली प्वंकादीगु खःसा सिरपा समितिया स्थापनाकालंनिसें दांभरि जुयाः ज्या यानादीम्ह मदुम्ह करुणामान शाक्यया लुमंति छगू मिनेट मौन धारण याःगु खः ।

दिव्या ताम्राकारं लसकुस यानादीगु ज्याझ्वलय् रमिता वज्राचार्यं सिरपाः दाता मोतिलानी ताम्राकारया म्हसीका न्ह्यब्वयादीगु खः । अथेहे ताम्राकारया चीधिकःम्ह म्ह्याय् व सिरपाःया संरक्षक सरोज तुलाधरं सुभाय् देछायादीगु खः ।