पसः व क्वथा त्वःतीपिं अप्वल

येँ (नेपालभाषा टाइम्स) – कोरोना संक्रमण ताःहाकः जुया वनेवं स्वनिगःया थीथी थासय् पसः कवः व क्वथा त्वःतीपिं अप्वया वःगु दु। स्वनिगलय् थीथी थासं वयाः व्यापार व्यवसाय यानाच्वंपिं कोरोना संक्रमणया कारणं थःगु व्यवसाय यायेत थाकुइवं व्यवसाय त्वःताः थःथःगु हे गामय् लिहां वनेगु अप्वयावःगु खः ।

लकडाउन न्ह्यः तक स्वनिगलय् पसः कवः व क्वथा कायेत तसकं थाकुगु अवस्था दुगु खःसा आः स्वनिगलय् आर्थिक क्रियाकलाप म्हो जुइवं पसः कवः व क्वथा त्वःतीपिं अप्वया वनाच्वंगु खः । येँय् क्वथा खाली जुइवं छेँ थुवाःतय्सं क्वथाया बाः म्हो यायेगु क्रम नं अप्वया वनाच्वंगु दु। थ्वहे झ्वलय् कलंकीइ न्हापा स्वकू क्वथाया नीद्वः तका पुलाच्वंगु क्वथा नं आः झिंनिद्वलय् कुहां वःगु दु ।

स्वनिगलय् क्वथा जक मखु पसः कवः नं खाली जुजुं वनाच्वंगु दु। येँया तसकं थिकेगु व व्यस्त बजाः कथं कयातःगु महाबौद्धय् आपालं पसः खाली जुयाच्वंगु दु। लछिया न्यय्द्वः स्वयां अप्वः पुलेमाःगु व व्यापार धाःसा न्हिं प्यद्वः न्याद्वः जक जुयाच्वंगुलिं पसःया बाः तकं साले मफुगु धासें पसल्यातय्सं पसः त्वःतेगु क्रम अप्वया वंगु खः । व्यापारिक थाय् कथं चर्चा जुयाच्वंगु थँबही, न्हू सतक, खेचापुखू, टेकु लगायत थासय् पसः खाली दु धकाः तिकेगु क्रम नं अप्वया वनाच्वंगु दु। व्यापारीतय्सं व्यापार मदुगु व पसःया बाः तकं सालेफइगु अवस्था मदयेवं पसः त्वःतेमाःगु खँ धाःगु दु ।

थःगु नां कने मयःम्ह छम्ह महाबौद्धया व्यापारींधाल, ‘पसः बाः हे लछिया छगू लाख धयाथें पुलेमाः, पसलय् न्हिं न्याद्वः दांया हे व्यापार मदु, थुकथं गुबलय् तक पसः चले यायेफइ ?’

स्वनिगलय् ब्वनेत वयाच्वंपिं, लजगाःया निंतिं वयाच्वंपिं आपालं धयाथें मनूतथःगु ज्या मदयेवं क्वथा त्वःताः गामय् लिहां वनेवं स्वनिगलय् क्वथा खाली जुइगु क्रम अप्वया वंगु खः ।